16
Zisas rimgia taagia khavgi.
Matiu 28.1-8; Ruk 24.1-12; Zon 20.1-10
1 Sabat ra vhɨzgim, Makdara mbiga Maria gum, Zems niamuuŋ Maria, gum, Sarome, mbe Zisas khuma hɨvɨ zav vov, ndɨga vhuuŋ hi mporiiŋ ga vhezgi. 2 Mbe mba mporiiŋ ga vhezgiap, Sanden manera ra ndav shɨgɨra thagim, mbe ana ndi mboga tɨgi kɨma thoon muuŋgi mbogar vui. 3 Mbe vov, khaŋ wari ga nzuai, “The nzan kurav, mbu mbok thɨmkamani puigi kɨma bakɨme phogi mbur ndararie?”
4 Mbe nen wari ga nzuav vov, ragia garim, mba kɨma bakɨme, mbe ana phogia vov, mbur ndarigi. 5 Mbe vov, mba kɨma thoon muuŋgi mboga vhen vera garim, guman kama mbe shagi huri shargiap, mba mboga vhen guva nderen perav ki. Mbe ana gangiap guigira warir rɨɨngi.
6 Mbe warir rɨɨrim, ana khaŋ mbe nzuai, “Nde warir rɨnɨ thari. Gu kaŋgi, nde mba khanarareŋ ga ntorgi Nasaret guma Zisas ndi gari. Ana khar ki fhu. Ana taagia khavgi. Nde ana rɨga kegi ŋaneŋ ganɨ. 7 Mt 26.32; Mk 14.28Nde ne gangip, taagi ŋgɨv, mba ana phorga ruigi gumgi ga suaŋv, vhɨra Pita suaŋgiri, ‘Ana nde nɨma thɨgav fharav Garirir vui. Nde maaŋ ana gangirga. Ana fhum mba kamen nde suaŋgi.’ ”
8 Mba mbigi mba kameŋ mbararagiap, guigira ŋgava mbatɨga muuŋgiap, ninɨk mbe mbuim, mbe mba mbok thav kɨrar hegap, wari ra vui. Mbe vov, buna thuen guma the suaŋgi fhu. Mbe guigira rivgi. aFhe Bakɨme buni vhuuiŋ garav nta kaŋgi gumgi vhɨrve kha ndɨkndɨga mbui. Kha kameŋ ves 9 gum ves 20 kɨtɨgɨra ki, mba buni Mak nduara nta khergi fhuvara, harigi guma mbe zumtugu nta khergi. Kha buni ki ŋanen, mba kaŋgi gumgi vhɨrve kha ndɨkndɨga mbui, harigi buni tɨviveŋ khar ki. Mba buniveŋ khaŋ nzuai, “Mba mbigi vov buni tɨviveŋra Pita gum ana phorga ki gumgi ga suaŋgi. Mba mbigi vov mba guman kama mbe suaŋgi buni, mbe nta bun Pita suaŋgi. Mbe ana suaŋgim, zumgum Zisas nduara ŋaarar mbe nɨɨŋgim, mbe mba buni ndiav za kha nuianan vui. Mbe ra ndai fhain kegap za vov ra veri fhain vergi. Mbe mba ndiga vui kameŋ khare, ‘Fhe Bakɨme taagip kha nuianan ki gumgi gu mbigi ndiv zazera mbara muuŋgiap ki bɨɨŋbɨɨn mben nɨɨnga. Kha bunai Fhe Bakɨme bunai ma. Ne vhɨzgirga tuktɨgi fhu, ne zazera mbara muuŋgip kɨrga.’ ”
Zisas Makdaran mbiga Mariar hɨgi.
Matiu 28.9-10; Zon 20.11-18
9 Ru 8.2Zisas rimgiap, Sanden mɨn gorovra thagim, ana manera taagia khavgiap, ana fharav Makdaran mbiga Mariar hɨgi. Ana fhum mba mbiga tɨn harathɨgi ŋiniŋgi mbatɨgi ga vharigim, nta ana thav, kɨrar hegi. 10 Ru 24.10Ana fharav ana gangiap, vov, ana phorga ruigi ntɨɨri, ana mbe garim, mbe ana nzuav nzɨɨv, nziav kim, ana ana bun mbe suaŋgi. 11 Ana Zisas taagia khavgim, ana ana gangiap, vov ne bun mbe suaŋgim, mbe ne khothɨgi fhu.
Zisas tuavar wo phorga ruigi guma manin hɨgi.
Ruk 24.13-35
12 Zisas zumgum fhav maneŋ harigi gangana mbuav, wo phorga ruigi guma manin hɨgi. Mani Zerusareman kegap, wani vuim, ana tuap sɨgen manin hɨgi. 13 Ana manin hɨgim, mani taagia Zerusarem ndav, ne bun ana phorga ruigi gumgi mbari ga nzuaim, mbe vhɨra mani khothɨgi fhu.
Zisas wo phorga ruigi ŋaara gumgi, muunga ŋaari bun mbe nzuai.
