107
1 Nng 106:1; Jer 33:11Tanga tahut tano Watong, kanong a bilai ie.
No uno harmarsai i kis hathatika.
2 I tahut bia diet ing no Watong gate kul halangalanga leh diet, diet na tange huo.
Ma diet ing ga kul halangalanga leh diet sukun no limana ira udiet ebar, diet na tange mah huo,
3 Neh 1:9; Ais 43:5 Ese 11:17ma diet mah ing ga lamus hulungan diet mekaia ta ira kaba pise,
mekaia hono katon ing no kasakes i la tutut hut kaia, ma mekaia i la sungsuguh, ma ira katon na pise merau ma ira katon na pise meras.
4 Nam 32:13Ari ta diet ga rara narako tano mamasina hanuo bia.
Diet pa ga nes leh ta ngaas ukaia tiga pise na hala bia diet gor kis kaia.
5 Diet ga taburungan ma diet ga maruk,
ma diet ga wara minaat tunat.
6 Io, diet ga suah taar tano Watong ma ira udiet tinirih,
ma ga halon diet sukun ira udiet ngunngutaan.
7 Esr 8:21Ga lamus diet tiga takodasiana ngaas
ukaia tiga pise na hala bia diet gor kis kaia.
8 I bilai bia diet na tanga tahut tupas no Watong utano uno harmarsai nong pai la patpataam
ma uta ira uno tamat na melmel na gingilaan na kinarup mah wara gaiena ira tunotuno,
9 kanong i la hamamo diet ing diet maruk,
ma diet ing diet taburungan, i la tamtabar hahos diet ma ra bilai na linge.
10 Ais 42:7; Lk 1:79Ari diet ga kis taar narako ra kankado nong i haruat ma no kankado na minaat,
diet at ing diet ga kis narako ra hala na harpidanau ma diet ga kilingane ra ngunngutaan ta ira sen di ga kubus kawase diet me,
11 Nam 15:31; 2Sto 36:16kanong diet gate patnau tar ta ira nianga ta God
ma diet gate taklain tano nianga na harpir auno Nong i Naliu Harsakit.
12 Io, ga hapanpador diet ma ra dadas na pinapalim ing ga manga ubal diet.
Diet ga puko ma taie tikai bia na harahut diet.
13 Io, diet ga suah taar tano Watong ma ira udiet tinirih,
ma ga halon leh diet sukun ira udiet ngunngutaan.
14 Jer 30:8Ga kap hasur diet tano kankado nong i haruat ma no kankado na minaat
ma ga rapat ise tar ira sen di ga kubus kawase diet me.
15 I bilai bia diet na tanga tahut tupas no Watong utano uno harmarsai nong pai la patpataam
ma uta ira uno tamat na melmel na gingilaan na kinarup mah wara gaiena ira tunotuno,
16 Ais 45:1,2kanong i la parparok hasur ira matanangaas na baras
ma i la durdure hasur ira dadas na balo tano hala na harpidanau.
17 Ari diet ga hanuat ulba ta ira udiet magingin na patnau
ma ira tinirih diet ga kilingane i burena ta ira udiet magingin sakena.
18 Diet ga miliguruane ira nian bakut
ma diet ga hutet bia diet na maat.
19 Io, diet ga suah taar tano Watong ma ira udiet tinirih,
ma ga halon leh diet sukun ira udiet ngunngutaan.
20 2Kng 20:5Ga tule se no uno nianga ma ga halangalanga diet sukun ira minaset.
Ga hutet bia diet na maat iesen ga halon diet.
21 I bilai bia diet na tanga tahut tupas no Watong utano uno harmarsai nong pai la patpataam
ma uta ira uno tamat na melmel na gingilaan na kinarup mah wara gaiena ira tunotuno.
22 WkP 7:12I bilai bia diet na tun hartabar wara tangtanga tahut tana,
ma diet na hinawas ta ira uno gingilaan ma ra ninge na gungunuama.
23 Ari diet ga kawas ta ira sip ures na tingaan tes.
Diet ga haan hurbit tano lamlamana tes wara suhurane ira linge.
24 Diet ga nes ira pinapalim tano Watong,
kaike ra uno tamat na gingilaan na kinarup aram ra tingena lamana,
25 Jna 1:4kanong ga ianga ma ga hatut tiga baiangin
nong ga tatik haut ira pakananoh uram naliu.
