1 Io, Iesu ga haan talur iakano sibaan gaam haan taar tano nuna taman. Ira nuna bulu na hausur a mah diet ga sakatei ia. 2 Ra Bung na Sinangeh Iesu ga hatahun no nuna pinapalim na tena hausur aram tano hala na lotu nudiet ira Iudeia. A haleng diet ga hadadei ia ma diet ga manga karup, ma diet ga tangai hoken: “Ga kap kaiken ra nuna hausur maha? Pa dahat nunurei tutun at ta dahina! Siga i tar no nuna mintota tana? Dahat na tangai hoeh ta ira nuna dadas na pinapalim na kinarup ing ga gil ma ira limana tus? 3 Ia mon no tena gil hala, no nati ne Maria. Ira tasina kaikek ne Jemes, Iosep, Iudas ma ne Saimon. Ma ira hininina diet ken ma dahat.” Ma diet ga mola sasei ia.

4 Iesu ga balu diet, “I tutun sakit bia muat na ruu ira poropet ta ira mes na taman. Senbia pa muat na ruu ia bia ia makai ma bia a hinsaka muat mah ia. Pa muat ruu mah ia bia muat mon tiga huna.”

5 Pa ga tale bia Iesu na gil ta haleng dadas na pinapalim na kinarup kaia. Ga bul mon ira limana ta aring ina minaset waing diet naga langalanga talur ira nudiet minaset. 6 Ma Iesu ga lik bia, “Maris! Wara biha pa diet nurnur?”

Io, Iesu ga haan hurlabit taar ta ira taman gaam hausur ira mataniabar. 7 Ga tatau lah ira nuna sangahul ma irua na bulu na hausur ukai tana, gaam tulei diet airirua ma ga tar no dadas ta diet waing diet naga warkurai ta ira sakana tanua wara tultulei hasur sei diet. 8 Ga tangai timaan taar ta diet hoken: “Pa muat na kap ta linga tano numuat hinahaan. Muat na kap sen tiga buka. Pa muat na kap ta nian, ta raat, ma ta kinewa. 9 I tale bia muat na paas ta sendal ta ira kaki muat ma sen pa muat na kap ta harkios. 10 Bia muat lalaka taar tiga hala muat na kis taar kaia tuk taar bia muat na haan talur iakanong ra taman. 11 Ma bia pa di balak lah muat tiga taman ma pa di taram mah ing muat tangtangai, io, bia muat hanan laah talur no taman muat na hatidir sasei ira kamkabus ta ira kaki muat. Muat na gil hua waing na hakilang diet tano sakana magingin diet gil tar ta muat.”

12 Io, ira bulu na hausur diet ga haan harbasiai ma diet ga warawai bia ira tunatuna diet na lilik pukus ta ira nudiet magingin sakena. 13 Ma diet ga hashasur sei mah a haleng na sakana tanua. Ma diet ga mur no nudiet magingin wara kapkapal ira haleng ina minaset ma ra wel. Ma namur bia diet ga gil hua diet ga halangalanga ira ina minaset.

14 Bia Iesu ma ira nuna bulu na hausur diet ga gilgil kaikek ra pinapalim, Herot no king ga hadadei ira nianga uta Iesu kanong a haleng na mataniabar diet ga iangianga haan tana. Aring diet ga lik bia Ioanes tane Iesu diet gaam tangtangai bia, “Ioanes no tena bapitaiso i ta taman tut sukun no minaat ma i lon balin. Ken no burena gi gilgil ira dadas na pinapalim na kinarup.” 15 Senbia aring diet ga tangai bia, “Ia ne Elaija.” Ma aring at diet ga tangai bia, “Ia tiga poropet hoing ira poropet manaluai sakit.”

16 Ma bia Herot, no king ga hadadei, ga tangai, “Ia ne Ioanes no tena bapitaiso! A tutun bia iau ga dako ia, senbia i ta tut hut baal tano minaat ma i ta lon balin!” 17 No burena ira nianga tane Herot, no king, hoken. Naluai, Herot gata tulei aring tunatuna wara palpalim kahai ne Ioanes. Diet ga kubus ia, diet gaam bul ia ra hala na harpidinau. Herot ga gil hua kanong ga tolai Herodias. Io, naluai Herodias gata tolai tar baa Pilip, no tasi ne Herot. 18 Ma Ioanes git tangtangai tane Herot, no king, hoken: “Pai bilai bia u ta tolai Herodias, no hahina tano tasim.”

