135
1 Da pirlat no Watong.
Da pirlat no hinsana no Watong.
Muat ira tultulai tano Watong, muat na pirlat ie,
2 muat ing muat tur aram tano ngasiana no Watong,
aram narako tunat tano hala tano udahat God.
3 Muat na pirlat no Watong kanong no Watong i tahut.
Muat na inga pirhakasing tano hinsana, kanong i bilai.
4 Lo 7:6; 10:15; KBk 19:5; 1Pt 2:9Kanong warah, God i te gilamis Iakop waing auno tus ie,
ma dahat ira Israel hoing no bilai na pinlawena.
5 Nng 97:9Iau nunure bia no udahat Watong i manga tamat,
ma bia i tamat saakit ta ira god bakut.
6 No Watong i la gilgil ira kaba linge i guama ine,
aram ra tingena mawe ma akai ra ula pise,
ares na tes ma aram na lamana mah.
7 Jop 38:25,26I pakile ira bahuto bia na tut meram tano hauhawatine no ula hanuo.
I la tultule ra hile tika ma ra bata
ma i la kapkap hasur no dadaip meram ta ira uno hala na bunbulaan.
8 KBk 12:12Ga bing ira matana bulu na tunaan ta ira Isip,
diet ira matana bulu ta ira tunotuno ma ira luena kinakaha ta ira wawaguai mah.
9 KBk 7:10; Lo 6:22Ares Isip mah ga tule ira hakilang ma ira dadas na gingilaan na kinarup
taar tano udiet king ma ira uno tultulai bakut.
10 Nam 21:24Ga haliare ra haleng na kantri
ma ga bu bing ira dadas na king.
11 Nam 21:21-26; Lo 29:7; Nam 21:33-35; Jos 12:7-24Ga bu bing Sihon, no king ta ira Amor,
ma Og, no king me Basan,
ma ira king bakut me Kenan mah.
12 Lo 29:8Ma i ga tar se ira udiet pise taar ta Israel
bia ira uno matanaiabar diet na tinane leh.
13 KBk 3:15Watong, no hinsaam na tur hatika taar ma pa na pataam.
Watong, ira bulumur ing diet na lon namur, diet na lik kawase tar no hinhinawas utaam.
14 Kanong warah, no Watong na tar tiga takodasiana harkurai wara gaiena ira uno matanaiabar,
ma na marse ira uno tultulai huo.
15 Nng 115:4-8Di te pakile ira palimpuo ta ira mes na kantri ma ra siliwa ma ra gol.
A lumana tunotuno mon ga gil diet.
16 A mon ha diet, iesen pai tale bia diet na ianga.
A mon mata diet, iesen diet pai tale bia diet na nanaas.
17 A mon talinga diet, iesen diet pai tale bia diet na hadoda.
Taie mah ta mansungu diet ta ira ha diet.
18 Diet ing diet gil kaike ra palimpuo, diet na haruat hoing kaike ra palimpuo,
ma huo mah diet ing diet na so nurnuruan ta diet.
19 Nng 115:9Muat ira huntunaan ta Israel, muat na pirlat no Watong.
Muat ira ut na pakila lotu tano huntunaan ta Aaron, muat na pirlat no Watong.
20 Muat tano huntunaan tane Lewi, muat na pirlat no Watong.
Muat ing muat ru ie, muat na pirlat no Watong.
21 A pirharlat tupas no Watong meram Saion.
A pirharlat tupas ie nong i la kis taar aram Ierusalem.
Da pirlat no Watong.