1 Io, Iesu ga tangai ta ira tamat na mataniabar ma ta ira nuna bulu na hausur hoken: 2 “Ira tena hausur ta ira warkurai ta Moses ma ira Parasi, diet kaikek, ing diet tale bia diet na hasahesa palai ta ira warkurai ta Moses. 3 Io, hua i tahut bia muat na taram diet ma muat na murmur ira linga ing diet tangai ta muat. Senbia pai tahut bia muat na mur lah ira nudiet tintalen kanong diet tangai ira linga ma pa diet gil haruatanei. 4 Ma diet kap lah ira nudiet dadas na hausur, io, diet hapusak tar ira mataniabar manei, ing pa diet tale bia diet na mur. Senbia diet at, pa diet na gil ta dahina wara hamamakan ira mataniabar ta kaikek ra warkurai.

5 “Ira linga bakut diet ira lualua diet gil, diet gil mon bia dahat ira mataniabar na nas bia dahat na lat diet. Muat palai tano nudahat magingin ta ira nat na punulus. Ma dahat la bul aram narako aring a hartulai ta Kalou. Ma dahat la kubus tar ira punulus ta ira wali dahat ma ira lima dahat mah. Senbia ira nudiet i manga tamat. Ma dahat la bulbul mah ira kurehreh ta ira nudahat sigasigam wara halilik dahat bia dahat na mur ira warkurai ta Kalou. Senbia ira nudiet at i manga taltalona. 6 Ma diet la nemnem bia diet na kis ta ira kinkinis gar na tamat narako ta ira nudiet hala na lotu ma ta ira bura na rau ta ira gil nian. 7 Diet la nemnem bia da karo lah diet ta ira sibaan ing di la hanhanuat hulungai kaia ma da lat diet, kaikek daga kilam diet bia, ‘Tena hausur.’

8 “Senbia pai tahut bia da kilam muat bia, ‘Tena hausur,’ kanong tikai sena mon no numuat tena hausur. Ma muat bakut mon muat haratasin. 9 Ma waak muat tanga ‘Tata’ ta tikai makai napu kanong tikai sena mon no numuat Tata. Ma ia kinam ra mawai. 10 Ma pa muat na kilam muat bia a ‘lualua,’ kanong tikai mon no numuat lualua, ma ia no Mesaia.*No kukuraina i haruat ma ‘Karisito’. 11 Nong i manga tamat ta muat, na numuat tultulai mon ia. 12 Ma siga nong i hatamat habal ia, Kalou na bul hasur ia. Ma siga nong i bul hasur ia, Kalou na hatamat ia.

13 “Maris ta muat ira tena hausur ta ira warkurai ta Moses ma muat ira Parasi, na ubal muat! Muat ira tena harbabo! Muat la banbanus sei diet ira tunatuna ing diet wara ninlaka tano matanitu maram ra mawai. Muat at, pa muat laka tana, ma pa muat haut lah mah diet ing diet wara ninlaka bia diet na laka kaia.

14 [“Maris ta muat ira tena hausur ta ira warkurai ta Moses ma muat ira Parasi, na ubal muat! Muat la karkarit lah ira linga bakut ta ira makosa, ma muat la bisbis ma ira numuat taltalona sinsaring. Kalou na manga hapidinau muat.]

15 “Maris ta muat ira tena hausur ta ira warkurai ta Moses ma muat ira Parasi, na ubal muat! A tena harbabo muat! Muat la hanhan hurlabit ta ira sibaan bakut wara hauhau lah tikai mon bia na mur ira numuat hausur. Ma bia na numuat bulu na hausur um ia, ia ma muat, muat bakut muat na kap ra harpidinau. A tutuna bia muat na laka tano iaah, senbia i tutuna sakit bia ia mah na laka tana kanong i ta mur muat.

16 “Maris ta muat ira pula na lualua, na ubal muat! Muat tangai hoken: ‘Bia tikai i hasasalim uram tano tamat na hala na lotu, iakanong a linga bia mon. Iasen, ing bia na sasalima uram ta ira bilai na linga narako tano tamat na hala na lotu, iakanong na sulei tar at ia naga hatutun no nuna sasalima.’ 17 A gotgotuana pula muat! Muat manga ronga. No tamat na linga, no hala na lotu. Ia nong i gil kaikek ra linga ing naga gar ta Kalou. 18 Ma muat tangai mah hoken: ‘Bia tikai i sasalima tano suuh na hartabar aram tano tamat na hala na lotu, iakanong a linga bia mon. Iasen bia na hasasalima ta ira linga di hartabar manei, iakanong na sulei tar at ia naga hatutun no nuna sinsalim.’ 19 A pula muat! Ma muat manga ronga baal. No tamat na linga no suuh na hartabar. Ia nong i gil kaikek ra hartabar waing diet naga gar ta Kalou. 20 Io hua, siga nong i sasalima tano suuh na hartabar, no nuna sasalima i burung tikanei no suuh na hartabar ma ira hartabar mah kinam tana. 21 Ma siga nong i hasasalima tano tamat na hala na lotu, no nuna sasalima i burung tikanei no tamat na hala na lotu ma Kalou mah nong i la kis taar narako tana. 22 Ma siga nong i sasalima uram naliu, no nuna sasalima i burung tikanei no kinkinis na watong ta Kalou ma Kalou mah nong i la kis taar kaia.

