58
A nianga tupas no tunotuno nong i kure ira ut na ninge: ing da inge iakan ra ninge, da mur no kaungana no ninge “Waak ra Halhaliarai.” Devit ga pit ie.
1 Muat ira lualua, muat lik bia i takodas ira numuat nianga?
Ira numuat harkurai i takodas nalamin ta ira tunotuno?
2 Ais 10:1Taie. Narako tano kaati muat, muat pingpingit ira harkurai pai takodas,
ma ira lima muat i helar tano ula hanuo bakut.
3 Nng 51:5Mekaia laah di ga kaha diet, ira ut na sakena diet haan taltalur.
Meram laah tano lienat ta ira pawasi diet, diet mur leh at ira udiet lilik ma diet harabota.
4 Lo 32:33Ira udiet sakana tintalen i haruat hoing no malmalena gar na ha na sui,
ma hoing tiga kobra ing i malok bia na hadoda,
5 Sav 10:11kaik pa naga hadade no kinkel tano tulaal tano ut na pinegil
sukmaal be nong i hus tulaal i manga keskes.
6 Nng 3:7God, warat ira ngise diet mekaia ra ha diet!
Watong, ragatane ira lako diet ira laion!
7 Jos 2:11; 7:5Waak diet naga panim bia, hoing ira taah i la salsaal laah.
Ing diet sarat ira udiet laplapot, iau sip bia ira nudiet rumus na tabubur.
8 Jop 3:16Na tahut bia diet na haruat ma ira garnahana no demdem i mamasa laah ing i hakakari haan,
ma bia diet na haruat ma tiga bo i baling ma pai nes no kasakes.
9 Snd 10:25Menalua ma ira sosopen na hamaan no mamahien tano iaah i lulungo gasien,
God na sah se ira ut na sakena sukmaal bia diet lon taar at baak.
10 Lo 32:43; Nng 68:23Ira ut na takodas diet na laro ing nu babalu wara gae diet.
Diet na papaas suguh ta ira de diet ira ut na sakena.
11 Ais 3:10; Lk 6:23,35Ira tunotuno diet na tange,
“Tutun! A mon kunkulaan audiet ira ut na takodas.
Tutun! Tiga God kana nong i kure no ula hanuo.”