15
Iesusa rɨpacrena laiplacarta tumbun aniac ianna Ierusalem mapuniat
1 TN 12.3, na In 7.22, na Gal 2.12, na 5.2, na Kol 2.11, na 2.16Ainda moatke, Iudiana ramtaɨr ndeida Antiok auŋ ŋgirikca, Iesusa rɨpacrena laiplacarmo ainda riptiatna, “Ne Mosesna Tɨp Wandɨkca raŋgaica mina nena tikemb iŋir katac ŋgocor te, Raraŋ Aetaniaca nenmo mba mac nda aŋgɨritndai.” 2 Up 11.30, na Gal 2.1Ri, Polapa Banambasa an kamma waracatke, maniŋa ŋgepca minap kam mbuŋa kaeg bagaraniaca moca, minap ipuŋga mbopri, na Iesusa rɨpacatna meikramtaɨra ŋgepca an reacna kekelamun irikatke, an Iesusa rɨpacatna meikramtaɨr, mina ŋgepca Polapa Banambas mbaniŋmo minap Ierusalemma taŋca an kammo up aŋgɨrena ramtaɨrap, mina mimitpac aŋgɨrena ramtaɨr paŋaind tambuŋ ndaruca, an kam wandoŋaina moca, minmo mambagɨriat.
3 Ri, an Iesusna rɨtɨpaikta meikramtaɨrta tumbuna, mina ainda moca mbagɨrica mina taŋ, taŋga, taŋga Ponisiaapa Samaria ndaruca, an pitrik waŋna rɨkndiŋa taŋgatke, an Iesusa raŋgairina meikramtaɨrmo gan kam mambopat, “Raraŋ Aetaniaca Iudana meikramtaɨr wanaiŋnanta tumbunna iroara rɨŋga, mina iroar maŋgetrikiat.” Ri, an auŋna Iesusa rɨpacrena laiplacara an kam mbaracatke, mina toŋtoŋ bagaraniac ŋgoin.
4 Up 14.27Karica mina taŋga Ierusalem auŋ ndaruatke, an ndeacrina Iesusna rɨtɨpaikta meikramtaɨrta tumbunapa mina ramtaɨr paŋaindapa, up aŋgɨrena ramtaɨrap. Mina Polapa Banambas mbaniŋa watca maniŋmo ra laŋ neaŋgɨrina. Ri, maniŋa minmo Raraŋ Aetaniaca maniŋap morina reikta kambca, maniŋ minmo an mambopat. 5 Ri, Parisina tumbunna ndeida an inikca Iesusa rɨpacrenan, an ndeacrinan ŋgepca aindopatna, “An Iudana meikramtaɨr wanaiŋnanda, mina ndorimo aina tumbun nakɨpi mbuk ndop te, ne mina tikemb iŋir katac, te, minmo mbopca mina Mosesna Tɨp Wandɨkca raŋgai.”
6 Ri, an up aŋgɨrena ramtaɨrapa ramtaɨr paŋainda, ndorimo aŋgɨra punica an kam wandoŋaina moca. 7 Up 10.1-43Karica mina ndorimo an kam wandoŋai ndopca mamoatnanna, ŋgepca ndorimo iptipuŋ aniaca moa taŋ, taŋga maiatna mbatca, Pita ŋgepca minmo gaind mambopat, “Ne Iesusa rɨpacrena laiplacar, ne malamŋireke, ŋgaua Raraŋ Aetaniaca aimo an aiŋa mona moca nduca maica, ma aukmo an Iudana meikramtaɨr wanaiŋnandmo waraca ndona kam wembaŋ laŋna kammo, aukmo an ndop te, mina ndori waraca ndorita rɨtɨpaikca ndori puŋga mo ndopca aukmo larapacatna. 8 1 Nin 28.9, na Up 1.24, na 2.4, na 10.44, na 11.15Na Raraŋ Aetaniac, ma ndo ma meikramtaɨrta iroar inkara ma lamŋirena, aintik ma minmo Ŋeroŋ Rat neaŋgatna. Na anna ma aia neaŋgatna kirar. Na an iroa ma ainda moatnanna, ma aimo gaind ndamŋina moca, ma an meikramtaɨr aŋtaŋgɨna toŋtoŋap. 9 Up 10.15, na 10.28, na 10.34-35, na Ro 10.11, na 1 Ko 1.2, na 1 Pi 1.22Na ma gainda mba morenanna, ma aimo kirar damma mo te, min motocmo ma kirar damma monande, wanaiŋ ŋgoin. Mina Raraŋ Aetaniaca rɨpacre tik, mina an rɨtɨpacna taup mbuŋa Raraŋ Aetaniaca mina makukara moa kecarica, mina mana lamnɨaca meacramoot wandoŋ laŋ ndarurina. 10 Mt 11.30, na 23.4, na Lk 11.46, na Gal 3.10, na 5.1Aintik kaina moca ne Raraŋ Aetaniacmo ainta totowaia mona moek? An Iesusna iŋa raŋgairena meikramtaɨr tambatmo ainta makukara kai leac teac, atua aina nicarapa, gan aina mɨn toco, aia ainta makukara mbukna mɨnna wanaiŋ. 11 Ro 3.24, na Gal 2.16, na Epe 2.5-8, na Ta 2.11Na aia Kacoot Iesus Karaisa rɨpacrenan tik, mana kakadmaica ndo aina makukara mo kecari te, Kacootta aimo mac nda aŋgɨnande, aintik Raraŋ Aetaniac ma an meikramtaɨr motocmo ma aŋgɨnande.”
