143
Devit ga pit iakan ra ninge na lotu.
1 Watong, hadade no nugu sinasaring.
Hatarame no nugu tintaau wara gaiena harmarsai.
Haruat ma no num tutun na magingin ma no num takodasiana magingin, mai, nugu harahut iau.
2 Rm 3:10,20; Ga 2:16Waak u kure iau, no num tultulai,
kanong taie tikai ken i lon i takodas ra matmataan taam.
3 No nugu ebar i paspasak iau,
i paas guluane iau taar tano pise.
I gil iau huo bia iau ni lon tano kankado
hoing diet ing diet gabe maat.
4 Io, no nugu nilon i maalum.
Iau manga tapunuk.
5 Iau lik leh ira bung menalua saakit.
Iau lik murmur bakut leh ira num pinapalim
ma iau lik timaan ira linge ing ira iruo limaam dir gate gil.
6 Iau sasangaha ukatiga ho ugu.
Iau maruk pane ugu hoing tiga mamasina katon na pise i maruk pana taah.
7 Nng 28:1; 88:4Watong, taram hagasiaan iau.
Iau hamaan bia no nugu nilon i wara patpataam.
Waak u suhe no matmataan taam tagu,
iau kabi ngan hoing diet ing diet hansur ures napu tano lulur na minaat.
8 I tahut bia ra malaan nu hinawase iau utano num harmarsai nong pai la patpataam,
kanong iau te so no nugu nurnuruan taam.
Hamines no ngaas nong i tale bia ni mur ie,
kanong utaam at, iau raun no nugu nilon.
9 Watong, halon iau sukun ira nugu ebar,
kanong iau mun narako taam.
10 Hausur iau wara gilgil ira num sinisip
kanong augu no nugu God.
I tahut be no bilai na Tanuaam na lue iau ta tiga mangana ngaas waing pa ni laleka ma nigi surmalagir.
11 Watong, balaure bat no nugu nilon waing daga urur taam.
Lamus leh iau sukun ra tinirih haruat ma ira num takodasiana magingin.
12 Nng 54:5Hamarur ira nugu ebar haruat ma no num harmarsai nong pai la patpataam.
Haliare bakut diet ing diet tut na hinarubu ma iau,
kanong iau no num tultulai.