19-20 Io, Herodias git balbala ngungut taar tane Ioanes ma ga sip at bia da bu bing ia. Senbia pa ga tale kanong Herot, no king, ga burburtei Ioanes. Git burburtei ia kanong ga nunurei bia Ioanes a tena takodas ia ma a gamgamatien na tunana ia, hua gaam balaurei timaan ia bia kaba gi hirua. A tutun bia ga lilik tirtirih ta ira nianga tane Ioanes, senbia Herot at, no king, git sipsip bia na hadadei.

21 Tiga bung Herot ga gil tiga nian na hakilang tano nuna bung na kinakaha. Ga gil ia wara nudiet ira nuna tena warkurai, ira lualua ta ira umri, ma ira watong tano hanua Galili. 22 Ma no nuna hahina, Herodias, a mon nat na natina, a gurar ia. Ma iakano gurar ga haan laka gaam hamangatai Herot ma ga manga haguama Herot ma ira nuna hasira. Bia no king ga nas hua ga tangai tano gurar, “U sip ta mangana linga hoeh? Ta mangana sa ing u sip, iau na tar taam!” 23 Ga hasasalima ma ga tangai tano gurar bia, “Iau ni tar ta mangana linga sa ing u na tiri iau uranai. Bia u na tiri iau tiga sibaan tano nugu kingdom mah, iau ni tar at taam.”

24 Io, no gurar ga hansur gaam tiri Herodias, no pawasina, hoken: “Iau ni tiri um ia ta sa?” Ma no pawasina ga nem bia da bu bing Ioanes, kaikek gaam balu ia bia, “U na tangai tana bia u sip no wali Ioanes no tena bapitaiso.”*Bia da gil hua, na haminis bia Ioanes ta maat. 25 Kaikek at ma no gurar ga hilau tapukus uram ta Herot gaam tangai tana bia, “Iau sip bia kaiken at u na tar no wali Ioanes no tena bapitaiso tagu!” 26 Bia Herot ga hadadei ga manga tapunuk. Ga tapunuk senbia pa ga tale bia na mola tano sinsaring tano gurar kanong gata sasalima taar ra matmataan ta ira hasira. 27 Habir a mon, ga tulei tiga umri ma ga tangai hadadas tana bia na kut dako lah no wali Ioanes ma na kap pukus ia. No umri ga haan laka tano hala na harpidinau gaam kut dako Ioanes. 28 Ga kap hahuat no walina, gaam tar ia tano gurar. Ma no gurar balik ga tar ia tano pawasina, Herodias.

29 Bia ira bulu na hausur tane Ioanes diet ga kap ra hasahesa tano hinirua tane Ioanes, diet ga hanuat diet gaam kap lah no palatamai ne Ioanes ma diet gaam bus ia.

30 Ira apostolo ing Iesu gata tulei harbasianei tar diet, diet ga tapukus balin diet gaam harusa ne Iesu ma diet gaam hasasei ia ta ira pinapalim ing diet gata gil tar ma ira hausur ing diet ga tar ta ira mataniabar. 31 Iesu ma ira nuna bulu na hausur pa diet ga tale a mah bia diet na iaan kanong a haleng sakit ira mataniabar diet ga hanahaan huat ma diet ga hanahaan laah. Io, Iesu ga tangai ta diet bia, “Dahat na bolas tano taah kis taar tiga sibaan ing taia taring kaia waing muat na sangeh baa ta dahina.” 32 Io, diet ga haan sen laah tiga mon uram tiga sibaan i mumuau.

33 Bia diet ga hanahaan a haleng mataniabar diet ga kis taar ta ira nudiet taman, diet ga nas kilam Iesu ma ira bulu na hausur. Io, diet ga hilau laah makaia ta ira nudiet taman diet gaam a luena tur tano sibaan Iesu na haan sot tana. 34 Bia Iesu ga haan sot ga nas a haleng na mataniabar sakit, ma ga manga marmaris ta diet kanong diet ga ngan hoing ra sipsip ing taia ta tena harbalaurai uta diet. Io, ga hatahun wara hausur diet ta ra haleng na mangana linga. 35 Bia gata matmatarahien, ira nuna bulu na hausur diet ga hanuat taar tana ma diet ga tangai tana bia, “I ta manga matmatarahien tuai um ma dahat kis taar um ta kan ra hanua bia. 36 Tulei sei um ra mataniabar ing diet naga haan taar ta ira taman i huteta, ma diet naga kul adiet ta nian.”

