6
Aia gagraca lambica eac te, Raraŋ Aetaniaca aimo moi laŋa monandet
1-2  Up 8.14-17, na 17.31-32, na 19.4-5, na Ro 2.16, na Pil 3.12-14, na Ib 5.12, na 9.14Ainda moca aia outta Karaisna aŋgɨatna riptiatna kam, niŋgik kai mɨkca eacraŋ teac. Na aia ainda moraŋ te, anna aia kacna wɨtapa garurmo kɨdrɨkar wɨtta mac tɨkrena kirar, na aia kac kika mba moreke. Ainda moca an mɨkna kammo kai mbopraŋ teac, na aia an iroar inkarmo ŋgetrikina kamb wɨtta kai mbopraŋ teac, memenacmo aŋgɨ taŋrenanmo uriracnan, na Raraŋ Aetaniacmo rɨpacrenan, na an tɨpemb kirarira eteacna wat kocortanmo muruŋa iŋ neaŋrenan, na ainta kɨtac puk aŋgɨrena tɨpemb kirarir toc, na parmo meikramtaɨr tambatta tɨkrena tɨpemb kirarirta kamb wɨtmo kai memetmbaca mbopraŋ teac. Na menacrina meikramtaɨra mac nda ŋgeŋgepna kambca kai mbop teac, na aia muruŋa Raraŋ Aetaniacna ritri waparacmo wɨtɨki gagra te, na ma aimo iarwarna eteacna watna kam ndopna, co, aia iarwarna opoik ŋgoreac aŋgɨna kamb topna. Na aia an kambta moca kai mɨkca eacraŋ teac, wanaiŋ. Aia an meikramtaɨra acnairina riptiar tiŋgikca aŋgɨraŋ. Na Raraŋ Aetaniaca aimo anna mona toŋgo te, aia ainda mo.
4-6  Mt 12.31, na Gal 3.2, na Epe 2.8, na Ib 10.26-27, na 10.29, na 10.32, na 1 Pi 2.3, na 2 Pi 2.20-21, na 1 Io 5.16Na ramtaɨr ndeida Raraŋ Aetaniacna kambmo mina lamŋirina. Na an reac laŋa tamuŋna auŋ ndiŋa kɨprenanna mina matowaiat. Na Ŋeroŋ Ratta mina maaŋgɨat. Na Raraŋ Aetaniacna kammo mina towairinan, na mina lamŋirenan, na kamma ma laŋ ŋgoin. Na Raraŋ Aetaniacna gargara mina maaŋgɨat, na an gargara ma kɨdrɨk laŋa iŋmbaia ma raek ndarunandet. Na ainta meikramtaɨra mina tɨpemb ŋgorikta moca irik te, na Raraŋ Aetaniacmo iŋ neaŋ te, mina nda kɨkɨpa iroar inkar ŋgetrikina taupemb kocor, wanaiŋ ŋgoin. Na ainta tɨpembta kirarira mina mo te, mina Raraŋ Aetaniacna Nuocmo, mina ndori koinda manmo ik mac aŋgɨa keracatna kirar. Na anna mina manmo ik mac keracrina kirar, te, meikramtaɨra manmo peperena kamb topraŋnande.
Na memetmbaca pukca rapacrenanna, pitrikca an pukmo muruŋa wɨŋrenan. Na an pitrikna waŋ ianna ma warɨŋna amna reac laiŋga an nambatmo moa gacrena, na ma meikramtaɨrmo otac te, Raraŋ Aetaniaca an pitrikmo laŋa monandet. RL 3.17-18Na pitrik waŋa ma lacarapna ŋgatɨkapa katgar ŋgorik tiŋgikmo mo gacraŋ te, anna pitrik waŋ ŋgoreac. Na kɨdrɨk rocotta wanaiŋ te, mina manmo ŋgocraina kam ndop te, taca manmo kocnai wɨrnandet.
Na aukna aikndamtaɨr koind, mandeaca aia nenmo gan kam gargar mambopek. Na aia lamŋirenan, ne an ŋgogocraia ne mba aŋgɨitndai. Ainda moca Raraŋ Aetaniaca nenmo mac nda aŋgɨatna, na ma nenmo reik laiŋ neaŋnandet. 10  Ro 15.25, na 2 Ko 8.4, na 1 Te 1.3, na 2 Te 1.6-7, na 2 Ti 1.18, na Ib 10.32-34Na Raraŋ Aetaniac ma tɨpemb kirarir wandoik laiŋ tiŋgikca morena. Na ne morina an aiŋir laiŋta moca ma nena iroar mba ndarekrekeitndai, wanaiŋ. Na ne manmo mamatŋia neaŋrinan, na anna ndo nenmo mo ŋgepca ne mana meikramtaɨrmo otacrenan. Na ne ainda moraŋnande. 11  Kol 2.2, na Ib 3.6, na 3.14Na aia toŋgorenanna, ne muruŋa an aiŋmo gagraca ainda moraŋ. Na nena rɨtɨpacmo utiŋ gagra, na Raraŋ Aetaniaca nemo larapaca aimo laŋa mo ndoprina mana rana mamamaina lambina. 12  Ib 10.36Ainda moca ne kai ŋate teac. Ne gidik ŋgoinna rɨpacrena meikramtaɨrta tɨpemb kirarira raŋgairaŋ, na ne kai ŋate teac. Aintik atua Raraŋ Aetaniaca ndona mombonikmo baburina reikmo, mina muruŋcamiŋa aŋgɨnandet.
