41
A nianga tupas no tunotuno nong i kure ira ut na ninge: Devit ga pit iakan ra ninge na lotu.
1 Nng 82:3,4; Snd 14:21A haraidaan na kis ta nong i mon lilik uta diet ing taie udiet ta dadas.
No Watong na halon leh ie ta ira pakana bung na tinirih.
2 Nng 37:28No Watong na nes mur ie ma na balaure bat no uno nilon.
Na haidanei narako tano uno katon na pise
ma pa na tar se tar ie ta ira sinisip ta ira uno ebar.
3 No Watong na balaure ie tano uno ula suuh na minaset
ma na halangalanga leh ie sukun no uno suuh na hinangul.
4 Nng 6:2; 51:4; 103:3Iau ga tange, “Watong, nu marse iau.
Halangalanga iau, kanong iau ga gil ra sakena taar taam.”
5 Ira nugu ebar diet tange hagahe iau hoken:
“Na maat hunanges, ma hunanges mah no hinsana na pataam hatika?”
6 Snd 26:24-26Ing tikai na hanuat wara nesnes iau,
na ianga harabota, ma no kaatine na lik hulungan ira nianga na harhuli.
Io, na hansur um naga hinawas hurbit.
7 Nng 56:5Ira nugu ebar diet harmurungo tika wara utagu.
Diet liklik tar ira tinirih ing na haan tupas iau ma diet tangtange,
8 “Tiga sakana minaset i te kap tar ie.
Pa na taman tut laah tano sibaan i noh taar kaia.”
9 Jop 19:13,19; Nng 55:12,13,20; Jer 20:10; Mt 26:23; Lk 22:21; Jn 13:18No nugu bilai na harwis mah nong iau nurnur tana,
aie nong mir ga iaan tika,
ga raun haut no kakine tar tagu wara papaas iau.
10 Iesen augu, Watong, marse iau.
Sal hatut iau waing iau nigi balu diet.
11 Nng 25:2; 147:11Iau nunure tar be u kanakana pane tar iau,
kanong ira nugu ebar diet pai petlaar iau.
12 U hatur hadadas iau kanong ta ira bilbilai ken i kis taar tano balagu,
ma u hakisi iau tano num matmataan hathatika.
13 A pirharlat tupas no Watong, no God ta Israel,
mekatiga laah menalua tano hamhaburen tano ula hanuo tuk taar tano hauhawatine ma pana le pataam.
Amen ma Amen.