32
Yakobo ikatubayasi
bego Iso ivaalobode tetelina
bego Iso ivaalobode tetelina
1 E kina go Yakobo mana bodao nakae sitáoya Lebani sikalave go, siketoiya. Siketoiya sinonoina go, Yaubada ina aneroseyao sima Yakobo sivalobode. 2 E Yakobo igitedi idigo kana,
‘Ame Yaubada ina tovayaviyayao!’
Tuwo amo asayana ivayou Makanaim.‡Makanaim: Ame youyana ana yagoina moe boda tovayaviya aiyuwo. Moe unana kidi Yakobo boda tayamo go, Yaubada ina tovayaviyayao boda aiyuwoina.
3 E Yakobo ina lobutu adi tolokoinayao ietunedi sivakumgo sina tuwowona Iso yaina, tauyana ikaaiyaka Seira goi, moe Idom dadavina. 4 Ego mainao tolokoinayadi ilatuwokoidi kana,
‘Kōna tuwowogu Iso kolatuwōko kami,
“Guna tomoya, yau Yakobo im pákwana boi asuvaadavada Lebani taiyao go, ame bogina akaluvilamna. 5 Guna bulumakau, guna ase, guna sipiyao, guna gotiyao be guna pakonayao vevina be koroto amedi. E tauna tomoya, ame livalayana aetune iwo yaim bego kusosalegu.” ’
6 Tuwo moitamo tolokoinayadi silokoina sina Iso silatuwoko. Silatuwoko ikavava, sikaluvila sima Yakobo silatuwoko kadi,
‘Tuwowom Iso bogina kalatuwoko. Tauyana imamaima bego ivalobodem go, koroto adi badabada 400 taiyao simamaima.’
7 E livalayana Yakobo inove, imatoita be nakae atena iyova. Tuwo ina bodao ikiwotaidi boda aiyuwo. Aiyuwoina ina yoguyoguyao, moe ina sipi, ina bulumakau be ina kameri ikiwotaiyuwedi. 8 Ina nuwonúwana kana,
‘Neta Iso ima boda tayamo ilauidi, imaiko go, boda tayamo itoboinedi sisiya dedevidi.’
9 E ikiwotaidi ikavava, ikawanoi Yaubada yaina, idigo kana,
‘Tubugu Eberamo be tamagu Aisake idi Yaubada, kunovēgu. Yauwe, boi kom kulatuwokoigu kam,
“Kwaluvīla kūna im kasa be nakae osemowo yaidi, e bei ayabobonem.”
10 Yau im pákwana nakae, yau giyaigu go, tuwo bogina kulokategu be nakae im guinuwa goi kom aba numisa yau yaigu tuta liliuna. Moe moitamo. Boi nimatu kulatuwokoigu ana Lebani goi akaaiyaka go, sákala Iyoridani ame boi asaidamane, guna kaituko kaka akavale. Go sem ame tutayana bogina aguyau be nakae asusáila, boda aiyuwo sikaaiyaka. 11 Ame tuta tuwowogu Iso yaina kuyavēgu. Amatoita tauyana bei ima vevina ma natudiyao be yau ilauima. 12 Kunuwaisi boi kom bogina kulatuwokoigu kam,
“Bei ayabobonem be nakae akisailim, im boda adi badabada nakae ediédila mamaya goi, geya itoboinemta kwatuyaividi.” ’†Abv 22:17, 28:13-15.
13 E tuwo amoko goi ikaaiyaka imasisi. Ego ina yoguyoguyao maniyedi ikabidi, bei tuwowona Iso ivini, ina yabobona. 14 Yoguyoguyadi ame nakae:
| Yoguyogu | Badabada |
| Goti bovavina | 200 |
| Goti bolamo | 20 |
| Sipi bovavina | 200 |
| Sipi bolamo | 20 |
| 15 Kameri bovavina ma bonatudiyao | 30 |
| Bulumakau bovavina | 40 |
| Bulumakau bolamo | 10 |
| Ase bovavina | 20 |
| Ase bolamo | 10 |
16 Ago yoguyoguyadi ikiwotaidi yauwo ituli ituli. Ikiwotaidi ikavava, e ina pakonayao ilatuwokoidi idigo kana,
‘Koroto tamo tamo yauwo tamo tamo imatakavate. E kovakūmgo go, taabu koolamgōgana, go sem imi ketoiya kovaamasāba.’
17 E yauwo vakuumgoina ana tomatakavata ilatuwoko idigo kana,
‘Tuwowogu Iso bei ivalobodem be ilumadadem kana,
“Im tomoya avatau? Nako kunonoina? Ame avatau ina yoguyoguyao?”
