5
Yeisu dimoni ivataapiyedi tetelina
(Madiu 8:28-34; Luke 8:26-39)
1 Yeisu kidi bogina sitadámana sina da Gerasine idi kaolao goi sivaiu. 2 Yeisu oga goi isou go, mainao koroto tayamo naagovaina valiwoga tukubu goi isowóduwo ima Yeisu ivalobode. 3 Tukubuyadi moe ina kaba kaiyaka. Boi mainao tomota itoboinedi tauyana siyoisi nimana be aena seni goi siiyowóidi go, ame tuta geya tuwaina itoboinedi. 4 Unana tuta liliuna neta seni goi tauyana nimana be aena siiyowóidi, e seniyadi ikiguuyalidi. Tauna geya tayaamo avatau ana kaipata bei tauyana iyoisi nimana aena iyowóidi. 5 Tuta liliuna, sabamgo be maliyalina, tukubu goi be koya goi isupoola beso be nakae ipodeeda beso. Aiyuwoina gurewa ikabi, toinina iitalai, ikaika idau.
6 E Yeisu oga goi bogina isou go, korotoyana nava aduwanau goi ikandoiwo Yeisu igite, tauna ilokoina ima Yeisu matana goi aena ivatugúyala. 7-8 Ivaatugúyala go, kina Yeisu ilatuwoko idigo kana,
‘Kom dimoni, koroto ame goi kusowōduwo!’
Nakae ibobóbwara go, dimoniyana niyana gagaina goi ipodeda, idigo kana,
‘Yeisu, kom Yaubada Tokanayatanatoina Natuna, yau guna polava moe geya kom im polava geya. Tuwo! Yaubada yoina goi akawanoi yaim bego geya kuyogedegedeguta!’
9 Go Yeisu idigo kana,
‘Kom yoim manakoyoina?’
Tauyana idigo kana,
‘Mama boda koroto ame sinaena goi kakaaiyaka. Tauna yoigu Uwouwo.’
10 Tauyadi sikawanoi makimaki sidigo kadi,
‘Taabu ame dadavayana goi kuvataapiyēma!’
11 Ego doyava koya goi bao badabadaidi sidumdumla. Dimoniyadi sikandobala bao sigitedi, 12 tuwo sikawanoi makimaki Yeisu yaina sidigo kadi,
‘Neta kuetunēma kāna dobala bao amo sinaedi goi bego kasiu.’
13 Tuwo moitamo itagonedi. E dimoniyadi sitáoya, koroto goi sisowóduwo sina bao sinaedi goi sisiu. Sisiu, baoyadi madabokidi sisaloku, silokoina sina koya tagatagagina goi sipela sisou sina Galili Bwaena goi sisalili. Baoyadi adi badabada moe 2,000.
14 Kidi go baoyadi adi tomatakavatayao sisiya sina asa gagaidi be giyaidi goi kaga kaga siisowóduwo sitalavaitedi. Tuwo toni kasa sima latuwodi sigite kaga iisowóduwo. 15 Toni kasayadi sima Yeisu yaina go, korotoyana boi naagovaina sigite mana kwama nakae nuwona imavada iitusobu. Tuwo simatoita. 16 Ago tomota boi mainao sigite kaga isowóduwo, sivateteli tomota yaidi korotoyana boi naagovaina manakaena idedevina be nakae bao manakaedi sivailai. 17 Tuwo toni kasayadi sinove, sikawanoi makimaki Yeisu yaina sidigo kadi,
‘Ima kasa kwalāve.’
18 Tuwo Tauyana iiwo ina oga goi iisowoya bego ikalavedi go, korotoyana boi naagovaina ima Yeisu yaina ikawanoi makimaki idigo kana,
‘Tomoya, manakae? Kutagona asabokuuliyem?’
19 Ago Yeisu geya itagoneyeta, go sem korotoyana ilatuwoko idigo kana,
‘Kwaluvīla kūna im kasa, e im bodao kulatuwokōidi Tomoya manakaena guinuwa toogagaidi iguinuwedi yaim be nakae manakaena inuwokapisiyem.’
20 Tuwo moitamo korotoyana itáoya ina Dekapoli‡Dekapoli: Ame livalayana ana yagoina moe asa ana badabada yawou. Ame dadavayana moe tupwana gagaina. Ikaiyaka Galili Bwaena go, bomatu dadavina. Amoko goi Diyuu maniyedi sikaaiyaka go, boda gagaina moe Totuyoyowo. goi Yeisu ina guinuwa toogagaidi tauyana yaina iguuinuwedi italavaaitedi. Ago tomota madabokidi neta livalayana sinove, nukotodi siwówana.
