IBURU KINA'MI NKISANE
1
Koti Ntagarama kamana aboraramintiye
Paipa uwaena yaga Kotiba toma toma ki i'ma poropete kina'mi nkiwamutasa tayabamagi mono kamana'wapa uwaimita kanantiye. Piya, ainti atuti iba nagarikena kanara, Kotiba kamana agowapa, yagarawa nkaboraramintine. Pi ntagarama nkayatasa Kotiba mampaba puma'ma, a'ya'maenama nkago miyenoma otantine. Piya, yagarawampa aeba Koti kanta puma mima ka'masa pumagina, aeba Koti nke'wasaena aboraramimagina, kamana'wampa nkesegiyenarasa a'ya'maena mabe mantabe parutu puma kabiye. Aeba aguntaenabisa aeyobatatakena yuga puma a'ya kaitegina, Tabe Wa'egama nkayatakanti inati asu mara'mintiye.
Koti Ntagarama a'ya'ma enisore kinapa igantiye
Pigoya, abawampa yagaranene ominti nkagiba enisore kina'mi nkigeba igasisa puma, aewapa enisore kina'mi igasima abawampa nkayatakanti mara'mintiye. Piya, paipa paipa Kotiba yagarawaka maya omintiye:
Yagaranekawe. Kaepa iba aboragatauwe, untiye, iye.
Piya, aeka to kake maya untiye:
Naeba abawampantana puma miyekana, aeba yagaranentana puma miyeno, untiye, iye.
Pigoya, pi kamanapa Kotiba ka enisore yagaraga untiye, a. Kampaye. Piya, aeba amaru yagarawa mabi ataogana aboraogana maya untiye:
A'ya'ma enisore kina'nempitaba, aeti tirakabima agisiyo, untiye, iye.
Piya, enisore kina'mikaba maya untiye:
Naeba enisore kina'nepa esiba kanta puma aboramagi, pi ntuga kina'nepa yaku nkantebu kanta puma aborawaitauwe, untiye, iye.
We, a'wae puma yagarawaka Kotiba maya omintiye:
Kaeba Koti mimagina, tabe Wa'ega a'ya'ma yaga miyaba mima, kabiwaitakenaenagatapa kabima mima parutu'ena puma miyaba mikibene, iye.
Piya, kaeba arupuyenaga kabegina, antage'enaba kama potane, iye.
Pika kae Kotina, naeba ka'muntanagapa kae tikataogana kao'mipa igasaye, untiye, iye.
10 Pigoya, to kapa Kotiba maya omintiye:
Wa'ega, kaeba paitaka'ya maba aboratama, mantaba kayapisa pumarantampene, iye.
11 Piya, kaeba miyaba miyegana, mantabe mabe paisa kai abararaisa puma abararama ata puwakiye, iye.
12 Piya, kabi akarakitantana to antota kasa maema kabisa puma, mantabe mabe to antota kasa'ena aborakiye, iye.
We, kaeba kampa antota kasa'ena aborama pabiyama mimagina, masimabi kau'yaga miyaba mikibene, untiye, iye.
13 Pigoya, paipa Kotiba yagarawaka to ka maya omintiye:
Kaeba nayatakanti mara'miyega, kama kinakapa kagisa amentapinti atakini waiyo, untiye, iye.
Pigoya, pi kamanapa Kotiba ka enisore yagaraga untiye, a. Pipa kampaye. 14 We, enisore kina igeba awamusa kina mima Koti kayokaya potagina, i'ikibi kina iyo'maeyiyema uwaitaye.