26 Ira pakananoh ga kap haut ira sip uram muk naliu ma ga se hasur diet ures napu saakit.
Ta iakano sakana tes ira taan tes diet ga ramramin.
27 Jop 12:25Diet ga talau ma diet ga puko hoing ira tunotuno diet mom.
Diet pa ga tale bia diet na petlaar tiga linge ma ira udiet keskes na lilik.
28 Io, diet ga suah taar tano Watong ma ira udiet tinirih,
ma ga halon leh diet sukun ira udiet ngunngutaan.
29 Mt 8:26; Lk 8:24Ga hamarur no baiangin gaam pupuh matien.
Ira pakananoh tano tes mah ga noh matien.
30 Diet ga laro ing no tes ga malile,
ma no Watong ga lue diet taar ta ira katon diet ga sip bia diet na barahit kaia.
31 I bilai bia diet na tanga tahut tupas no Watong utano uno harmarsai nong pai la patpataam
ma uta ira uno tamat na melmel na gingilaan na kinarup mah wara gaiena ira tunotuno.
32 Io huo, i bilai bia diet na hatamat ie nalamin tano kis hulungai ta ira matanaiabar
ma i tahut bia diet na pirlat ie narako tano kinkinis tika ta ira patuana kabinsit.
33 Ga pukusane ira taah gaam hanuat tiga mamasina hanuo,
ma ira taah saal mah gaam ngan ho ira mamasina salil.
34 Stt 19:24,25Ga pukusane ira pise na nian gaam hanuat hoing ira marakon na pise,
i burena ta ira saksakena udiet ing diet ga lon kaia.
35 Ga pukusane no mamasina hanuo bia, gaam hung ma ira laman taah,
ma ira pise ing ga mamasa gaam hanuat taah saal.
36 Ga lamus tar diet ing diet ga taburungan bia diet na lon kaia,
ma diet ga hatur tiga pise na hala bia diet na kis kaia.
37 1Kng 19:29; Amo 9:14Diet ga rup no pise ma diet ga so ira adiet nian ma ira hinau na wain.
Diet ga kil ra haleng na nian ma diet ga dik ira haleng na hunena wain.
38 Stt 12:2; 17:20; KBk 1:7; Lo 1:10; 7:14Ga haidane diet, gaam haleng saakit ira nati diet,
ma ira udiet bulumakau ma ira udiet sipsip ga hanuat halengin mah.
39 2Kng 10:32; Ese 29:15Io, namur um, no winawas ta ira nati diet ga hansur ma diet ga hanuat malahahin
ing ira hanghagawai ma ira tinirih ma ra tapunuk ga ubal diet.
40 Aie nong i la milmiliguruane ira lualua,
ga gil diet bia diet ga goota hurbit narako tiga hanuo bia, a hanuo ing taie ta ngaas na hinahaan tana.
41 1Sml 2:8Iesen ga halon ira maris sukun ira udiet hinangul
ma ga hatamat no winawas ta ira nati diet, diet gaam hanuat ho ira haleng na sipsip saakit.
42 Rm 3:19Ira ut na takodas diet nes ma diet guama,
iesen ira ut na sakena bakut diet banus ira ha diet.
43 Hos 14:9Sige nong i mintot, i bilai bia na kap usurane kaiken ra linge
ma na lik mur timaan no tamat na harmarsai tano Watong.
107:1: Nng 106:1; Jer 33:11
107:3: Neh 1:9; Ais 43:5 Ese 11:17
107:4: Nam 32:13
107:7: Esr 8:21
107:10: Ais 42:7; Lk 1:79
107:11: Nam 15:31; 2Sto 36:16
107:14: Jer 30:8
107:16: Ais 45:1,2
107:20: 2Kng 20:5
107:22: WkP 7:12
107:25: Jna 1:4
107:27: Jop 12:25
107:29: Mt 8:26; Lk 8:24
107:34: Stt 19:24,25
107:37: 1Kng 19:29; Amo 9:14
107:38: Stt 12:2; 17:20; KBk 1:7; Lo 1:10; 7:14
107:39: 2Kng 10:32; Ese 29:15
107:41: 1Sml 2:8
107:42: Rm 3:19
107:43: Hos 14:9