4
Iwa ta wit megiye ipo mau al pup to wori
(Matyu 13.1-9 ne, Luk 8.4-8)
Jisas nu erim Galili djeke molo una moi al kandja dje awo moi. Una merke wo molmaka dumo sill dje keri. Ge pille, Jisas kanu ta pai al pakna po er nu erim al po ami dje moika, una wo manda moi. Molmaka Jisas kandja buko merke dje una awo embe dji, ye pillme! Iwa ta er mauye al po wit megiye i pup to woro pi. Megiye pende ge kondwe al toika ka wo no keri. Pende yage makimb ku moi al toika, makimb merke namoi pille ola dje gup woi. Ba djimbe kal makimb al nawori, olpa pla woika ola dje do sege yeika, gorowill golo er kal pi. Megiye pende yage ka kagle moi al pakna toika, gup ye pla woi ba, ka kagle tublo i kal worika, megiye natoi. Ba megiye pende yage makimb wopake yei al toika, megiye merke toi. Pende 30 toika, pende 60 toika, pende 100 toika embe yei. Na kandja djindo ge ye kamalne paro una pillme! dji.
Jisas nomane pai mal pille kandja buko dji
(Matyu 13.10-17 ne, Luk 8.9-10)
10 Are Jisas yene moika yene kogoye una ne, aike wani una wo embe dji, ni kandja buko djinden ge me no dje awe! dji. 11 Jisas embe dje awi, God dumoye wopake kandja seke paro ge God ye dje awi. Ba una orko mor ge na kandja buko dje aundo. 12 Ge pille una kanne ba kanpol natane. Piye ba pillpol natane. Ge pille ga nomane ake nataneke, singare ke yenj ge God kere naunda we dji.
Iwa ta wit megiye pup to wori mal me ge embe paro
(Matyu 13.18-23 ne, Luk 8.11-15)
13 Jisas kandja embe dje kogoye una awi, na kandja buko djill ge ye me napi paro. Na kandja buko porapora djindo ge ye namba mal pille ine? 14 Una ta wal yai ge God kandjiye yai. 15 Wit megiye yage kondwe toi ge me embe mal paro. God kandjiye una tukne al yai ge, Satan wo iworika, pille imbon dje yei ge, man pai. 16 Megiye yage ku moi al toi ge me embe mal paro. Una God kandjiye wopake pille ola dje i ba, 17 kandja ge djimbe nawori. Yepall ke ta moika una wo God kandjiye kamblo kal wormaka imb woika ola dje keri. 18 Megiye yage ka kagle moi al toi ge me embe mal pai. Una God kandjiye pi ba, 19 makimb wal nomane merke paika, dje mogoi pille we ye, wal merke kannambon dje pille, God kandjiye yale pagi ge to bi dje keri, megiye natoi. 20 Ba alla, megiye yage makimb wopake yei al toi ge me embe mal pai. Una nomane wopake paika, God kandjiye pille i pille, God kandjiye yai ge megiye toi. Pende 30 toika, pende 60 toika, pende 100 toika embe yei we dji.
Wamo lambo gaye mal pille kandja buko dji
21 Jisas embe dji, una wamo lambo gale ipo baket paknato napagye, man. Ipo bo mename al napagye eri. Una wamo lambo gale ipo bo al plato woro yene ge, kune yenda. 22 Wal seke paro ge alla er pene wonda, wal una nakaninj ge alla kanne we dji. 23 Na kandja djindo ge ye kamalne paro una pillme! dji.
24-25 Jisas embe dji, na kandja djindo ge ye pillpol tane. Una pille imbon dje yei dal, kandja merke piye. Ba una embe nayei dal, God kandjiye kembis ta piye ge alla i worda we dji.
Jisas iko bolo pla woi mal kandja buko dji
26 God dumoye wopake kantau yendo ge embe mal yendo. Iwa ta wal megiye worda. 27 Imina ou pa, armina po kogo ye wanda ba, wal megiye bolo er pla wondo mal ge une kanpol natondo. 28 Makimb yene kogo yendaka iko megiye bolo er pla wondaka, yeke kembis tondaka, kupiye tondaka are megiye tondo. 29 Megiye bo tondaka, una djekapill ipo kelip to i nonj we dji.
Jisas iko mastet megiye tondo pille kandja buko dji
(Matyu 13.31-32 ne, Luk 13.18-19)
30 Jisas embe dji, God dumoye wopake kantau yendo ge namba mal yendo? Na kandja su ye namba we djino? 31 God dumoye wopake yero ge embe mal yero. Iko megiye pende moro mal mastet embe naparo, kembis ke kaima paraka una ipo makimb al yar. 32 Mastet megiye yar ge bolo wor kerman kaima pundaka wal porapora mau al yar ge kamblo aundo. Ole to wo kerman pundaka bi yenda al ge ka wo numbine take moye we dji.
Jisas kandja buko eri dje awo moi
(Matyu 13.34-35)
33 Jisas kandja buko merke embe mal dji ge una yenekne pille ine mal dje awi. 34 Yene kandja dji ge kandja kiwa ta nadji, kandja buko eri dji. Ba are yene kogoye una boll moi ge, une kandja me ge dje pene woro awi.
Jisas kandja djika kamkopo nawoi
(Matyu 8.23-27 ne, Luk 8.22-25)
35 Taman pika Jisas yene kogoye una moi al kandja dje embe dji, nono er nu erim konato bone! dji. 36 Djika una merke moi ge kambono kere kanu ta pai al ge, Jisas po ami dje moika ga pakna pumaka er pi. I er pumaka kanu pende ga kambono pi al ge are pi. 37 Po molmaka kamkopo kerman woika, nu olup ye po wo yeika, nu er kanu paknato po puka to moika, 38 Jisas kanu mopiyeto ngambale kumbengil ye pagle ou pamoi.
Pa moika kogoye una po to mage embe dji, tisa, nono gopon manda yendo, ni napren mo? 39 Djimaka Jisas aglo molo kamkopo ne, nu boll aike man dje embe dji, ye olup alla nayese! dji. Embe djika kamkopo ne, nu olup kaima ta nayepill. 40 Jisas kandja embe dje kogoye una awi, ye namba yei pille kand gor? Ye pillgi napai paro we dji. 41 Ga kand kerman goi, yenekne kandja dje pille embe dji, une ge namba mal molo kamkopo ne, nu kandja djindo mal pirmell ne? dji.