13
Sew iniman alew imi sung uta ko.
1 Kale mátuw ayo matam yol wok badang kal todsa.
Ade alo naka yol wok badang kal sew iniman mak yol wok kumun tem kal matamba atamsi ayo idis sanam nangal kal, gebom fet kal idis sanam makuw makuw ami dim be kamokim win finin manil kei nadale win gebom fet kal imi dim godin be Got win ididlawin dok dásiw. 2 Kale sew iniman atami be iniman lewbat taw ade ami yán be iniman beya ami yán taw ade bon tem be iniman layon bon tem taw, kale mátuw dukum tabe sew iniman ayo kitid so alami abin abem so kamok keiyámin abin so uyo kudawa dukum keise. 3 Kale sew iniman gebom mak be anbidiw iwit dukum teinsa. Kale iwit dukum tabe anbida fikalesa, kata iwit dukum uyo tukána nade talá tabesa. Kale bakan kinim adikum iyo be atam beso kanodu kuwo kal bom aket diking dakung bom sew iniman ami yán abosiw. 4 Kinim wanang iyo mátuw dukum ami win kufádawsiw, be watawo kaleyo bá, aka kamok keiyámin abin uyo sew iniman kudawse, kayo sew iniman alaso win kufádawsiw, kale ika dákadá bako nadiwade, “sew iniman bela kan alatawe? Kan ata ken aso wasi kei bom ginanodiwe?” Akansiw ko.
5 Kale sew iniman ayo dabadáliw alam tok baka bom nadale Got win ididlawin uyo kana bom nadale alam kamok kitid kuduse uyo faku bom bi kayow deng mak dutamo tadeyak kin madik kal (42) keidokaba ko. 6 Kale aka alam bon tem tuw Got ami win so ami abiw biyámin so uyo idiya bom nadane abid tikin kayak iliso idiya bom keimsa. 7 Kale sew iniman aka kitid kudu nadale Got kinim abem abem so wasi ginan bom nadiwade ata tabe anik anik keiyam nada ata kamok keiyámin kitid uyo kudawiw kinim mit so kinim atama banim so weng kukum bakodin so bakan kukus kukus kayak so iyo adikum akayamsa ko. 8 Adikum bakan bidiw kinim wanang iyo sew iniman win ki kufádawokabiw bidi yak wanang kinim kan ita im win mak kudew yak sinikso biyámin buk tem mak dáyamongin banim ita, kale belami buk ayo Siwsiw man ami buk kale Siwsiw man bela suwayo anang bakan kidel kudongin banim katow kal anbidiw fikalesa am sung ko.
9 Kan ata kilung so namti dabadálaw kidela kidilako.
10 “Kan ata sok gei daudumo kalebiw namti, alam sok gei daudokabiw ade kan ata woksek kaung tuw anbidumo kalebiw namti, woksek kaung tuw anbidokabiw.”
Kale belami mit ayo ki Got wanang kinim abem iyo dakbu, afan kale duyam biyámin uta ko.
11 Kale beta naka sew iniman kukum mak atami be bakan tem kal matamba ka, aki. Kale am idis sanam alew be siwsiw man idis taw, kata am weng ayo mátuw dukum weng bakanin taw keimsa ko. 12 Kale aka kamakikiw sew iniman ami kitid makuw kudusa bemi tuw bakan dim wanang kinim iyo kanoyama kamakikiw sew iniman iwit so tukánlawsa, ami win kufádawsiw. 13 Kale aka dubat dubatin kukuw dukum uyo kana bom nadale wanang kinim kin dim abid tikino as kata kudála madák bakan tasu. 14 Aka bakan dim wanang kinim iyo alam dubat dubatin dim kasen keiyamámsa, be kamakikiw sew iniman ami kitid tuw kanayamsa. Kale aka kamakikiw sew iniman woksek tuw anbidiw iwit so alam kano kaunsin teinsa ami luk wanang kinim iyo kanamino yaka, ika am kit uyo kidel bom win kufádawsiw.
15 Kale sew iniman siwsiw man taw ayo kitid soim kayo aka kamakikiw sew iniman ami kit kidel daudiw ayo mam daudawa nade matam ken weng bako nada, “yak kan ata naka suksuknamongin banim iyo anudokabiw kaloma.” 16 Kale sew iniman siwsiw man taw ayo adikum kinim win banim so win tabin so kisol kayak so kisol banimnak so kinim gulbal keidongin banim so gulbal kinim so iyo fut mak dew yak imi teng miskuno so dabal kun dim so kál goduyamokaba kala. 17 Kaleyo yak kan ita uyo fut be kudulongin banim, ika ufek ufek so wansiki dusikiyodiw banim kale fut be sew iniman ami win ade ami win fut ding bakanin uta ko.
18 Kale kinim kan ata kal keisa kinim kaí, ding bakanin fut uyo taktak dau umi dam uyo utamak kala. Kale be yak aket kidel fukanin kinim ata kuw ken utam kal keidokaba. Kale ding bakanin fut be kinim mak ami win fut kale ami ding bakanin fut be bokuw ulumi ki alewbino (666) kalbiw uta ko.