1 Mt 20.19; Mk 15.15; Ru 18.33Pairat mbaram nzuaim, mbe Zisas ndigap kankani ki phivɨgar ana khari. 2 Ru 23.11Mbe ana kharav, mben gɨɨtɨvi tari ki karɨga ndigap, ana ŋgui vhɨrve gari guman pan fi khorsɨga fara muuŋgi khorsɨga muuŋgiap, ana anan panan fagi. Mbe mba khorar ana fav, shaa hɨva mpeeŋ ndigap, ana sharigi. 3 Zo 18.22Mbe maaŋ ana muuŋgiap, thiva ana han zav khaŋ ana nzuai, “Raar vhuuŋ, Zudaiŋ ŋgui vhɨrve gari guman pan.” Mbe maaŋ ana nzuav ana kurani pogi.

4 Zo 18.38; 19.6Pairat mbara taagia kɨrar hɨgap khaŋ mba gumgi ga nzuai, “Nde ganɨ, gu taagi Zisas ndigi kɨrar hɨrga, nde kaŋgirga, gu ana muuŋgi tɨva mbatɨk thueŋ gangi fhu.” 5 Ana ne suaŋgim, Zisas mbara kɨrar hi. Mbe mba tari ki karɨgar muuŋgi khorsɨk mbara muuŋgiap ana panan fav ki. Mbe mba ana sharigi shaar hɨva mpeeŋ vhɨra mbara muuŋgiap ki. Pairat mbara khaŋ mbe nzuai, “Nde ganɨ, mba gumara khare.”

6 Zo 18.31; FG 3.13Mba Fhe Bakɨmen rotu gari gumgir pani gum mben gɨɨtɨvi ana garav kaav khaŋ nzuai, “Ana ndim khanarareŋ ga tɨgɨ fugu. Ana ndim khanarareŋ ga tɨgɨ fugu!” Pairat mbara khaŋ mbe nzuai, “Nde nduarira ana ndigi ŋgɨp, khanarareŋ ga tɨgɨ fuguri. Gu ana muuŋgi tɨva mbatɨk thueŋ gangi fhu.” 7 Wkp 24.16; Mt 26.65; Zo 5.18Mbe Zudaiŋ ana kameŋ ŋgarkarav khaŋ nzuai, “Nza tɨva mueŋ ki, mba tɨveŋ khaŋ nzuai, mba guma ana rɨmɨnga. Ne khaŋ muuŋgi, ana khaŋ nzuai, ‘Gu Fhe Bakɨmen Kam ma.’ ”

8 Pairat mba kameŋ mbararagiap ana guigira rivgi. 9 Ais 53.7; Mt 26.62-63; 27.12-14; Ru 23.9Ana mbara taagia ŋgui vhɨrve gari guman pana phen vhen vera kha nzambaren Zisas ga muuŋgi, “Ndu maaŋgi ŋgu guma?” Zisas buna thuen ana fagi fhuvara. 10 Pairat mbara khaŋ ana nzuai, “Ee, ndu ram muuŋgi? Ndu na buni ŋgarkav ragire? Gu ndu fhɨrgirim, ndu ŋgɨrga ŋkasŋka ki. Gu vhɨra ndu ndi khanarareŋ ga tɨgɨ fukfugɨrga ŋkasŋka ki. Ee, ndu ne kaŋgi fhuv thi?”

11 Ru 22.53; Zo 7.30; 10.18; FG 2.23; Ro 13.1Zisas mbara ana ŋgarkarav khaŋ nzuai, “Maaŋ muuŋgip, kha vun ki Fhe Bakɨme, ana ŋkasŋkar ndun nɨɨŋgirga fhu, ndu na mbevarga ŋkasŋka kegɨrga tuktɨgi fhu. Maaŋ muuŋgiap, nan ndu farve khɨngi guma, ana muuŋgi tɨva mbatɨgeŋ ndu muuŋgi tɨva mbatɨgeŋ kambarav guigira kɨvgi.” 12 Ru 23.2; FG 17.7Pairat mba kameŋ mbararagiap, ana Zisas fhɨrgirim, ana ŋgɨrga tuavi ndi gari. Mbe Zudaiŋ, mbe kaav khaŋ nzuai, “Ndu mba guma fhɨrgirim, ana ŋgɨgɨrga, ndu Romin guman pan Sisar kɨvntok fhuvara. Mba nduara khaŋ wo nzuai guma. ‘Gu ŋgui vhɨrve gari guman pan ma,’ ana Sisar pana guma ma.”

