1 Ena goma God ka wai di bole pena gale Isirel ibal terala dire, kile kaman ka di tongwa ibalin kobi ana dire deminin si God tenama dire, kile kaman ka di maribe erungure, te ka main ogu ta ibal kobe kiingwa para iru dire kiimue. 2 Ibal ka main sel ogu ta kiingure, kiile sutan dimue. Kiile ta kana giran dungwa enderin derin dongwa ain koli dungure, te komina birete God tongure kane milungwa bol kola dungure, te kiile iray kaan God kegemama yongwa ain dimue. 3 Kiile ta i pisere gal ta kiile ta ala wen si pere dimue. Si pere dungwa kiile iray kaan God kegemama wen yongwa ain dimue. Gal ta sel ogu kana giran si pere dungure, te gal ta kiile ala dungwa i, si pere dimue. 4 Kiile iray kalkan ala iwe. Ulgu galungwa de minanin wai sungwa bol ta kobile gol ere yongwa dungure, te God kile kaman ka di Mose tongure, kobile sutan ka minin ganin i bolimina bilungwa bokisi ta ala yongure, bokisi kole kole para bolimina kobile gol ere yongwa dungure, te goma Isirel ibal gariba simi yongwa milungure, God komina ta kaan mana tongure, komina mugu ta kobile gol ere yongwa ali yongwa mugu iray bokisi bil para ala yongwa dungure, te yal bil Eron kolaa goliba kwi dainin bile arin sungwa, para bokisi bil iray ala yongure dimue. 5 Te bokisi bil iray mine kol kamin ibal sui kaan Serabin milungwa mere, eri baale ere yomue. God naabile aw dungwa mere kal sui i maribe eremue. Te kal sui i kain dire dire bokisi kana giran yobile suna eremue. Isirel ibal kal digan ere taalime erungwa, God kire di erama dire, Yuda ka main kenin erungwa yal bil kabe sire mayan a pilay sire, bokisi kana giran bolimina bile tomue. Ka bile i tega i, main para muru bile i teralba, malia kuunin ta paikimue.

6 Ena Isirel ibal kalkan iru aa tekun erungure pare, ibalin kobi ka main kenin erungwa yal kobe, sel ogu kiile ta kana giran dungwa, are kaun kaun pi ala pire inin ka main konagi ere milemue. 7 Ere milimba Yuda ibal ka main kenin erungwa yal bil, yalini yal taran tawle kiile ta ala kol dungwa ali ongwa paamue. Kamin kaun kaun binanbile ala ta pekire, me erin ta wei sungure are kaun taranta tawle ala ongwa, iru ere milemue. Ala ongwa kaun i, yalini inin te ibal kobe kal digan ere taalime erungwa pire, kabe sire mayan ire ala omue. Kal digan ere taalime erungwa i, God kire di ere tenama dire, kabe sire mayan ire ala omue. 8 Kal main iru erungwa i pire, God Kegemama Iban ka iru di gawa di na ibal kobe na tongwa, “Ka main sel ogu iray te kile kaman ka goma di tongwa imo dinamia, ena ibal kobe God milungwa gul inin nama dire, kol ta bala di ibalin kobe ta tekenangwa paamua.” 9 Te malia ibal kobe main goma dungwa i duulin bile ere milungwa, di bilemue. Di bilungwa main iwe. Ibalin kobi kabe si gale God tomba, ibalin kobi pirin pai imo dungure, nomanin ta naabilekungwa paamue. 10 Nomanin ta naabilekungwa main iwe, main goma dungwa i, ibal komina mawal erangwa, te ibal nil taw mawal erangwa, te ibal gain bigin sinangwa, kile kaman ka iru tawle di maribe eremue. Kile kaman ka i dungwa iwe, nomanin te den miriin suna ka ta dikire, gain mina konagi paangwa mere, tawle di tomia, ena God kile kaman ka te main ta kwi paangwa u maribe ongwa kaun, main goma dungwa iray wei sinamue.

11 Wei sinamba, Kirisito kaya ure Yuda ka main kenin erungwa yal bil milungwa mere milere, main ta wai paangwa ere ibal tomue. Te yalini ka main konagi iray erungwa iwe. Ibal ka main sel ogu inin kiingwa, ogu iray ala pire konagi erangwa tamama. Ogu ta ibal kobe ta kiikungwa, God milungwa mina guman kol mile konagi iray ere milemue. 12 Kirisito kamin ai ali pire Yuda ka main ogu bil kegemama yongwa mere, God milungwa mina ginin taranta tawle pi milemue. Pi milungwa kaun i, yalini bolima meme te bolimakau gawlin sire mayan God terala dire, ire pekimba, yalini inin mayan garu di tere pi milemue. Na ibal kobe sigare kule u wai pi milabingal milabina dire, yalini inin mayan garu di tere pi milemue. 13 Te ibal taw kal main ta paikungwa ere si kunal si milungwa, bolima meme mayan te bolimakau mayan, te bolimakau gawlin si galungwa ulgu iray, bile ibalin kobi tomia, ena ibalin kobi gain mina tawle aa te wai ere tomue. 14 Main iru paangwa mere, kawen eremia, ena Kirisito mayan garu dungwa, kirara wi yebe namue. God Iban yobilaan pai Kirisito tongwa, yalini inin miin te mayan God tomue. Tongwa kuunin wen paimue. God mile paangwal paangwa, na ibal kobe nil konagi ere yalini terabina dire, Kirisito mayan garu di na ibal kobe tongwa, ena na kalkan paikungwa piserabingire, pirin gule ere na ibal kobe na tere nomanin naabile na ibal kobe tenamue.

