2
Yeisu topem ikideedevine tetelina:
Mana lovina tomota idi goyo inuwotaoidi
Mana lovina tomota idi goyo inuwotaoidi
(Madiu 9:1-8; Luke 5:17-26)
1 Niga Yeisu ikaluvilamna ina Kapaneumi goi go, maliyalina maniyedi sikavava, toni kasa sinove bego Tauyana bogina ima vada goi ikaaiyaka. 2 Tuwo tomota badabadaidi sima vadayana goi situgúguna, tauna sinaena ikayaoda, e totom kikina nakae ikayaoda. Tomota sikaaiyaka go, Tauyana Yaubada ina vala ivatuulukoidi. 3 Ivaatulúkwana go, koroto adi taivasi topem ma liyaliyakaina sime. 4 Latuwodi sisiuye sime Yeisu yaina goi go, boda isaki pasina geya itoboinedita. Tauna aitámana toluye goi simwerae sinave vada yatana goi átava giyaina sikibale. Ikavava, topemyana ma liyaliyakaina sisoilave isou Yeisu matana goi siyato. 5 Siyato go, Tauyana idi numisa igite, tuwo topemyana ilatuwoko idigo kana,
‘Natugu, yau adigo kom im goyo adi nuwotao bogina kubabane.’
6 E kidi go Yaubada ina Katukeda ana tovatulukwanayao maniyedi amoko goi siitusobu taudiva nuwodi goi sinuwonúwana kadi,
7 ‘Iyaa! Amo korotoyana manakae! Idigopopóita! Tauyana bego ieyaubada! Geya vatau tayaamo itoboine bei tomota idi goyo inuwotaoidi. Moe Yaubada anetava itoboine.’† Sam 32:5; Ais 43:25.
8 E Yeisu balomaina goi iyagoi manakaedi sinuwonúwana, tuwo ilatuwokoidi idigo kana,
‘Komi kaga unana nuwomi goi moe nakae konuwonuwone? 9 Gobe ava livala ikakapu topemyana alatuwoko? Kagu, “Kom im goyo ana nuwotao bogina kubabane”? Gea kagu, “Kutāoya be im sita kukavāle, e kuketōiya”? Nako ikakapu? 10 E itoboine koyagoi Tomalatomota mana lovina poyapoya goi tomota idi goyo inuwootaoidi.’
Yeisu itugavila topemyana ilatuwoko idigo kana,
11 ‘Alatuwokoim kutāoya, im baseko kwābi, kwaluvīla kūna im kasa!’
12 Tuwo topemyana itaoya, e mainao ina baseko ikabi, boda liliudi matadi goi iketoiya vadayana goi isowóduwo ina! Tauna boda madabokidi sikainaopa nakae Yaubada ina togaga ana káeyana sikamoitamoe kadi,
‘Guinuwa amo nakae boi geya tayaamo tuta tagite!’
Yeisu Livai iiduduwe go, toogoyoidi taiyao sikakáika tetelidi
(Madiu 9:9-17; Luke 5:27-32)
13 Niga Yeisu ina Galili labutabutaina goi, tuwo boda gagaina simamaima Tauyana yaina go, ivatuulukoidi. 14 Ikavava, iketoiya inonoina go, Alipiyo natuna Livai igite, takisi ana kaba gogo goi iitusobu ipaaisewa. Tuwo Yeisu ilatuwoko idigo kana,
‘Livai, kūma kusabokuliyēgu!’
Tuwo moitamo itaoya, Yeisu isabokuliye.
15 Niga Yeisu mana tovatotowanayao taiyao sina Livai ina vada goi áika manuna. Amoko goi takisi ana togogoyao be ituli ta toogoyoidi badabadaidi sikaaiyaka Yeisu mana tovatotowanayao taiyao sikakáika. Bogina kuyagoi. Booda Yeisu sisabookuliye. 16 E sikakáika go, kidi Parisi amoko goi sikaaiyaka, tauyadi Yaubada ina Katukeda ana tovatulukwanayao. E Yeisu sigite ikakáika takisi ana togogoyao be ituli ta togoyoidiyadi taiyao. Tuwo ina tovatotowanayao silatuwokoidi sidigo kadi,
‘Kaga unana ami tovatulúkwana takisi ana togogoyao be ituli ta toogoyoidi taiyao sikakáika?’