12 Up 14.27Na Pita an kam mambopat, ri, an meikramtaɨra punica Polapa Banambas mbaniŋmo, Raraŋ Aetaniaca maniŋ mbuŋa ainta ŋgagatracara an Iudana meikramtaɨr wanaiŋnanta kɨdrɨkca tɨkca moatna reikta nininia mori, na mina mbiraca maica kour ikca mawaracri.
13 Up 12.17, na Gal 2.9Karica maniŋa mbopca maiatna mbatca, Iemis tuk ŋgepca aindopatna, “Ne Iesusa rɨpacrena laiplacar, ne gan auk mbopekna kam mbarac! 14 Up 15.7-9Saimon Pita ma nemo outta mboprinan, ‘Raraŋ Aetaniac ma mina an Iudana meikramtaɨr wanaiŋnanta kɨdrɨk ŋgirikatna, mina ndeidmo moi iroar inkar uriraca ma minmo aŋgɨnande. Te, mina iroar ŋgetrikica mina Raraŋ Aetaniacna meacramoot ŋgoin ndarunande.’ 15 Na an Raraŋ Aetaniacna rambca morina ramtaɨr toco, mina an Raraŋ Aetaniacna Timbigta Kap mboprina, an kam iro kabe ndopatna. 16 Emo 9.11-12‘Ainda moca Kacootta aindopatna, “Dewitna barna meikramtaɨra anna ma kac bagar witkia irikca eacrena kirar maeacreke. Na iŋmbaia, aku mac nda kɨp te, aku an kacmo mana ŋgocrairina reik mac nda rutica moi laŋa moca, manmo mac nda aŋgɨri ŋgepi wɨtɨknande. 17-18 Ainda mo te, gan tiacarpaikna meikramtaɨra Kacootna moca ndada ŋgorenande, aintik an Iudana meikramtaɨr wanaiŋnanda aku baburinan, mina aukna meikramtaɨr koind.” An kamma anna parua wanaiŋ, anna gidik, an kamma Kacootta atu ŋgoinna ndopatna kamma mba ŋgetrikitndai, an reikca gidik ŋgoin ndarunande.’ ”
19 Karica Iemisa gaind mac mambopat, “Aukna iroa gaind ndamŋirina, Iudana meikramtaɨr wanaiŋnanda Raraŋ Aetaniac ndambuŋa uriraca taŋrenanmo, aia minmo iro ŋgoreaca kai aŋgɨca, na minmo makukara kai neaŋ teac. 20 RL 9.4, na NA 34.15-17, na TN 17.10-16, na 18.6-23, na 1 Ko 6.9, na 6.18, na 8.1, na Gal 5.19, na Epe 5.3, na Kol 3.5, na 1 Pi 4.3Aia minmo gainda mo te, anna laŋ, minmo timbiŋ rapar ianna tirca gaindopna, ne mɨrpembraraiŋta dawarta outta tɨkrena gɨmbamba morena amta reikca kai aŋgɨ teac, na meacramootna kaŋtertaapna tɨp kirara morena meikramtaɨrta tɨpemb kirarira kai mo teac, na orapaɨr paurna ŋgoaemma mina mana logotmo kaorikca ma menaceknanna, ainta ŋgoaemma ma racaindap maeacreke, ne ainta racaindta ŋgoaemma kai am teac. 21 Up 13.15Anna aia lamŋirena, atu ŋgoinna tɨkca kɨpca mandeacna mɨn, an auŋemb anik ndeida mina ramtaɨra, mina memetmbaca Mosesna Tɨp Wandɨkna kamma, mina memetmbaca Wɨktɨtɨkna Raia, mina Iudananta mimitpac aŋgɨrena kaikca mbukca mina memetmbaca mina an kam ndoprena.”