Yeisu Guyau ina togaga ikaiwoduwe
(Maki 5:21—8:26)
Yeisu vevina adi taiyuwo ikidedeevinedi tetelina
(Madiu 9:18-26; Luke 8:40-56)
21 Tuwo Yeisu mana tovatotowanayao ogayana sisowoya, sisaidamanamna sina ituli ta dadava goi sisou, e boda sitaligógana sima Tauyana yaina go, kina labutabuta goi ikaaiyaka. 22 Ikaaiyaka go, Diyuu idi kaba tugúguna ana tolovina tayamo yoina Yairo ima Yeisu igite, matana goi aena ivatugúyala 23 ikawanoi makimaki idigo kana,
‘Natugu vavina gómana giyaina giyakainava bei ikámasa. Neta kūma gomanayana dabana goi nimam kuyatōidi, kukidedevīne, e bei ma yawoina.’
24 Tuwo moitamo Yeisu taiyao sina.
Ego sinonoina, enao goi boda gagaina mlidi goi sivatuvagivagígina. 25 Sivatuvagivagigi go, bodayadi sinaedi vavina tayamo ima. Vavinayana tala yawou aiyuwo goi ikaikaina idaudau go, nava idaudau. 26 Ego boi nimatu inonoina doketa liliudi yaidi ina mani madabokina ilukavave go, doketayadi idi guinuwa pasina gedageda ilotowo. Ago idi guinuwa goi geya iboboineta, go sem ina vísiya ibibíbina. 27 Niga Yeisu valena inove, ima ivalabelabena Tauyana mlina goi ibisibala ana kwama ibisikone. 28 Ina nuwonúwana kana, ‘Neta Tauyana ana kwama kaka abisikoneyamo, bei aboboina.’ 29 Tuwo ibisikone, e ikaikainayana ina dau mainao isayata. Tauyana wowona sinaena inamkone bego ina visiyayana goi bogina iboboina. 30 E kina Yeisu bogina inamkone bego togaga toinina yaina goi isowóduwo, tuwo itugavila boda yaidi goi idigo kana,
‘Avatau agu kwama ibisikone?’
31 Ago kidi ina tovatotowanayao sidigo kadi,
‘Tomoya, boda gagaina kugitedi sitaoyaakobum be sivatuvagivaagigim, tauna kaga unana kulumadádana kam,
“Avatau ibisikonegu?” ’
32 Go Tauyana imatavilavila; latuwona igite avatau ana kwama ibisikone. 33 E kina go vavinayana bogina iyagoi ana boboina maine ibabane, tauna mana matoita be mana tátava ima Yeisu matana goi aena ivatugúyala, e dogoiyana madabokina italavaitedokoidi. 34 E Yeisuyana kana,
‘Natugu, im numisa bogina ikidedevinem. Kutāoya be mam tuboina kūna. Im vísiya madabokina bogina ikavava.’
35 Nava Yeisu ibobóbwara go, tomota maniyedi tolovinayana ina vada goi sima Yairo silatuwoko sidigo kadi,
‘Natum bogina ikámasa, tauna kaga ana dedevina nava tovatulúkwana kuuyobose?’
36 E kina go Yeisu bogina inowoyabedi kaga sidigedige, e aba tugúguna ana tolovinayana ilatuwoko idigo kana,
‘Taabu kuumatōita. Kunumisegūmo.’
37 Ago boda liliuna isanabodedi geya sisabokuliyeta, go sem Pita be Yemesa ma tuwowona Iyoni aditava itagonedi taiyao sisiu. 38 Ivataoduwedi tolovinayana ina vada goi sinove taodi be táiya gagaina. 39 Tuwo Yeisu isiu ina ilatuwokoidi idigo kana,
‘Kaga unana kovamgemge be kotaitáiya? Gómana moe geya ikamaseta, go sem ikanaamatáiya.’
40 E Tauyana sinove, sivaanamae go, kina ivalilivedi sisowóduwo moetala goi. Ago gómana tamana be sinana nakae Yeisu mana tovatotowanayao adi taito sina gomanayana ina kaba masisi goi sisiu. 41 Sinaena goi Yeisu ibala ina gomanayana nimana iyoisi, idigo kana,
‘Talita kumi!’
Moe ana kaigavila kada, ‘Gómana alatuwokoim kutāoya!’ 42 Gomanayana ana tala yawou aiyuwo bogina ibabanedi, tauna etoiya bogina yoiyana. Tuwo to mainao itáoya iketoiya. E tauyadi sikaaiyaka sikainaopa gagaina. 43 Go Yeisu isanabodedi idigo kana,
‘Geya vatau tayaamo yaina kotaalavāita guna guinuwa ame manuna, go sem gómana avana kovīni ikáika.’
‡5:20 Dekapoli: Ame livalayana ana yagoina moe asa ana badabada yawou. Ame dadavayana moe tupwana gagaina. Ikaiyaka Galili Bwaena go, bomatu dadavina. Amoko goi Diyuu maniyedi sikaaiyaka go, boda gagaina moe Totuyoyowo.