29
Devit ga pit iakan ra ninge.
1 1Sto 16:28,29Muat na pirlat no Watong, muat ira dadasine aram ra mawe.
Muat na pirlat no Watong tano uno minamar ma tano uno dadas.
2 2Sto 20:21Pirlat no Watong tano minamarine nong i haruat ma no hinsana.
Muat na lotu tupas no Watong ra matmataan tano uno halhaliana kinkinis nong i manga melmel harsakit.
3 No ingana no Watong ie ke naliu tano taahit.
No God nong i tamat ira minamarine, i parparara,
no Watong i parparara naliu tano tamat na taah.
4 No ingana no Watong i manga dadas.
No ingana no Watong i tamat saakit.
5 Het 9:15; 1Kng 5:6; Ais 2:13No ingana no Watong i la warwarat ira tamat na ina daha.
No Watong i la warwarat hasiksik ira tamat na dadas na daha me Lebanon.
6 Lo 3:9I la gilgil ira uladih aram Lebanon be na karuas haruat ma tiga nat na bulumakau.
No uladih Hermon na karuas haruat ma tiga sigar rakaia na bulumakau.
7 No ingana no Watong i la tultule no hile.
8 Nam 13:26No ingana no Watong i la gungune no hanuo bia.
No Watong i gune Kades, no tamat na hanuo bia.
9 Jop 39:1No ingana no Watong i la hurhurusane ira dadasina daha,
ma i la ramas sare ira malit.
Ma narako tano uno hala na lotu diet bakut diet kakonga bia, “A pirhakasing tupas ie!”
10 No Watong i kis na harkurai taar tano taahit.
No Watong i kap no kinkinis na king hathatika.
11 Ais 40:29No Watong i la tartar dadas ta ira uno matanaiabar.
No Watong i la haidane ira uno matanaiabar ma ra malum.