Yeisu ina taoyamna mlina:
Mana tovatotowanayao Galili goi tetelidi
Mana tovatotowanayao Galili goi tetelidi
21
(Iyoni 21:1-25)
Yeisu ina sowóduwo ina tovatotowanayao
ainima aiyuwo yaidi Galili goi tetelina
ainima aiyuwo yaidi Galili goi tetelina
1 Amo dogoiyadi mlidi Yeisu aiyuwoina Tiberiyasi Bwaena goi toinina ivagitako kai ina tovatotowanayao yaima. Ina vagitakwanayana ame nakae: 2 Saimoni Pita, Tomasi (tauyana youyuwoina Didimosi), Nataniela guma Kena (moe Galili ana dadava sinaena), kai Sebedi natunao be nakae ina tovatotowanayao adi taiyuwo taiyao kakaaiyaka. 3 Kakaaiyaka, Saimoni Pita kana,
‘Yau ana áuwata.’
Kai kama,
‘Dedevina, tao.’
Tuwo kana oga kasowoya kana káuwata. Sabamgo ana madabokina goi kauwoúwata go, geya tayaamo íyana kakone geya.†Luk 5:5.
4 E nobuyana nava matagougouna Yeisu mamaya goi iitaoya go, kai tovatotowanayama geya kakinaneyeta. 5 E Tauyana itamaiwo yaima kana,
‘Tawou! Íyana kogite, gea geya ae?’
Kai kadigo kama,
‘U, geya toina!’
6 ‘Imi úwata kolāve oga kakatai dadavina goi bei íyana kobabane’, Yeisu kaena.
E tuwo moitamo oga kakatai dadavina goi kalave, e íyana badabadaidi kakonedi, úwata ikayaoda, tauna geya itoboinemeta bei uwatayana kabiu ima oga sinaena kadodoi.†Luk 5:6. 7 E yau Yeisu ina kalo Pita alatuwoko kagu,
‘Saimoni Pita, mae doyava moe ida Tomoya!’
E tuwo guna livalayana inove, ana kwama ikabi ipaiwae. Tauyana mana kwama giyaina goi ipaaisewa. Tuwo ana kwama ipaiwae ikavava, isou ina bwae goi isina iyava ina. 8 E kai go Tomoya ina tovatotowanayao madabokima nava oga goi kaatoyava íyana ma uwosidi kaabiudi. Bogina kuyagoi. Mamaya geya aduwanau geya, go sem nakae mita ana badabada 100.
9 E tutayana kasou labutabuta goi, kagite Yeisu yeu bogina idimili, yatana íyana igabugabu be nakae beredi kikina sikaaiyaka. 10 Tauyana ilatuwokoima kana,
‘Segowo, imi íyana maniyedi makaitaga kookonedi komēdi.’
11 Ego Saimoni Pita isinalaga úwata ibiu iyave ina lebutabuta goi. Uwatayana ikayaoda íyana gagaidi be badabadaidi, nakae ana badabada 153. Iyanayadi badabadaidi go, uwatayana geya itaiseta geya! 12 Yeisu kana,
‘Kōma kokāika!’
E geya vatau tayaamo kai ina tovatotowanayao yaima goi mana katepatu Tauyana ilumadade kana,
‘Kom moitamo avatau?’
Bogina kayagoi Tauyana Tomoya. 13 Tauyana ima berediyadi ikabidi ivinima. Iyanayadi nakae iguinuwe.
14 Moe bogina sivato Yeisu tokámasa yaidi ina taoyamna mlina goi isowóduwo kai ina tovatotowanayao yaima.
Yeisu ina lumadádana
Pita ina matakoi manuna tetelina
Pita ina matakoi manuna tetelina
15 E tutayana kakáika ikavava, Yeisu Saimoni Pita ilatuwoko kana,
‘Saimoni Iyoni natuna, kumatakoiyegu gagaina namliyeta ame tauyadi?’
‘U, Tomoya. Kom bogina kuyagoi bego amatakooiyem’, Pita kaena.
Yeisu kana,
‘Guna lamiyao kuvaakanīdi.’
16 Sivayuwoina Yeisu kana,
‘Saimoni, Iyoni natuna, kumatakoiyegu?’
‘U, Tomoya. Kom bogina kuyagoi bego amatakooiyem’, Pita kaena.
Yeisu kana,
‘Guna sipiyao kulokaayasēdi.’
17 Yeisu sivatonina kana,
‘Saimoni, Iyoni natuna, kumatakoiyegu?’
Go Pitayana bogina nuwona imou unana sivato ilumadadeko kana,
‘Kumatakoiyegu?’
Tauna nuwona imou kana,
‘Tomoya, kom kaga liliuna kuyagoi. Kom kuyagoi bego amatakooiyem.’
Yeisu kana,
‘Guna sipiyao kuvaakanīdi. 18 Nakae kuguinuwe go, ame alatuuwokoim kunōve: Boi tutayana kom tubuwau, toinim am gadíwana kusiko be kuuketoiya nako goi latuwom. Go nava tutayana bogina kukaitomoya, e nimam bei kuyosaledi go, ituli ta tomota be isikoidi namliyeta inavem kuna nako goi geya latuwom.’
19 E moe livalayana goi Yeisu italavaita ava kámasa goi Pita bei Yaubada ina togaga ana káeyana ivagitakoe. Yeisu ibóbwara ikavava, Pita ilatuwoko kana,
‘Kusabokuuliyēgu.’
Yeisu ina livala Iyoni manuna
20 Pita itugavila yau Yeisu ina kalo igitegu asabokuuliyedi. Yau Tomoya ina kalo boi Basitáwana Aikanina goi Yeisu kikina akanaataliya nimagu asabadiye†Iyo 13:25. kagu,
‘Tomoya, avatau bei inuwotuluyem?’
21 E tauna Pita igitegu, Yeisu ilatuwoko kana,
‘Tomoya, go amo tauyana manakae?’
22 Go Yeisu kana,
‘Neta latuwogu tauyana ikaaiyaka ana kadókana akaluvila ama, moe geya tayaamo kaga yaim. Kom to kusabokuliyeeyamōigu.’
23 E tauna moe livalayana inúnuwo ina Yeisu ina bodao yaidi bego yau bei geya akamaseta. Go Yeisu moe nakae geya ibobwareta bego yau geya akamaseta, go sem Tauyana kana,
‘Neta latuwogu tauyana ikaaiyaka ana kadókana akaluvilamna ama, moe geya tayaamo kaga yaim.’
Iyoni ina livala ana kaba lukavava
24 Yau Yeisu ina tovatotówana tayamo, moe dogoiyadi manudi ataalavaita be nakae dogoiyadi aaginidi. Ago tayagoi bego guna talavaitayana mooitamoina.
25 E dogoi badabadaidi tuwaina Yeisu iguinuwedi. Neta ina guinuwayadi madabokidi buki goi aginidi, anuwatu poyapoya ana madabokina buki kaka go, nava ina guinuwa tetelidi geya alukavavedita.