Mina Iudana meikramtaɨr wanaiŋnanda rɨpacrinanmo timbiŋ rapar ianna tirca neaŋga mataŋgat
22 Karica up aŋgɨrena ramtaɨrapa, mina outmbaica taŋrena ramtaɨr paŋaindapa, na an Iesusna rɨtɨpaikta meikramtaɨrta tumbunap, mina ndorimo aŋgɨra punica, mina kam leaca Iesusa rɨpacrena laiplacarmo outmbaica taŋrena ramootniŋmo larapacatna. Maniŋna iniŋa iannanna Iudas, na mana i ian toco Barsabas, na ianna ia Sailas. Mina maniŋmo Antiok auŋa mandaca Polapa Banambasap mbagɨrica mina mataŋgat. 23 Ri, an timbiŋ rapara mina maniŋna para tɨkatna timbiŋ raparna kamma mina gaindopatna,
“Aia up aŋgɨrena ramtaɨrapa ramtaɨr paŋaind, aia nena Iesusa rɨpacrena laiplacar, aia nenmo gan timbiŋ rapara tirca neaŋga kɨprinanna, aia nenmo Iudana meikramtaɨr wanaiŋnanda Iesusa rɨpacrenan, ne Antiok auŋ ndeacrenanapa, mon pitrik aniacniŋ Siriapa Silisia, maniŋna inik ndeacrena Iesusa rɨpacrena laiplacar, nenmo muruŋcamiŋa ra laŋ ŋgoin neaŋrina. 24 Up 15.1Na aia gaind mbaracrina, aina ramtaɨr ndeida nen ndambuŋ nakɨpca, mina mbopatna kambca ne anna waraca, ne anna moca makukuatnanna, aia minmo ainda mo nake mba mbopatke. 25 Mina nenmo ainda moatna kamma aia aind mbaraca, ainda moca aia ndorimo aŋgɨra punica anna kam ndopca taŋga, aina toŋgoca matŋirena ramootniŋ Banambasapa Polap mbagɨrica kɨprinanna, aia larapacrina ramootniŋmo maniŋap mbagɨrica kɨprina. 26 Up 13.50, na 14.19, na 1 Ko 15.30, na 2 Ko 11.23, na 11.26Na an ramootniŋ Polapa Banambas, maniŋa ndoniŋna tikniŋmo ŋgoreac aŋtaŋgɨnake rugutta mba mori, na maniŋa aina Kacoot Iesus Karaisna ina reikta nininia momoa, maniŋa reac ian nake, mba nanambirenan. 27 Ainda moca aia Iudasapa Sailasmo mbagɨrica kɨprina, maniŋa nenmo an timbiŋ raparna kamna kirara, maniŋa nenmo up mbuŋa mbopnande. 28 Mt 23.4Ŋeroŋ Ratta aiap eacreke, ainda moca aia kam leaca gaindopatna, aia nenmo kabena makukar ndeida mba mac moitndai. Aintik ne an ndorita eacrena kirara aind niŋgik ndeacraŋ. 29 TN 17.14, na Up 15.20, na 21.25, na KIEK 2.14, na 2.20Te, ne mina rɨŋga menaca ndorita mɨrpembraraiŋta dawarta outta tɨkrena gɨmbamba morena ŋgoaebca ne kai am teac, na orapaɨr paurna ŋgoaemma mina mana logotmo kaorikca ma menaceknanna, ainta ŋgoaemma ma racaindap maeacreke, ne ainta racaindta ŋgoaemma kai am teac, na ne meacramootna kaŋtertaapna tɨp kirara morena meikramtaɨrta tɨpemb kirarira kai mo teac. Na ne an tɨpemb tarica iukairaŋ te, anna laŋ. Na aina kamma an niŋgik, na ne ndorimo mataui raupŋi eac. An niŋgik. Ra laŋ.”
30 Karica an Iesusna rɨtɨpaikta meikramtaɨrta tumbuna an ramtaɨr paurmo mbagɨrica mina irikca Antiok auŋ ndaruca. An Antiok auŋna Iesusna rɨtɨpaikta meikramtaɨrta tumbunmo aŋgɨra punica, mina minmo an timbiŋ rapar aŋgɨra maneaŋgat. 31 Ri, mina an timbiŋ raparmo gootca watatna kamma, anna mina moi gagrana kam, mina anna watca toŋtoŋ bagaraniac ŋgoin. 32 Up 11.27, na 13.1, na 14.22Na Iudasapa Sailasa Raraŋ Aetaniacna rambca morena ramootniŋ, aintik maniŋa an Iesusa rɨpacrena laiplacarmo, mina rɨtɨpaikca moi gagarana kamb wɨt aniac mambopat, na maniŋ ainda mo te, mina rɨtɨpaikca moi gagarana moatna. 33-34 Karica maniŋa minapmo kɨdrɨk rocot motemma minap eaca maica, iŋmbaia mina maniŋap tɨkca mbiraca, maniŋmo mbagɨrica maniŋa kɨpatna meikramtaɨr tambuŋa nda mbagɨrica maniŋa mataŋgat. Ri, mina maniŋmo gaindopatna, “Oŋgo Raraŋ Aetaniacna opotaca laŋap taŋ.”*Landamŋina ramtaɨr ndeida gaind ndamŋirena, kabena kam tɨp ian toco maeacreke. Na an kamma gaindoprena, “Na Sailasa ndona iro ŋgetrikica ma Antiok auŋ aniac maeacri.” 35 Ri, Polapa Banambas mbaniŋa Antiok auŋ ndeacri, maniŋa ramtaɨr ndeidap tɨkca, mina meikramtaɨrmo Kacootna kamna mimitpac neaŋgatke, minmo Kacootna kam wembaŋ laŋna kamma an wiwitia mambopat.
