4
Fhe Bakɨmen gumgi gu mbigi, mbe Fhe Bakɨmen vhuksu ndirga.
1 Hi 12.15Fhe Bakɨme vhɨra nza ndigip, won vhuksurur nzan nɨɨn za suaŋgi. Maaŋ muuŋgiap, nza guigira rɨvɨri. Nza muuŋv kɨrim, Fhe Bakɨme nza the ganɨrim, nza ana suaŋgi vhuksurur ndigirga tuktɨgi fhuvara. 2 Nza Isreriŋ fhum Fhe Bakɨme vhuksuru buna vhuueŋ mbararagi tɨvara muuŋgiap nza Zisas buna vhuueŋ mbararagi. Mbe fhura ne mbararagiap, mbe Fhe Bakɨmen buneŋ khothɨgi fhu. Maaŋ muuŋgiap, mbe mba mbararagi buna vhuueŋ, ne mben kurigi fhuvara.
3 Sng 95.11; Hi 3.11; 3.14Nza Fhe Bakɨme khothɨgi gumgi gu mbigi, ana nza khɨrarim, nza ana vhuksu ndigirga. Fhe Bakɨme fhum mba vhuksu ga ndɨrgap, ana khaŋ suaŋgi,
 
“Maaŋ muuŋgiap, gu ndav shigap kama havharar khaŋ suaŋgi, ‘Guigi guarara mbe gu suaŋgi nuianan ŋgɨgɨp vhuksuegɨrga tuktɨgi fhuvara.’ ”
 
Khueŋ guigi guarara, kha kameŋ ne fhum Moses kegi tugen hɨgi. Nza kaŋgi, fhum guarara Fhe Bakɨme kha nuiana muuŋgi, ana za won ŋaari ga muuŋgim, nta thugi. aMba Isreriŋ, mbe Idzɨp thagi tugen, Fhe Bakɨme khueŋ vuzvugi ana Moses gu Zosua mben kuv ŋgɨp, Kenan nuianan ŋgɨgɨrga. Mbe mba nuianen, kɨv vhuksurga nuianeŋ ma. Kha gap Hibru khergi guma, ana khuen ndi khɨvɨrgane vuzvugi. Fhe Bakɨme, ana harigi vhuksur ŋgu ki. Mba ŋgu Heven ma. Ana anan vhuksu ŋgu guar ma. Ana mba guigira ana khothɨgi gumgi gu mbigi, ana mbe ganɨrim, mbe mba ŋgun vhen ŋgirɨrga. 4 Stt 2.2; Kis 20.11; 31.17Fhe Bakɨme buni vhuuiŋ ki gavar ŋana muen, ana harathɨgi raa ga nzuai. Mba kameŋ khaŋ nzuai, “Fhe Bakɨme harathɨgi raar, ana wo muuŋgi ŋaari garim, nta za vhɨzgim, ana mba harathɨgi raar, ana vhuksuegi.” 5 Sng 95.11Nza mba fhara gangi kameŋ khaŋ nzuai, “Mbe gu suaŋgi nuianan ŋgɨgɨp, vhuksuegɨrga tuktɨgi fhuvara.” 6 Mbe Fhe Bakɨme vhuksurur vhuuŋ mbararagiap, mbe ne daaŋgia mbur khɨngiap, mbe mba nuianan vegi fhu. Mba kameŋ khuen nza khɨvigi, Fhe Bakɨme vhuksurur, ana mbara muuŋgiap khar kim, gumgi gu mbigi thari, mbe ana ndigirga. 7 Sng 95.7-8Fhe Bakɨme mpari vhɨrve vov vhɨzgim, ana wom harigi tuga mbe sarigi. Ana mba tuga sarav khaŋ nzuai, “Ntigera!” Ana wo bunin Devit ga suaŋgim, ana nta bun nzuai, ana ntigem mba fhum suaŋgi kameŋra suaŋgi, “Nde ntigem Fhe Bakɨme kamthooŋ mbarararga, nde wari won ndavi havharɨ thari.”
8 Lo 31.7; Jos 22.4Fhum Zosua vhuksuru mbe nɨɨŋgia kake, Fhe Bakɨme maaŋ muuŋgiap harigi tuga the sɨɨŋ thae. 9 Maaŋ muuŋgiap, nza kaŋgi, Fhe Bakɨmen gumgi gu mbigi mben vhuksurur tuga mbe, mben rargap khar ki. Mba vhuksuru, ana Fhe Bakɨme Sabatar vhuksura fara muuŋgi. 10 Stt 2.2; Hi 4.4Ana Fhe Bakɨme fhum won ŋaari vhɨzgiap vhuksuegi tɨva muuŋgi. Maaŋ muuŋgiap, nza kaŋgi, guma, ana Fhe Bakɨmen vhuksuru ndigirga, ana won ŋaari vhɨzgiap, ana vhuksui. 11 Hi 3.12; 3.18-19Nza ne nzuav khaŋ tɨgɨp ŋkasŋkagip, ŋgarɨv, nza ana vhuksuru ndigirga. Nza muuŋv kɨv, nza the mbe fhum gumgi ki fhuv ŋanen kav bigi kaadogi tɨvi zɨn ŋgɨgɨrga. Ana maaŋ muunga, ana rɨgɨp, za fhɨrgi rɨgɨrga.
12 Ais 49.2; Jer 23.29; Zo 12.48; 1 Ko 14.24-25; Ef 6.17; VB 1.16; 19.15Fhe Bakɨme buni vhuuiŋ, nta mbara muuŋgiap ki bɨɨŋbɨɨŋ ki. Nta mbara muuŋgiap ŋkasŋkagiap, ŋgarav khar ki. Ana buni vhuuiŋ, nta guigira bɨrgiap, bɨrtɨk ndereni vhɨra ki kos kambarigi. Nta guigira mba guma dav ana vhen ŋgirgɨrga. Nta guigira ŋgirɨp, ana vhen ki guma gum, anan tum ki ŋaneŋ daa sharav, ŋgɨp, ana hari gu bigi wari suigi ŋkɨriiŋ gum, ana vhumun ki ŋaneŋ, nta vhɨra ne daa sharav ŋgirgɨrga. Maaŋ muuŋgiap, nta guigira nzan ndavi vherir ki ndɨkndɨgi gum nzan vuzvugi, nta guigira ntan nza khɨvi, nta nzerigi, o fhu. 13 Jop 26.6; Sng 33.13-14; 90.8; Snd 15.11Fhe Bakɨme muuŋgi bigɨn the, ana nɨman zorgɨrga tuktɨgi fhuvara. Kha bigi za ntarav, ana nɨman za kɨrara ki. Nza nduarira wari wo muuŋgi tɨvi bun Fhe Bakɨme suanga.
Zisas Hevenan kav, Fhe Bakɨme suaŋgi kaman kameŋ zɨn vov, ana Fhe Bakɨme rotu gari guman pan ki.
Zisas nzan Fhe Bakɨmen rotu gari guman pan ma.
14 Hi 3.1; 7.26; 10.23Nza Fhe Bakɨme rotu gari guman pan vhari ki. Ana guigira ndav vov, Hevenan ndagi. Ana Zisas, ana Fhe Bakɨmen Kam. Maaŋ muuŋgiap, nza ana khothɨgap, ne bun nzuai ndɨkndɨk, nza ana suira havhargirga. 15 2 Ko 5.21; Hi 2.17; 7.26; 1 Pi 2.22; 1 Zo 3.5Nza nduarira wari wo mbui tɨvi mbatɨgi mbevɨrga ŋkasŋka ki fhuvara. Nza vhɨra khueŋ ndɨkndɨgɨ thari. Mba Fhe Bakɨme rotu gari guman pan nza kora mbui fhu. Fhuvara. Mba za nzan hi mparmparei, nta za anan mparav, za anan hegi. Ana nta khɨga rɨgap tɨva mbatɨga thueŋ muuŋgi fhu. 16 Ef 2.18; 3.12; Hi 10.19-22Maaŋ muuŋgiap, nza nera nzuav Fhe Bakɨme han ŋgɨrga, nza rivɨrga fhu. Ana fhura nza kora mbui guma ma. Nza ana han ŋgɨp ana ganɨnga, ana nzan korar muunga. Nza maaŋ muuŋgip simtɨk kɨrga tugar, anan korar muumbar nzan kurarga.

