4
Iyona ina egamogamogu go,
Yaubada ina kanuwóiya tetelina
Yaubada ina kanuwóiya tetelina
1 E Yauwe ina guinuwayana moe igoyo, igoyo toina kina Iyona ina nuwonúwana goi, tauna gamona igoyo toina. 2 Tuwo ikawanoi Yauwe yaina idigo kana,
‘¡Iyaa! ¿Yauwe, manakae? ¿Boi guna kasa goi nakae adige bei isowóduwo ae? Moe pasina woiligu asiya bego ana Tasisi unana bogina ayaagoim bego kom Yaubada kanuuwoiim be nuwokaapisim. Tomota idi goyo goi kumeesayágana, im lokata ivakaigaga be nakae im vailai goyogoyoina manuna kutavívila.†Tat 34:6; Yoy 14:18; Nie 9:17; Sam 86:15, 103:8, 145:8; Iyl 2:13. Tauna woiligu asiya. 3 E tauna Yauwe, yawoigu kukabiyāmo†1To 19:4. unana ámasa dedevina yaigu go, ma yawoigu yaigu geya idedevineta. Tauna yawoigu kukābi.’
4 Go kina Yauweyana idigo kana,
‘¿Manakae? ¿Itoboine gamom igoyo toina gea geya?’
5 E Iyonayana itáoya, asa ikalave go, ina bomatu dadavina goi yoyou tayamo iyowo. Iyowo ikavava, yoyouyana nugonina goi itusobu iituyáwata. Latuwona bego igite kaga bei isowóduwo asayana goi.
6 E Yauwe Yaubada aba kinana tayamo iguinuwe. Ilovina bego yaguyaguma tayamo itabo, ibíbina ina Iyona yatanaina ivainugone, e bei tauyana ina kaiyaka goyogoyoina goi ivaite. E yaguyagumayana manuna iuyáwana gagaina toina.
7 E tomo ana sipasipa iliiyabale go, Yaubada motemoteta ietune ina yaguyagumayana isiu ikani. Ikani, e yaguyagumayana imémala. 8 Niga go níyala ituko, Yaubada yágira bomatu yaviyavina ietune ina Iyona yaina goi. Tuwo níyala Iyonayana dabana ivayavisi gagaina, e imataginigini nakae latuwona ikámasa. Tuwo tauyana mana egamogamogu idigo kana,
‘Ámasa dedevina yaigu go, ma yawoigu yaigu geya idedevineta.’
9 Go kina Yaubada idigo kana,
‘¿Manakae? ¿Itoboinem gamom igoyo yaguyaguma giyaina ana kámasa pasina?’
Iyonayana idigo kana,
‘¡Itoboinegu gamogu igoyo toina!’
10 E tuwo kina Yauwe idigo kana,
‘¿Kom yaguyagumayana giyaina manuna nukotom igoyo ae? Go yaguyagumayana manuna geya kupaiseweta nakae geya tayaamo kaga kuguinuwe bego ibíbina. Ego sabamgo tayamo goi itabo go, sabamgo aiyuwoina goi ikámasa. Manuna nukotom igoyo go, moe dogoi besobeso. 11 Ninivei moe asa gagaina nakae tomota adi badabada 120,000 be nakae yoguyogu badabadaidi sikaaiyaka go, tomotayadi sitamoogemoge. ¿Manakae? ¿Itoboinegu amo asayana gagaina anuwokapisiyedi namliyeta yaguyagumayana gea geya?’