Polapa Banambas maniŋa iro kabea mba eacri
36 Karica raeniŋ taŋga maiatke, anna iŋmbai mbuŋa, Pola Banambasmo gaindopatna, “Aŋga mac nda taŋca ndoniŋna Iesusa rɨpacrena laiplacara, mon auŋemb anik ndeacrenanmo oke watna, ŋgaua aŋga taŋga minmo Kacootna kam ndopatna Iesusa rɨpacrena laiplacarmo watna, mina laŋ ndeacre, co, wanaiŋ, anna garacna.” 37 Up 12.12, na 12.25, na Kol 4.10, na 2 Ti 4.11Ri, Banambasa ndomo Ion Makap aŋgɨca ndoniŋap taŋna ndopri. 38 Up 13.13, na Kol 4.10Ri, Pola gaindopca, “An ramoot, ma ŋgaua Pampilia pitrikca tɨkca, ma an aiŋa mo narica kariatna ramoot, aintik ma aŋgap mba taŋitndai.” 39 Aindopca maniŋa ndoniŋmo Ion Makna moca iptipuŋ aniaca moca ndoniŋmo titaca, ndamniŋ mataŋgat, Banambasa ŋgepca Ion Mak aŋgɨca maniŋa taŋga laŋgum aŋgɨca Saiprus mut mairikat. 40 Ri, Pola Sailas aŋgɨca, maniŋa taŋna mori, Iesusa rɨpacrena laiplacara maniŋmo aindopatna, “Kacootna kakadmaica oŋgap eacnandet.” Ri, maniŋ toco mataŋgat. 41 Ri, maniŋa ŋgepca taŋga Silisiaapa Siriana rɨkniŋna pitrikca mbukca, anna Iesusna rɨtɨpaikta meikramtaɨrta tumnambmo, Pola mina rɨtɨpaikca moa gagrari, paŋpaiŋica mataŋri.
15:1 TN 12.3, na In 7.22, na Gal 2.12, na 5.2, na Kol 2.11, na 2.16
15:2 Up 11.30, na Gal 2.1
15:4 Up 14.27
15:7 Up 10.1-43
15:8 1 Nin 28.9, na Up 1.24, na 2.4, na 10.44, na 11.15
15:9 Up 10.15, na 10.28, na 10.34-35, na Ro 10.11, na 1 Ko 1.2, na 1 Pi 1.22
15:10 Mt 11.30, na 23.4, na Lk 11.46, na Gal 3.10, na 5.1
15:11 Ro 3.24, na Gal 2.16, na Epe 2.5-8, na Ta 2.11
15:12 Up 14.27
15:13 Up 12.17, na Gal 2.9
15:14 Up 15.7-9
15:16 Emo 9.11-12
15:20 RL 9.4, na NA 34.15-17, na TN 17.10-16, na 18.6-23, na 1 Ko 6.9, na 6.18, na 8.1, na Gal 5.19, na Epe 5.3, na Kol 3.5, na 1 Pi 4.3
15:21 Up 13.15
15:24 Up 15.1
15:26 Up 13.50, na 14.19, na 1 Ko 15.30, na 2 Ko 11.23, na 11.26
15:28 Mt 23.4
15:29 TN 17.14, na Up 15.20, na 21.25, na KIEK 2.14, na 2.20
15:32 Up 11.27, na 13.1, na 14.22
*15:33-34 Landamŋina ramtaɨr ndeida gaind ndamŋirena, kabena kam tɨp ian toco maeacreke. Na an kamma gaindoprena, “Na Sailasa ndona iro ŋgetrikica ma Antiok auŋ aniac maeacri.”
15:37 Up 12.12, na 12.25, na Kol 4.10, na 2 Ti 4.11
15:38 Up 13.13, na Kol 4.10