17 Go kina Yeisu inovedi, ilatuwokoidi idigo kana,
‘Gwa. Tauyadi madi deedevina geya latuwodi doketa, go sem kidi tokatówana latuwodi doketa. Yau ama geya tauyadi toinidi sinuwonúwana bego kidi tokibóbwata aduduwedi geya, go sem ama toogoyoidi aduduwedi bei situgavila.’
Lumadádana diyakímwana manuna: Lava vau sinapu vau
(Madiu 9:14-17; Luke 5:33-39)
18 E Iyoni ina tovatotowanayao be nakae kidi Parisi sidiiyakímwana Yaubada manuna. Tuwo tomota maniyedi sima Yeisu silumadade sidigo kadi,
‘Iyoni ina tovatotowanayao be nakae Parisi idi tovatotowanayao sidiiyakímwana go, kom im tovatotowanayao manakae geya sidiyakimoneta?’
19 Go kina Yeisu idigo kana,
‘Neta nai ana káika goi tonai koroto nava yaimi ikaaiyaka, manakae? Nai ana toyokoyao itoboinedi bei madi nuwomou sidiyakímwana? Geya itoboinedita sidiyakímwana neta tonai koroto nava yaidi goi ikaaiyaka ae? Go sem itoboinedi madi uyáwana sikakáika ae? 20 E diyakímwana ana tuta nava imamaima. Amo tutayana tonaiyana bei siyoisi sinave, e tuta amo goi baige tauyadi sidiyakímwana. 21 E livalakaibala tayamo vatulukwana bogo be vatulukwana vau manudi avatulukoimi bei koyagoi. Geya vatau tayaamo boboda vau ikabi, ana kwama bogo taaporaina goi igilumipatuko, govila bei bobodayana ikatumásina, e kwama bogoyana itaisa go, ina taisayana bei gagaina. 22 Aiyuwoina geya vatau tayaamo oine vau ikabi, opo bogo goi isaligogo, govila bei oine vauyana ana togaga pasina opo itapao, e oineyana idau besobeso go, opoyana bei igoyo. Go sem oine vau takabi, opo vau goi tasiwoi.’
Yeisu Sabati ana Tomoya
(Madiu 12:1-8; Luke 6:1-5)
23 E Sabati tayamo goi Yeisu mana tovatotowanayao tánuwo sinaena siiketoiya. Ago ina tovatotowanayaoyadi idi ketoiya goi witi keuwoina siiguwedi sikakáika.† Atu 23:25. 24 Kidi go Parisi sikaaiyaka Yeisu silatuwoko sidigo kadi,
‘Iyaa! Amo tauyadi manakae siguuinuwa kaga Sabati ana lovina geya itagonedeta taguinuwe?’
25 Go kina Yeisu idigo kana,
‘Manakae? Kaga Devida boi iguuinuwe tetelina geya kokatuyaiviyeta ae? Boi tutayana ma senao loga sikámasa go, geya avadimo. 26 Tuwo tutayana Tonúwala Toolagaina Abiyatari ina tuta goi kina Devidayana ina Yaubada ina Vada isiu, Tonuwalayana yaina ikawanoi awoinu manuna. Tuwo Tonuwalayana beredi kaasalaidi†a Tat 35:13. ikabidi, Devida ivini ikáika. Ikáika ikavava, senao nakae ivinidi sikáika. Go geya vatau tayaamo mana tagona berediyadi ikáika. Moe kidi Tonúwala taudiva madi tagona sikáika.’†b Vin 24:5-9; 1Sa 21:1-6.
27 Tuwaina Yeisu idigo kana,
‘Yaubada Sabati ivinida ada dedevina manuna go, geya kada imadagida Sabati manuna geya. 28 Tauna Tomalatomota moe Sabati nakae ana Tomoya, e ilovina kaga itoboine Sabati goi tomota siguinuwe, tauna guna tovatotowanayao geya adi pikwanamo.’