Raraŋ Aetaniacna bababumo aia gagra rɨpacna
13  RL 22.16-17Na atu ŋgoinna Raraŋ Aetaniaca Abraammo bababua neaŋna morinanna. Ramoot ianna Raraŋ Aetaniacmo tamuŋmbaia wanaiŋ, na mamo mba kundri, te, Raraŋ Aetaniaca mana imo aca gidik tamuŋ ndopna. Ainda moca Raraŋ Aetaniaca gidik tamuŋmo ndona i mbuŋa gainda aca mboprinan, 14  RL 22.16-17“Na aku gidik ŋgoinna aindoprinan, aku umo matau ŋgoinna bubuocnandet, na una wiwitna mombonik ŋgamrirmo moca wɨt ŋgoin ndarunandet.” 15 Ri, Abraamma lambica ma mba tawia ŋateatke, na Raraŋ Aetaniaca baburina reikca ma Abraamma neaŋ ndoprinanna, iŋmbaia Abraamma an reikmo muruŋcamiŋ maaŋgɨat.
16  NA 22.10-11Na gidik tamuŋa ndoprena kirara gaind. Ramtaɨra gidik tamuŋna kammo ramoot ianna i mbuŋ ndop te, anna gainda wandacrenan, an ramootta ma minmo tamuŋmbai, na ma minmo kundrina. Na ramoot ianna gidik tamuŋ ndop te, anna mana kammo mo gagrarina. Na kabena meikramtaɨra mana kammo nda mbopna toawanaiŋ, ma mina upmo maleacri. 17  Ro 11.29, na Ib 11.9Na atua Raraŋ Aetaniaca babuatnanna, aia Abraamna wiwitnanmo, ma aimo matau ŋgoinna laŋa moraŋnandet. Na ma aimo wandoŋ ŋgoinna gainda wandacna morenan, ma ndona iroa mba ŋgetrikitndai, aintik ma gidik tamuŋ ndop te, ma ndona kammo mo gagrarinan. 18  Ndu 23.19, na 1 Sml 15.29, na Ib 12.1Ainda moca mandeaca kam mbuniŋa maeacreke, na ianna anna Raraŋ Aetaniacna bababu, na ianna anna kam gidik tamuŋ. Na maniŋa mba ŋgetrikitndai, na an kam mbuŋa Raraŋ Aetaniaca ma mba paruitndai. Ainda moca aia meikramtaɨra kɨpcarica taŋga Raraŋ Aetaniac ndambuŋna iŋgorocrenanna, aia mana babuca lamŋiraŋ, na aina iroar inkara moi gagraca ma aimo babuatna an reik aŋgɨnanna lambina. 19  TN 16.2-3, na 16.12, na 16.15, na Ib 9.7Na an reaca ma aimo lambina mboprinanna, anna ma aimo laŋgum ŋgutiŋna aŋga gargarna kirar, ma aina eteacna watta utiŋ gagranan. Na an laŋgum utiŋna aŋga, ma Raraŋ Aetaniacna Kaca loraca eacrena raraŋit aniacna iŋmbaina Diab Rat Ŋgoinna mbukrena. 20  TN 16.2-3, na 16.12-15, na Ŋap 110.4, na Ib 3.1, na 5.6, na 5.10, na 7.17, na 8.1, na 9.24Na Iesusa ma aimo otacna moca ma an Raraŋ Aetaniacna Diab Rat Ŋgoinna inikmo aimo out ŋgoinna mbukrinan. An kɨdrɨkca ma Melkisedek tocna taup ndamoot paŋan aniac ndarurinan, na ma iarwarna taup ndamoot paŋan ndeacraŋnandet.

6:1-2 Up 8.14-17, na 17.31-32, na 19.4-5, na Ro 2.16, na Pil 3.12-14, na Ib 5.12, na 9.14

6:4-6 Mt 12.31, na Gal 3.2, na Epe 2.8, na Ib 10.26-27, na 10.29, na 10.32, na 1 Pi 2.3, na 2 Pi 2.20-21, na 1 Io 5.16

6:8 RL 3.17-18

6:10 Ro 15.25, na 2 Ko 8.4, na 1 Te 1.3, na 2 Te 1.6-7, na 2 Ti 1.18, na Ib 10.32-34

6:11 Kol 2.2, na Ib 3.6, na 3.14

6:12 Ib 10.36

6:13 RL 22.16-17

6:14 RL 22.16-17

6:16 NA 22.10-11

6:17 Ro 11.29, na Ib 11.9

6:18 Ndu 23.19, na 1 Sml 15.29, na Ib 12.1

6:19 TN 16.2-3, na 16.12, na 16.15, na Ib 9.7

6:20 TN 16.2-3, na 16.12-15, na Ŋap 110.4, na Ib 3.1, na 5.6, na 5.10, na 7.17, na 8.1, na 9.24