37 Io, Iesu ga balu diet bia, “Muat at, muat na tabar diet.”

Ira nuna bulu na hausur diet ga balu ia hoken: “Dahat na kul ta haleng na nian hoeh? Bia irua maar na kinewa a mah pa na haruat.”

38 Io, Iesu ga tiri diet bia, “Aisa sibana beret kaikek? Muat haan baa muat naga nas!”

Bia diet gata nas tar diet ga hasasei ia bia, “A liman na sibana beret ma airua kirip mah.”

39 Io, Iesu ga tangai ta ira nuna bulu na hausur bia diet na palagai harbasianei mon ira mataniabar ma diet na kis tano hura i guguhuan. 40 Io, ira mataniabar diet ga kis hoing di gata ru harbasianei tar diet hua, aring a maar ma aring liman na sangahul. 41 Iesu ga kap lah ira liman na sibana beret ma ira airua kirip, ga tadeng uram ra mawai, ma gaam sasaring uta ira nian. Ga bingit ira beret gaam tar tikanei ma ira kirip ta ira bulu na hausur, ma diet gaam palau ira mataniabar. 42 Diet bakut diet ga iaan diet gaam honga. 43 Ira bulu na hausur diet ga sang hahung ra sangahul ma irua na kalot ta ira simsibana kirip ma ira beret ing diet ga ien sibaan. 44 Io, di ga was sen lah mon ira tunana nalamin ta ira mataniabar bakut ing diet ga iaan. Ma ira tunana diet ga haruat ma ra liman na arip.

45 Ta iakano pakana bung at, Iesu ga tangai ta ira nuna bulu na hausur bia diet na luai tana tiga mon urau tiga palpal tano tamat na taah kis taar tano taman Betsaida, ma ia baa na tulei sei ira mataniabar. 46 Bia gata nas tulei tar diet, ga hanhut uram ra uladih wara sinsaring. 47 Ma bia gata bungbung tuai um, Iesu sen um ga kis taar aram ra uladih, ma no mon, iakana tuai nalamin tano taah kis. 48 Iesu ga nas ira nuna bulu na hausur ma kana diet ga paapet haan ma ira wasa, kanong diet ga halisa harusa ma no dadaip. Io, kaia dak ra aihat na kareka ra malaan ga hanuat taar ta diet. Ga hanan haan mon naliu tano ula taah ma ga wara hanhan sakit diet kaia. 49-50 Bia diet ga nas ia ga hanan haan tano ula taah diet ga lik bia a tanua ia, diet gaam kup kanong diet bakut diet ga nas ia ma diet ga burut. Kaikek at Iesu ga habalamasa diet ma ga tangai ta diet bia, “Iau mon! Waak muat burburut!”

51-52 Io, ga karuas laka taar tano mon uram ta diet ma no dadaip ga pataam hatikai. Ira bulu na hausur diet ga nguangua ma diet ga manga karup kanong pa diet ga nas kilam no kukuraina tutun tano hartabar ta Iesu ta ira liman na arip na tunatuna. Warah, kanong ira bala diet ga manga dadas.

53 Bia Iesu ma ira nuna bulu na hausur diet ga balas tar no tamat na taah kis, diet ga hanuat taar tano hanua Genasaret. Kaia, diet ga his kahai tar no mon. 54 Bia diet ga haan talur no mon, habir a mon ma ira tunatuna diet ga nas kilam Iesu. 55 Io, diet ga hilau harbasiai taar ta ira tamtaman ta iakanong ra hanua ma diet ga kap ira ina minaset naliu ta ira kunuban. Bia gahim sibaan diet ga hadadei bia Iesu ga kis taar kaia, diet ga kap at ira ina minaset ukaia. 56 Ira taman bakut ma ira pisa na hala bakut ing Iesu ga haan kaia, ira mataniabar diet git kapkap hahuat ira ina minaset ma diet git bulbul nalamin tano taman. Io, diet ga ianga marmaris ta Iesu bia ira ina minaset diet na sigirei mon no ngusuna no nuna sigasigam. Ma diet bakut ing diet ga sigirei ia, ira nudiet minaset ga pataam.