3
Iesusna rɨtɨpaikta meikramtaɨrta tumbunna ŋginaŋna aiŋa mona ramtaɨra mina tɨpemb kirarir laiŋ tiŋgikca raŋgairaŋ
Up 20.28, na Epe 4.12, na Pil 1.1, na 1 Ti 1.15Na gan kamma aku mbopeknanna, anna kam gidik ŋgoin. Na ramoot ianna Iesusna rɨtɨpaikta meikramtaɨrta tumbunna ŋginaŋna aiŋa mona toŋtoŋ aniacap te, ma aiŋ laŋa toŋgorena. 1 Ti 5.9, na 2 Ti 2.24 Ta 1.6-9Na gan tɨpapna kirarna ramoot, ma Iesusna rɨtɨpaikta meikramtaɨrta tumbunna ŋginaŋna aiŋa mona mɨn. Na ma tɨpemb ŋgorikca mo ŋgocorta ramoot, na ma meac kabeapna ramoot, na nikca mba tawi katrenan, na ma eteac laŋapa iro laŋna ramoot, na tɨp laŋna kirara morena ramoot, na Raraŋ Aetaniacna kammo meikramtaɨrmo matau riptina mɨnna ramoot. Na ma puk gargara mba ammi ŋaŋaorena ramoot, na ma nikca mba tawi owairena ramoot, na ma mba ruŋrena ramoot, na ma kitukndukna toŋtoŋ aniacna mba morena ramoot. Na ma ndona kacnɨmnanapa, mana meacapa, mombonikmo matau raupŋirena, na mana mombonikca mana kam mbaraca raŋgairena. Na ramootta ndona meacapa, mombonikmo matau raupŋi ŋgocor te, ma Iesusna rɨtɨpaikta meikramtaɨrta tumbunna aiŋ aŋgɨ mona mɨnna wanaiŋ. Na mandeba rɨpacrena ramoot, ma an aiŋa mba aŋgɨitndai, moca ma paŋan gargar ndaru nari, te, an ritri waparaca Raraŋ Aetaniaca Paparuna Ramootta morinanna, ma mamo toco ainda monande. Up 22.12, na 1 Ko 5.12, na 2 Ko 8.21, na 1 Te 4.12, na 1 Ti 6.9Na rɨpac ŋgocorta raekmbaina tumbunna meikramtaɨra mina wat te, ma i laŋapa, tɨpemb kirarir laiŋgapna ramoot, ma ndo an aiŋa mona mɨn. Na ma an iremb kocor, na tɨpemb kirarir laiŋ kocor, te, meikramtaɨra mamo kam ŋgorik ndopnandet, na ma Paparuna Ramootna weaŋa mbuknandet.
Iesusna rɨtɨpaikta meikramtaɨrta tumbuna aiŋa morena ramtaɨra tɨpemb laiŋga raŋgairaŋ
Na an kirar toco, ramootta Iesusna rɨtɨpaikta meikramtaɨrta tumbunna, aiŋa mona ramoot ndaru te, ma tɨpemb ŋgorikca mba morena ramoot, na kɨrpaina mimna ramootta wanaiŋ, na puk gargar mba amba ŋaŋaorena ramoot, na kitukndukna toŋtoŋ aniaca mba morena ramoot. Na mina Raraŋ Aetaniaca, aimo wandacatna, kam wembaŋ laŋa rɨpaca matau utiŋa, Raraŋ Aetaniacna lamnɨacmo tɨpemb ŋgorik kocor. 10 Na minmo pac towaia wat, mina an aiŋa mona mɨn te, minmo an aiŋ neaŋca mina mo. 11  Ta 2.3Na an kirar kabea mina meikpitik toca, mina ainda mo, mina tɨpemb ŋgorikca mba morena meik, na kamma tamtamma kai ndoŋndoŋa kai rapac taŋ teac, na puk gargara mba amba ŋaŋaorena meik, na mina mataua laŋan ndeaca, ndorita aiŋira wandoikca moraŋ. 12 Na Iesusna rɨtɨpaikta meikramtaɨrta tumbunna aiŋa mona ramoot, ma meac kabe niŋgik laŋgo, na ma ndona mombonikmo matau raupŋirena ramoot, na ma ndona kacnɨmnan motocmo, matau raupŋirena. 13 Na Iesusna rɨtɨpaikta meikramtaɨrta tumbunna aiŋa morena ramtaɨr, mina aiŋir laiŋga mo te, mina iremb laiŋ aŋgɨnandet. Na mina Karais Iesusna rɨtɨpacna kamma mba wiwiti nake, mba rugutta mba moitndai.
Raraŋ Aetaniacna tɨpemb kirarirta kamna mɨnɨŋa, anna reac aniac ŋgoin
14-15  Epe 2.19-22, na 2 Ti 2.20Ainda moca aku umo tawi kɨpca watna toŋgorena. Na reac ianna aukmo moca aku tawi kɨp ŋgocor ndacari te, u gan timbiŋ rapara aku tirca neaŋga kɨpeknanna, u anna watca u lamŋinandet. Ainda moca Raraŋ Aetaniacna tɨpemb kirarir laiŋga aia mana meikramtaɨra anna raŋgairaŋnandet. Na aia Raraŋ Aetaniacna wiwitnan, aia Raraŋ Aetaniaca memetmbaca eacrena Iesusna rɨtɨpaikta meikramtaɨrta tumbunnan, na an Iesusna rɨtɨpaikta meikramtaɨrta tumbuna anna ma kacna wit gargara kam gidikca mbukca eacrenan toc. 16  Mk 16.19, na In 1.14, na 16.8-9, na 1 Pi 1.12, na 3.18Na aia matau lamŋirena, Raraŋ Aetaniacna tɨpemb kirarirta kam mɨnɨŋa anna reac aniac ŋgoin. Na an kamma Raraŋ Aetaniaca aimo wandacrenanna gaind,
 
Ma ramootna kirara laruca eacri,
meikramtaɨra mamo watri.
Na Ŋeroŋ Ratta mana tɨpna kirar wandoŋmo wandacrina,
ma wandoŋ ŋgoin,
na Raraŋ Aetaniacna mbaiŋna aiŋa morena ŋerŋgaura mamo watri.
Na meikramtaɨra mana kammo
gan tiacarpaikna pitrik waŋna meikramtaɨrmo wiwitirinan,
ri, gan tiacarpaiknanda marɨpacat.
Na Raraŋ Aetaniaca mamo tamuŋna auŋ naaŋgɨca gaca,
ma memetacapa i aniac maaŋgɨat.

3:1 Up 20.28, na Epe 4.12, na Pil 1.1, na 1 Ti 1.15

3:2 1 Ti 5.9, na 2 Ti 2.24

3:2 Ta 1.6-9

3:7 Up 22.12, na 1 Ko 5.12, na 2 Ko 8.21, na 1 Te 4.12, na 1 Ti 6.9

3:11 Ta 2.3

3:14-15 Epe 2.19-22, na 2 Ti 2.20

3:16 Mk 16.19, na In 1.14, na 16.8-9, na 1 Pi 1.12, na 3.18