13 Pairat mba kameŋ mbararagiap, mbara Zisas kov kɨrar hɨgi. Ana kɨrar hɨgap, gumgi ga nzuav nzuai guman pan pigi mpirmpirɨga peregi. Mba ŋaneŋ, mbe kha zitɨr ne ga mbui, “Kɨman vundap”. (Mbe Hibruiŋ kaman kha zitɨr ana mbui, “Gabata.”) 14 Mt 27.62Mba raan mbe Pasova tuga bakɨme ndɨkndɨgap mba bevahi tuk ma. Mba raan ra vov phɨɨŋ ndi. Pairat mbaram khaŋ mba Zudaiŋ ga nzuai, “Nde wari wo ŋgui vhɨrve gari guman pana ganɨ.” 15 Mbe kaav khaŋ nzuai, “Ana vharari ana ŋgɨ! Ana vharari ana ŋgɨ! Ana ndi khanarareŋ ga tɨgɨ fugu!” Pairat mbara mben nzarigi, “Nde vuzvugi, gu nden ŋgui vhɨrve gari guman pana ndi khanarareŋ ga tɨgɨp fukfugɨrie?” Mba Fhe Bakɨme rotu gari gumgir pani ana ŋgarkarav khaŋ nzuai, “Nza harigi ŋgui vhɨrve gari guman pana the ki fhuvara. Sisar nduara!” 16 Mt 27.26; 27.31; Mk 15.15; Ru 23.24Mbe maaŋ nzuaim, Pairat Zisas ndim, mba gɨɨtɨvi farve khɨngim, mbe ana ndim khanarareŋ ga tɨgɨp fukfugɨrga.

17 Mt 27.31-33; Mk 15.21-22; Ru 23.26; 23.33Mba gɨɨtɨvi mbara Zisas ndiga vui. Ana nduara won khanarareŋ phufhura vui. Mbe ana ndiga vov, mba Zerusarem ŋgu bakɨme thav vov, mbe kha zɨn rɨgi ŋanen hɨgi, “Panan Tuam.” Mbe Hibruiŋ kaman kha zɨn mba ŋanen kaai, “Gorgota.” 18 Mbe mba ŋanen ana ndim khanarareŋ ga ntorgi. Mbe ana ndi ntorgap, mbe vhɨra harigi guma phuni, mbe vhɨra mani ndi ntorgi. Mbe mbe ndi ana gaar mueŋ ga ntorgap, mbe mbe ndi mueŋ ga ntorgi. Zisas, ana manin rɨganera ntorgi.

19 Mt 27.37; Mk 15.26; Ru 23.38Pairat vhɨra mbe nzuaim, mbe kama mueŋ khergiap, Zisasan khanarareŋ ga ntorgi. Mba kameŋ khaŋ nzuai, “Zisas Nasaret guma, Zudain ŋgui vhɨrve gari guman pan.” 20 Pairat mbe nzuaim, mbe Hibruin kaman mba kameŋ kherav, Romiŋ kaman ne kherav, vhɨra Grikiŋ kaman ne khergi. Mbe Zisas ndi khanarareŋ ga ntorgi ŋaneŋ, ne ŋgu bakɨme hara ki. Maaŋ muuŋgiap, mbe Zudaiŋ vhɨrve, mbe vov zav mba kameŋ gari. 21 Maaŋ muuŋgiap, mba Fhe Bakɨme rotu gari gumgir pani khaŋ Pairat ga nzuai, “Ndu khaŋ muuŋgi kherɨ thari, ‘Zudaiŋ ŋgui vhɨrve gari guman pan.’ Fhuvara! Ndu khaŋ muuŋgi kameŋ khergiri, ‘Kha guma khaŋ suaŋgi, gu Zudaiŋ ŋgui vhɨrve gari guman pan ma.’ ”