15 Ena ka di i tega main iru paimia, Kirisito ka wai di bole pena gale ibal terala dire, kile kaman ka kwi di ibal tomue. God mile, “Na duulin bilana wo,” di ibal tere, “Kalkan wai dire di painangwal painangwa main ere i teralwa,” dire aan kere ye ibalin kobi tongwa u maribe nama dire, kile kaman ka kwi iray di ibalin kobi tomue. Kalkan i, u maribe nangwa main iwe, goma kile kaman ka di tongwa ibal si keli sire kal digan erungwa, God pirin i gule ere ibalin kobi tenama dire, Kirisito gulemue.

16 Yal ta gulangwa kaun inin pire, “Na kulgal bona obin iru iru so,” dire ka minin ganin bile paalangwa, ena yalini kirara gulangwa kanere, kulgal bona obin sinangwa paamue. 17 Iru paamba yal iray kwi imo milungwa kaun ka minin ganin bile paalungwa i pi nima ta pekungwa, ka goma minin ganin bile paalere, gulungwa kaun ka iray i pi nima nangure, inangwa paamue. 18 Iru paimia ena God ka wai di bole pena gale Isirel ibal terala dire, goma kile kaman ka di tongwa pi nima nama dire, kabe si gule mayan garu dimue. 19 Iru erungwa iwe. God kile kaman ka di Mose tongure, Mose ka di Isirel ibal tere pare, bolimakau gawlin si gule mayan irere nil bole nuure kile kaman ka minin ganin iray te ibal para mayan bile tomue. Yalini eri te kaan kisop, yaan ta ire bolima siipe siipe igin baa ta eri yaan mina daare, mayan ali sigile bile tomue. 20 Bile tere ka iru dungwa, “God ka wai di bole pena gale i terala dire, kile kaman ka di i tongwa pi nima nama dire, mayan bile teiwa. I ka dungwa i pire wiina ere tenana dire, God iru piremua.” 21 Iru bile tongwa mere, Mose ka main sel ogu bile tere, te ka main ogu iray kal para muru bile tomue. 22 Ka iru diga main iwe. Kalkan para si kunal sungwa u wai nama dire, Mose kile kaman ka main i, “Mayan bile tomua,” dimue. Dungwa mere mayan garu ta dikinangwa, ena kal digan ere taalime erungwa, God ta kire di ere tekenangwa paamue.

23 Ena kamin ai kal wai ere ibal kobe tongwa mere, gariba gul kalkan i di bilebinga, kalkan si kunal sungwa mayan bile tere u wai omue. U wai omba kamin ai kal wai ere ibal tongwa kirara pi nima nama dire, Kirisito mayan garu di na ibal kobe tongwa, wi yebe nangwa paamue. 24 Wi yebe nangwa iru. God ogu ta painama dire, ibal ka main ogu kiingwa, kamin ai mere kiingwa, Kirisito ogu iray pi ala ta pekemue. Ta pekire yalini kirara kamin ai ala pirere, God milungwa mina na milebinga pire, ka sirin bile God tomue. 25 Yuda ka main kenin erungwa yal bil mile, ka main sel ogu kiile ta ala wen dungwa me erin kaun kaun ginin taran taran ala pire, kabe ta sire mayan ire omue. Ginin ta ta binanbile iru omba, Kirisito ginin taran tawle mayan garu di tongwa paamue. 26 Yuda ka main kenin erungwa yal bil ginin ta ta binanbile erungwa mere, Kirisito para iru erangwa, ena God kalkan ere yongwa kaun Kirisito yalini guli nangwa nangwa namba, iru erangwa tamama. Kamin kaun wei sinangwa kaun, malia yalini gin taran kirara u ibal ongwa, ibal kobe kal digan ere taalime erungwa, pirin gule ere terala dire, yalini inin mayan garu di tomue. 27 Ibal para ginin ta gulangure pare, mile pai erungwa mere God kanere, “Pirin paimua,” di tenam mo, di tekinam mo, iru obin si tenangwa paamue. 28 Ibal gin taran gulungwa mere, Kirisito gulungwa, ibal kobe kal digan ere taalime erungwa, Kirisito ibal kobe pirin paangwa irere gulemue. Yalini kaun ta kwi ere ime unamba, ibal kal digan ere taalime erungwa yalini kaun iray ibalin kobi pirin ta ikire, ibal kobe yalini unama di pire suul mile kanungwa, ibalin kobi sigare kule u wai ongwa, pi nima nama dire unamue.