4:1 Hi 12.15

4:3 Sng 95.11; Hi 3.11; 3.14

a4:3 Mba Isreriŋ, mbe Idzɨp thagi tugen, Fhe Bakɨme khueŋ vuzvugi ana Moses gu Zosua mben kuv ŋgɨp, Kenan nuianan ŋgɨgɨrga. Mbe mba nuianen, kɨv vhuksurga nuianeŋ ma. Kha gap Hibru khergi guma, ana khuen ndi khɨvɨrgane vuzvugi. Fhe Bakɨme, ana harigi vhuksur ŋgu ki. Mba ŋgu Heven ma. Ana anan vhuksu ŋgu guar ma. Ana mba guigira ana khothɨgi gumgi gu mbigi, ana mbe ganɨrim, mbe mba ŋgun vhen ŋgirɨrga.

4:4 Stt 2.2; Kis 20.11; 31.17

4:5 Sng 95.11

4:7 Sng 95.7-8

4:8 Lo 31.7; Jos 22.4

4:10 Stt 2.2; Hi 4.4

4:11 Hi 3.12; 3.18-19

4:12 Ais 49.2; Jer 23.29; Zo 12.48; 1 Ko 14.24-25; Ef 6.17; VB 1.16; 19.15

4:13 Jop 26.6; Sng 33.13-14; 90.8; Snd 15.11

4:14 Hi 3.1; 7.26; 10.23

4:15 2 Ko 5.21; Hi 2.17; 7.26; 1 Pi 2.22; 1 Zo 3.5

4:16 Ef 2.18; 3.12; Hi 10.19-22

© 2001 PBT