22 Pairat mben kameŋ ŋgarkarav khaŋ nzuai, “Gu khergi kameŋ, ne ki.” 23 Mt 27.35; Mk 15.24; Ru 23.34Mben gɨɨtɨvi, Zisas ndi khanarareŋ ga ntorgap, ana shagi, mbe nta ndigap, nta shɨgap fethɨgi phogi ga suegi. Mba gɨɨtɨvi, mbe zam bueŋbueŋra ndigi. Mbe vhɨra ana fhava sharige ndigi. Mba gɨɨtɨvi ana ndigap garav, mbe shagi fɨgi vhɨrve ndigap, wari tɨgap mba fhava shaage samgi fhuvara. Mbe shaa bavira ana muuŋgiap, ana samgi fhuvara. 24 Sng 22.18Maaŋ muuŋgiap, mba gɨɨtɨvi khaŋ nzuai, “Nza kha fhava sharige shɨgɨrga fhuvara. Nza ana suaŋv satu sunuv ganɨnga, the ana ndigirie?” Mbe ana ndir zav ana nzuav maaŋ muuŋgi. Mbe ana nzua muuŋgi tɨv, mbe fhum ana nzuav khergi kama mueŋ ne Fhe Bakɨme buni vhuuiŋ ki gavar ki. Mba tɨv, ana mba kameŋra zɨn vugi. Mba kameŋ khaŋ muuŋgi, “Mbe nan shagi, mbe nta shama mbuav nta ndigi. Mbe na fhava sharige ndir zav, niŋge nzuav satu surav, guma mbe niŋge ndigi.” Mba gɨɨtɨvi, mbe mba tɨvara muuŋgi.

25 Mt 27.55-56; Mk 15.40; Ru 23.49; 24.18Zisasan niamuuŋ, won mbiga hɨrɨɨn, Maria Kropas muuŋ gum, Maria Makdaran mbik, mbe mba mbigi mbe wari tɨgap, Zisas ntorgi khanarareŋ hara thivgiap ki. 26 Zo 2.4; 13.23; 21.7; 21.20Zisas won niamuuŋ garav, ana wo phorga ruigi guma, ana guigira ana vuzvugi, ana mani garim, mani ana hara thɨgap ki. Zisas mbara khaŋ won niamuuŋ ga nzuai, “Mbik, mba guma, ana ndun kam ma.” 27 Ana khaŋ mba wo phorga ruigi guma, ana guigira won ndavar nɨɨŋgi, ana khaŋ ana nzuai, “Mba mbik, ana ndun niamuuŋ ma.” Ana maaŋ suaŋgim, mba tugera, mba phorga ruigi guma Maria kov wo phenan vugap, ana garim, ana anan han ki.

28 Sng 22.15; 69.21Zisas kaŋgi, ana mba muun za zergi ŋaari za vhɨzgi. Ana mbara khaŋ nzuai, “Fhɨr na khigi.” Ana mba suaŋgi kameŋ, ne mba Fhe Bakɨme buni vhuuiŋ ki gavar ki kama mueŋra zɨn vugi. 29 Mt 27.48Ana maaŋ nzuaim, mbe ana mbararagiap, pɨksɨgi wain nda khɨgap maaŋ ndarav kim, mbe spans fɨga mueŋ ndigap waina rugi. Mba spans fɨgeŋ wain ne givigim, mbe ne ndiv, hisop ŋgaa phokegap, ana ndiv Zisas kamthooŋ phɨrgi. 30 Zo 17.4Zisas mba waina mbegap khaŋ nzuai, “Ntige vhɨzgi.” Ana ne suaŋgiap, mbara bur huazgia ntorgap, gor vhɨk ŋgɨrgi.