23 “Maris ta muat ira tena hausur ta ira warkurai ta Moses ma muat ira Parasi, na ubal muat! A tena harbabo muat! Muat la saso aring linga wara hanamnamian ira amuat nian, hoing ra lobo, a kamahar, ma ra kari. Ma hoing ira warkurai ta Moses i tangai, muat la tartar ta Kalou nong i sangahul ma ia ta kek ra linga muat la saso. Senbia muat lilik tatohun balik ta ira tamat ta ira warkurai ta Moses. Pa muat takodas, pa muat harmarsai, ma pa muat tutuna ta ira numuat nilon. Io, gaar takodas bia muat ta tar kaiken ra linga tupas Kalou ma pa muat gaar mola mah wara murmur kaiken ira bilai na magingin. 24 A pula na lualua muat! Muat manga lik hadadas um ira nat na warkurai senbia muat malentakuanei ira tamat. Muat haruat ma tiga tunatuna i kulupa bia na mom. I lik lah um no nolnol ma i kap sei ia tano taah. Senbia i kanam balik um tiga bulumakau.

25 “Maris ta muat ira tena hausur ta ira warkurai ta Moses ma muat ira Parasi, na ubal muat! A tena harbabo muat! Muat haruat ma tiga gapgopai bia tiga dis ing di gis sen lah mon no tuhuna ma nataman. Senbia no tingena i hung ma ra bilinga na linga muat kinau ma ira linga mah muat manga masmasingai panei. 26 A pula na Parasi uga! I tahut bia u na gis hanaluai ira tingena no gapgopai bia no dis, io, ira tuhuna mah um naga madaraas.

27 “Maris ta muat ira tena hausur ta ira warkurai ta Moses ma muat ira Parasi, na ubal muat! A tena harbabo muat! Muat haruat ma ra midi di hamar ma ra palpalana haat ing diet nanaas timaan ma nataman. Senbia kinas napu, diet hung ma ra sur na minaat ma ira linga ing na hagawai tikai waing na sakena. 28 Hokek muat. Muat haminis bia muat takodas ta ira matmataan ta ira tunatuna. Senbia narako ta muat, i hung ma ra harbabo ma ra tabuna mur warkurai.

29 “Maris ta muat ira tena hausur ta ira warkurai ta Moses ma muat ira Parasi, na ubal muat! A tena harbabo muat! Muat la gilgil ira bilai na haat na midi ta ira poropet wara liklik lah diet. Ma muat la hamar ira midi ta ira tena takodas. 30 Ma muat tangai bia, ‘Ing bia dahat gaar lon ta ken ra nudiet pakana bung ma ira hintubu dahat, io, pa dahat gaar harahut wara bubu bing ira poropet.’ 31 Io, muat at muat hasahesa palai ta muat, bia a hintubu muat at ing diet ga bu bing ira poropet. 32 Io, i nanaas tutuna um bia muat na gil bakut ira sakena ing ira hintubu muat diet ga hasibaan tar.

33 “Muat hoing ira sui. Muat ira tena sakena. Ma ira hintubu muat, diet mah hua. Ma pa muat tale tutun at bia muat na pas no tamat na harpidinau narako tano iaah. 34 Ma wara haminis bia muat na gil hua, io, iau na tulei aring poropet, aring tena mintota, ma aring tena hausur ukai ta muat. Ma muat na bu bing aring ma aring muat na pitang diet ra ula kabai, ma aring muat na dangat diet narako ta ira numuat hala na lotu. Ma muat na murmur haan wara hangungut diet ta ira taman, tikatikai. 35 Io hua, ing muat na bu bing diet ira tena takodas ta iakan ra ula hanua bakut, no harpidinau na ubal muat. No numuat hinarubu bingbing ga hatahun lah tane Abel, tiga tena takodas, gaam hanahaan tuk taar tane Sekaria no nati ne Berekia. Ma Sekaria nong muat ga bu bing ia nalamin tano tamat na hala na lotu ma no suuh di la tuntun ira hartabar kaia. 36 Iau tangai ta muat! Ira harpidinau haruat hoing ken ira numuat magingin sakena na ubal muat ing muat lon ta ken ra pakana bung.”

37 Ma Iesu ga tangai bia, “Maris muat ira mataniabar makai Ierusalem! Muat la bubu bing ira poropet ma muat la tutut bing diet ing Kalou i la tultulei diet ukaia ta muat. Haleng pakaan iau ga sipsip bia ena gawanei lah muat hoing no huna kareka i la pabang ira natina. Senbia pa muat sip hua. 38 Nas baa! Da hamau no numuat taman ma muat na biha? 39 Io, iau hasasei muat bia pa muat na nas habal iau tuk tano pakana bung ing muat na tangai bia, ‘I daan nong i hanuat wara gilgil haruatanei ira sinisip gar tano Watong!’ ”