141
Devit ga pit iakan ra ninge na lotu.
1 Watong, iau tataau ukatiga ho ugu. Hanuat gasien ukai ho iau.
Hadade no ingagu ing iau ni tataau ugu.
2 KBk 29:39,41; 30:8I tahut bia no nugu sinasaring na haan uram ho ugu hoing ra mis i manga huhur kala mismisien.
I tahut bia ing ni raun haut ira limagu, na ngan hoing no hartabar nong di gil ie uram ho ugu ra matarahien.
3 Snd 13:3; 21:23Watong, balaure no hagu.
Nes mur ira palabulugu.
4 Waak u balbale leh iau bia ni kalak ira sakena,
iau kabi gil ira saksakena tika ma ira tunotuno ing diet pakile ira sakana purpuruan.
Waak u bale leh iau bia ni ien mah ira adiet namnamien na nian.
5 Snd 9:8; 19:25I tahut bia tiga takodasiana tunotuno na pasar iau. Na ngan hoing ra harmarsai.
I tahut bia na boor iau huo. Na ngan hoing ra bilai na wel tano ulugu.
No ulugu pa na malok sei,
kanong iau la saasaring baak bia nu balu pukus ira gingilaan ta ira ut na sakena.
6 2Sto 25:12Ing da se hasur ira udiet lualua meram naliu ta ira ula habo,
ira ut na sakena diet na nunure kilam bia ira nianga iau gate tange a bilai.
7 Diet na tange, “Hoing tikai i rurup ma i rupukane haut ira haat tano pise,
huo mah, ira suru dahat i te noh harbasia taar ing pa di ga bus.”
8 Iesen ira matagu i la kis dikdikit taar at taam, Watong Kiskis.
Iau ni barahit taam. Waak u tar se iau ukaia ra minaat.
9 Nng 140:5Balaure timaan iau, bia iau kabi taaba ta ira udiet kuun ing diet te hatudu tar wara utagu.
Balaure bat iau ta ira kuun ing ira ut na hangat gaia diet te kapis tar.
10 Nng 35:8Iau sasaring bia ira ut na sakena diet na taaba baling tar ta ira udiet kuun,
iesen bale tar iau bia nigi haan pas kaike ra kuun.