PAULO ENA REVAREVA
GINIGUNANA KORINTO
TAUDIA DEKENAI
1
Lau Paulo, lau be Iesu Keriso ena aposetolo tauna, Dirava ena ura dainai. Ia ese lau ia boiria vadaeni, iena aposetolo tauna do lau lao. Lau bona iseda varavara tauna Sositene, ai ruaosi ese inai revareva ai torea, umui Dirava ena ekalesia taudia Korinto dekenai. Dirava ese umui ia boiria vadaeni iena helaga taudia do umui lao totona. Umui be Dirava ena, badina be Keriso Iesu danu umui hakapua dainai, umui bona Iesu Keriso ena ladana idia gwauraia taudia ibounai danu. Ia be idia edia Lohiabada, iseda Lohiabada danu nega tamona.
Iseda Tamana Dirava bona Lohiabada Iesu Keriso ese hariharibada bona maino umui ibounai dekenai do idia henia.
Paulo ese Dirava ia hanamoa
Keriso Iesu ena gaukara dainai, Dirava ese iena hariharibada umui dekenai ia henia vadaeni. Inai dainai nega ibounai Dirava lau tanikiu henia. Keriso danu umui hakapua tamona dainai, Dirava ese emui mauri dalana ibounai ia hanamoa bada herea. Ia ese umui ia durua, vadaeni umui ese Iesu Keriso umui gwauraia hedinaraia noho. Aonega danu umui dekenai ia henia, vadaeni Dirava ena hereva momokani umui diba. Keriso ena sivarai, ai ese ai harorolaia gauna be umui ese umui abia dae goada, bona umui hamomokania vadaeni. Unai dainai umui ese Lohiabada Iesu Keriso ena mai umui naria noho, bona Lauma ena harihari gauna ta dekenai umui dabu lasi. Keriso ese umui do ia haginia goada ela bona dokona. Vadaeni Lohiabada Iesu Keriso ena mai dinana dekenai umui be kerere ta lasi. Dirava ese umui ia boiria vadaeni, iena Natuna Iesu Keriso, iseda Lohiabada danu do umui noho hebou totona. Bona Dirava ena kara be momokani, ita abidadama henia diba.
Ekalesia ia parara
10 Lauegu varavara taudia e, iseda Lohiabada Iesu Keriso ena ladana dainai umui lau noia, umui parara lasi. Hereva tamona do umui gwauraia, bona do umui gaukara hebou mai lalona tamona danu. 11 Badina be, lauegu varavara taudia e, Kiloe ena varavara taudia ese umui emui sivarai lau dekenai idia hamaoroa. Idia gwau umui heai noho, heai noho. 12 Lau laloa umui ta ta inai bamona umui hereva noho, umui gwau, “Lau be Paulo ena,” “Lau be Apolo ena,” “Lau be Petero ena,” “Lau be Keriso ena.” 13 Edena bamona? Keriso ia parara vadaeni, a? Lau Paulo inai, idia ese lau idia hasatauroa, umui dainai lau mase, a? Umui ese bapatiso umui abia Paulo ena ladana dekenai, a?
14 Lau ese Dirava lau tanikiu henia, badina umui ta lau bapatiso lasi, Krisipo bona Gaio ruaosi sibona. 15 Unai dainai umui ta be inai bamona ia hereva diba lasi, “Lau be Paulo ena diba tahua tauna, badina ia ese lau ia bapatisoa.” 16 Momokani, lau be Stepana mai ena famili danu lau bapatisoa, to lau diba lasi ta danu lau bapatisoa o lasi. 17 Badina be Keriso ese taunimanima bapatisoa totona lau ia siaia lasi, to Sivarai Namona do lau harorolaia totona. Bona aonega hereva dekenai do lau haroro lasi, Keriso ena mase satauro dekenai ena siahu bada do lau hamaragia garina.
Keriso be Dirava ena siahu bona aonega
18 Momokani, mase ena dala dekenai idia raka noho taudia ese idia gwau Keriso ena mase satauro dekenai herevana be kavakava. To ita mauri ena dala dekenai ita raka noho taudia be ita diba Keriso ena satauro herevana be Dirava ena siahu. 19 Buka Helaga lalonai ia torea vadaeni, ia gwau:
“Lau ese aonega taudia edia aonega do lau haorea,
bona diba bada taudia edia diba do lau negea.”
20 Unai dainai, aonega taudia be edeseni? Diba bada taudia edeseni idia noho? Inai tanobada ena dala idia herevalaia diba momo taudia be edeseni? Dirava ese ia hedinaraia inai tanobada ena aonega be kavakava sibona!
21 Oibe, Dirava ena aonega be bada herea, inai bamona: Tanobada taudia ese sibona edia aonega dekena amo Dirava idia davaria diba lasi. To ai ese ai harorolaia hereva kavakava dekena amo, abidadama henia taudia ibounai be Dirava ese do ia hamauria. 22 Iuda taudia be idia ura bada toa karadia idia itaia, bona Helene taudia idia ura bada aonega idia davaria. 23 To ai ese Keriso idia hasatauroa ai harorolaia noho. Inai hereva ese Iuda taudia ia habadua. Bona Helene taudia idia laloa inai hereva be kavakava. 24 To ita, Dirava ena boiboi ita kamonai henia taudia, Iuda taudia bona Iuda lasi taudia danu, ita diba Keriso be Dirava ena siahu, bona Dirava ena aonega. 25 Oibe, Dirava ena kavakava ese taunimanima edia aonega ia hereaia noho, bona Dirava ena manoka ese taunimanima edia goada ia hereaia noho.
26 Lauegu varavara taudia e, Dirava ese umui ia boiria negana mani umui laloa. Unai neganai umui momo lasi be mai aonega, inai tanobada ena aonega bamona. Bona umui momo lasi be mai siahu, inai tanobada ena siahu bamona. Umui momo lasi danu be lohia taudia. 27 To tanobada ena kavakava gaudia be Dirava ese ia abia hidi, aonega taudia do ia hahemaraia totona. Bona tanobada ena manoka gaudia danu Dirava ese ia abia hidi, goada taudia do ia hahemaraia totona. 28 Tanobada ese ia negea gaudia, bona taunimanima idia ura lasi gaudia Dirava ese ia abia hidi. Tanobada taudia idia laloa be anina lasi gaudia Dirava ese ia abia hidi, tanobada ena gau badadia do ia haorea totona. 29 Inai anina be, tau ta Dirava ena vairanai ia hekokoroku diba lasi. 30 To Dirava ese Keriso danu umui ia hakapua tamona, bona Dirava ese Keriso, be iseda aonega ia halaoa vadaeni. Keriso sibona dekena amo Dirava ena vairanai ita maoromaoro diba. Keriso dainai Dirava ena helaga taudia ita lao, bona ura kwalimu ita abia. 31 Unai be Buka Helaga ia torea herevana bamona, ia gwau: “Daika tauna ia ura heagi, ia be Lohiabada ena kara sibona do ia heagilaia.”