18 Tutayana nakae ilumadadem, kom kam,
“Ame im pákwana Yakobo ina yoguyoguyao. Ame ietunegu amedi avinim, ame nakae ina yabobona kom guna tomoya yaim. Ago tauyana mligu goi imamaima.” ’
19 E yauwo adi tomatakavatayao tamo tamo nakae ilatuwokoidi, idigo kana,
‘Tutayana Iso kobabane, nakae bei kolatuwoko. 20 Ego konuwookavāte kami,
“Im pákwana Yakobo mlima imamaima.” ’
Yakobo ina nuwonúwana kana,
‘Ame yoguyoguyadi moe guna yabobona sivakumgo go, yoguyoguyadi goi anúwala tauyana yaina bei guna goyo inuwotao go, agu gogo yaina bei dedevina.’
21 Tuwo ina yoguyoguyadi sivakumgo sina go, Yakoboyana ina yoyou parai goi ikaaiyaka.
Yakobo Yaubada taiyao sivaadidídina tetelina
22 E vanuwo bogina isabamgo, Yakobo itáoya monenao adi taiyuwo, ina pakonayao adi taiyuwo be natunao koroto yawou tayamo ietunedi sivakumgo sina sákala Yaboka sisaidamane. 23 E ina pakonayao nakae ilatuwokoidi kónana sikavaledi mlidi sisaidamanedi. 24 E kina anetava ikaaiyaka. Ikaaiyaka go, koroto tayamo isowóduwo ima Yakobo iyoisi taiyao sivadidídina ana kadókana botomotomo.†Ose 12:3-4. 25 E korotoyana igite bego geya itoboineyeta Yakobo ikalisave, tuwo Yakoboyana sokisokina luluna ikikapusi, e dibuwatuna itakapusi. 26 E korotoyana idigo kana,
‘Kwalavēgu! Bogina botomotomo.’
‘Geya akalavemta ana kadókana kukaipakuyegu’, Yakobo kaena.
27 E korotoyana idigo kana,
‘Yoigu Yakobo’, Yakobo kaena.
28 E korotoyana idigo kana,
‘Bogina kuvayaviya Yaubada be koroto yaidi goi go, kom kukalisavedi. Tauna geya tuwaina yoim Yakobo.†Abv 35:10. Kom yoim Isileli.’‡Isileli: Ame youyana ana yagoina geya imavadeta. Itoboineda takaigavile kada, ‘Yaubada ikaalibúbuna o iilovina.’ O itoboineda takaigavile kada, ‘Ivayaviya Yaubada yaina.’ O itoboineda takaigavile kada, ‘Yaubada ivayaviya.’
29 E Yakoboyana idigo kana,
‘Siyagu, kom yoim manakoyoina?’†Tot 13:17-18.
Go korotoyana idigo kana,
‘Kaga kulumadadanae yoigu manuna?’
Go amoko goi Yakoboyana ikaipakuye. 30 E Yakobo idigo kana,
‘Yaubada maisina agite go, geya availaita.’
Tauna moe pasina asayana ivayou Paniyeli.‡Paniyeli: Ame youyana ana yagoina moe Yaubada maisina.
31 E níyala itukotuko go, Yakobo itáoya Panuweli‡Panuweli: Ame asayana moe Paniyeli go, ana gínina ituli. ikalave. Ego sokisokina itakapusi, tauna isakau. 32 Tauna Isileli tubunao ame tutayana yoguyogu sokisokina luluna goi woliwoli poowouna geya sikanikani unana Yaubada boi Yakobo sokisokina luluna ikikapusi, tauna woliwoliyana geya sikanikani.
‡32:2 Makanaim: Ame youyana ana yagoina moe boda tovayaviya aiyuwo. Moe unana kidi Yakobo boda tayamo go, Yaubada ina tovayaviyayao boda aiyuwoina.
†32:24 Ose 12:3-4.
‡32:27 Yoim manakoyoina: Anerose bogina iyagoi Yakobo yoina. Tutayana Yakobo ikatumapu ina sinapu ikaiwoduwe unana Yakobo mana yagoina. Ana yagoina moe tosónana. Tupwana nakae tutayana Yakobo ikatumapu be yoina ivatoi ikamoitamo bego kina ina sinapu igoyo.
‡32:28 Isileli: Ame youyana ana yagoina geya imavadeta. Itoboineda takaigavile kada, ‘Yaubada ikaalibúbuna o iilovina.’ O itoboineda takaigavile kada, ‘Ivayaviya Yaubada yaina.’ O itoboineda takaigavile kada, ‘Yaubada ivayaviya.’
†32:29 Tot 13:17-18.
‡32:30 Paniyeli: Ame youyana ana yagoina moe Yaubada maisina.
‡32:31 Panuweli: Ame asayana moe Paniyeli go, ana gínina ituli.