Matiu 28.16-20; Ruk 24.36-49; Zon 20.19-23
14 1 Ko 15.5Zumgum ana farasegi 11 thɨgi ŋaara gumgi, mbe nduarira phena vhen ka pav kim, Zisas nduara mben hɨgi. Ana mben hɨgav, mbe vhegi. Ana khueŋ nzuav mbe vhegi. Mbe pani havhargiav, gumgi mbari ana rimgia taagia khavgim, mbe ana gangiap, ne bun mbe nzuaim, mbe ne khothɨgi fhu.
15 Mt 28.19; FG 1.8; Kor 1.23Ana ne nzuav mbe vhegap thav khaŋ mbe nzuai, “Nde za kha nuianan ŋgɨv, Fhe Bakɨme buni vhuuiŋ bun za kha gumgi gu mbigi ga suaŋri. 16 Zo 3.18; 3.36; 12.48; FG 2.38; Ro 10.9; 1 Pi 3.21Gumgi gu mbigi maaŋ muuŋgip, mba Fhe Bakɨme buni vhuuiŋ mbararav, nta khothivɨv, ruarga, Fhe Bakɨme zazera mbara muuŋgia ki bɨɨŋbɨɨn mben nɨɨŋgirga. Gumgi gu mbigi maaŋ muuŋgip, mba Fhe Bakɨme buni vhuuiŋ mbararav, nta khothivi fhu, mbe zumgum Fhe Bakɨme nɨma thivgirim, ana ne suaŋv mbe fuv Her ga suegɨrga. 17-18 FG 2.4; 5.16; 8.7; 10.46; 1 Ko 12.10; 12.28Ru 10.19; FG 5.15-16; 28.3-9; Ze 5.14-15Mbe mba Fhe Bakɨme buni vhuuiŋ khothivi ntɨɨri, kha tɨv mben kɨrga. Mbe na zɨn panan ŋiniŋgi mbatɨgi ga vharvharav, mbe vhɨra harigi ŋguir kaar buni suaŋv, mbe kurugir suigɨv, mbe vhɨra thiŋgi mbɨn mbɨrga, mba mbɨ gum kurigi vhɨra mben farfagirga tuktɨgi fhu. Mbe vhɨra wari wo farir rɨɨi gumgi ga surga, mben rɨmrɨɨ vhɨzɨrga.”
Fhe Bakɨme Zisas ndiga Hevenan ndagi.
Ruk 24.50-53; Farasegi Gumgi 1.9-11
19 Sng 110.1; FG 1.2-3; 1.9-11; 2.33-34; 7.55Zisas mba bunin mbe suaŋgia thugim, Fhe Bakɨme ana ndiga Hevenan ndagim, ana Fhe Bakɨme han, ana guva hareŋ ga perigi. 20 FG 5.12; 14.3; 1 Ko 2.4-5; Hi 2.3-4Zisas Hevenan ndagim, ana phorga ruigi gumgi za kha nuianan vov, Fhe Bakɨme buni vhuuiŋ bun, mbe nzua rui. Mbe maaŋ mbuim, Fhe Bakɨme Ŋina Ŋaar mbe phorga ruav, ŋkasŋkar mbe ndɨɨim, mbe mirikori ga mbuim, mba gumgi gum mbigi nta garav khaŋ nzuai, “Khe guigira Fhe Bakɨme buni ma!”
16:7 Mt 26.32; Mk 14.28
a16:8 Fhe Bakɨme buni vhuuiŋ garav nta kaŋgi gumgi vhɨrve kha ndɨkndɨga mbui. Kha kameŋ ves 9 gum ves 20 kɨtɨgɨra ki, mba buni Mak nduara nta khergi fhuvara, harigi guma mbe zumtugu nta khergi. Kha buni ki ŋanen, mba kaŋgi gumgi vhɨrve kha ndɨkndɨga mbui, harigi buni tɨviveŋ khar ki. Mba buniveŋ khaŋ nzuai, “Mba mbigi vov buni tɨviveŋra Pita gum ana phorga ki gumgi ga suaŋgi. Mba mbigi vov mba guman kama mbe suaŋgi buni, mbe nta bun Pita suaŋgi. Mbe ana suaŋgim, zumgum Zisas nduara ŋaarar mbe nɨɨŋgim, mbe mba buni ndiav za kha nuianan vui. Mbe ra ndai fhain kegap za vov ra veri fhain vergi. Mbe mba ndiga vui kameŋ khare, ‘Fhe Bakɨme taagip kha nuianan ki gumgi gu mbigi ndiv zazera mbara muuŋgiap ki bɨɨŋbɨɨn mben nɨɨnga. Kha bunai Fhe Bakɨme bunai ma. Ne vhɨzgirga tuktɨgi fhu, ne zazera mbara muuŋgip kɨrga.’ ”
16:9 Ru 8.2
16:10 Ru 24.10
16:14 1 Ko 15.5
16:15 Mt 28.19; FG 1.8; Kor 1.23
16:16 Zo 3.18; 3.36; 12.48; FG 2.38; Ro 10.9; 1 Pi 3.21
16:17-18 FG 2.4; 5.16; 8.7; 10.46; 1 Ko 12.10; 12.28
16:17-18 Ru 10.19; FG 5.15-16; 28.3-9; Ze 5.14-15
16:19 Sng 110.1; FG 1.2-3; 1.9-11; 2.33-34; 7.55
16:20 FG 5.12; 14.3; 1 Ko 2.4-5; Hi 2.3-4