31 Lo 21.22-23; Mk 15.42; Zo 19.42Mba raar, mbe Sabat bigi bevahi ra ma. Mba Pasova Sabat, ana guigira tuga bakɨme ma. Maaŋ muuŋgiap, mbe Zudaiŋ gumgir pani, mbe mba gumgir ŋkuu, mba khirarareiŋ ga tuigɨ kɨrgeŋ thagi. Mbe maaŋ muuŋgirga, mbe mba khirarareiŋ ga tuigi gumgi suira shogɨv nta phɨrɨ sur zav Pairat ga nzuai. Mbe maaŋ mben muunga, mbe vhemkora vhɨzgirga, mbe mbe ndigi ŋgegɨrga. 32 Maaŋ muuŋgiap, mba gɨɨtɨvi vov, mbe mba Zisas phorga khanarareŋ ga ntorgi gumani, mbe mani suani shogap, ni phɨra suegi. 33 Mbe maaŋ Zisasan muun za zav, ana gari ana rimgi. Mbe maaŋ muuŋgiap ana suani shogap, ni phɨrgi fhuvara. 34 1 Zo 5.6-8Mba gɨmatɨva mbe zav fugar Zisas kuvsɨgeŋ dagi. Ana ana dagim, vɨzɨn gu mbɨ vhemkora sia suagi. 35 Zo 21.24Mba vɨzɨn gu mbɨ gangi guma, ana mba gangi bigi, ana za nta bun suaŋgi. Ana mba suaŋgi buni, nta guigira. Ana vhɨra nduara kaŋgi, ana guigira buni guarira bun nzuai. Ana ne bun nzuai, nde vhɨra ne khothɨgɨri. 36 Kis 12.46; Nam 9.12; Sng 34.20Mba hegi bigi, nta Fhe Bakɨme buni vhuuiŋ ki gavar ki buna mueŋ suaŋgi kama mueŋ mɨnan hɨgi. Mba kameŋ khaŋ nzuai, “Mbe ana hara the phɨrgirga tuktɨgi fhuvara.” 37 Sng 22.16-17; Sek 12.10; VB 1.7Fhe Bakɨme buni vhuuiŋ ki gavar ki buna mueŋ khare, “Mbe mba dagi guma, mbe ana ganɨnga.”

38 Mt 27.57; Mk 15.42; Ru 23.50; Zo 7.13; 9.22Mba raar ra verav vhɨzim, Arimatea guma Zosep vov Pairatan nzai, ana ana khɨrarim, ana Zisas khuma ndigɨ ŋgɨrga. Zosep ana Zisas khothɨgap ana zɨn vui guma mbe ma. Ana Zudain gumgir panin rivgiap, ana wo vhagiap ki. Ana Pairatan nzarigim, ana ana khɨrigim, ana Zisas khuma ndigi. 39 Zo 3.1-2; 7.50Nikodemus, ana mba fhum maaŋ zav Zisas gangi, ana vhɨra zi. Ana mbe kha phunin nanani ndigap wani digap muuŋgi ndɨga vhuuŋ hi mporiiŋ, ana ana ndiga zi. Mba mporiin simtɨk 30 kirogram thɨgi. 40 FG 5.6Zosep gum Nikodemus Zisas khuma ndiga vov, mba mporiin ana khuma hɨvgiap, shagi vhuuiŋra ndigap, ana khuma zigi. Mbe Zudaiŋ, mbe rimgi guman khum, mbe mba tɨvar ana mbui. Mani mba tɨvar ana muuŋgi.

41 Mba ntari ga mbui gɨɨtɨvi Zisas ndi khanarareŋ ga ntorgi ŋaneŋ han, mɨna mbe ki. Mba mɨnan, mbe kɨma thoon muuŋgi mboga kama mbe ki. Mbe fhum guma the ndi mba mboga tɨgi fhuvara. 42 Ais 53.9; Zo 19.31Mbe Zudaiŋ, mbe Sabat bigi bevahɨrga tuk ma. Mba mbok ana hara kim, maaŋ muuŋgiap, mani Zisas khuma ndiga vov mba mbok ga tɨgi.