2
Emui guriguri hebou edia tomadiho dalana
Lauegu sisiba ginigunana be, lau ura emui guriguri gaukara lalonai, taunimanima ibounai dainai do umui noinoi karaia. Umui guriguri, bona umui noinoi neganai, Dirava do umui tanikiu henia. King taudia totona, bona lohia taudia ibounai totona danu, Dirava dekenai do umui noinoi. Unai dekena amo, Dirava ita badinaia bona matauraia dainai, mai maino danu do ita noho namonamo. Inai bamona kara be namo, badina be inai dekena amo iseda Hamauria Diravana ita hamoalea noho. Dirava ia ura taunimanima ibounai ese mauri do idia davaria, bona hereva momokani do idia diba. Badina be Dirava be tamona, Dirava bona taunimanima ia hakapudia tauna danu be tamona. Unai tauna be Keriso Iesu. Keriso sibona ese iena mauri ia henia, taunimanima ibounai hamauria totona. Dirava ese nega korikori dekenai inai kara ia havaraia. Bona unai dekena amo ita diba momokani, Dirava ia ura taunimanima ibounai ese mauri do idia davaria. Unai dainai Dirava ese iena haroro tauna bona aposetolo tauna lau ia abia hidi vadaeni. Iuda lasi bese taudia dekenai lau ia siaia, abidadama bona hereva momokani ena sivarai idia dekenai do lau harorolaia totona. Lau koikoi lasi, lau hereva momokani inai.
Lau ura tatau ibounai, gabu ibounai dekenai do idia guriguri. Lau ura mai helaga danu, edia imana Dirava dekenai idia abia isi. Lau ura inai idia karaia neganai, idia be badu ta lasi, bona hepapahuahu ta lasi.
Paulo ena sisiba hahine taudia dekenai
Lau ura danu hahine taudia ese mai manau bona mai mataurai danu edia dabua do idia kwatua. Edia huina danu sitaelo sitaelo bamona do idia karaia lasi, bona golo o kavabukavabu herahera gaudia do idia atoa lasi. Davana bada dabua danu do idia abia lasi. 10 To kara namodia ibounai, be herahera bamona do idia karaia. Unai be maoro, bona Dirava idia matauraia hahine edia kara korikori. 11 Hahine ese diba do idia tahua, mai edia hereva momo lasi, bona mai edia manau danu. 12 Hahine lau taravatua inai, idia ese tatau do idia hadibaia lasi, o gunalaia lasi. Hereva momo lasi danu do idia noho. 13 Badina be Dirava ese Adamu ia karaia guna, Heva be gabeai. 14 Bona Satani ese Adamu ia koia lasi, to ia ese hahine sibona ia koia. Vadaeni hahine ese Dirava ena taravatu ia utua. 15 To natuna do idia havaraia dekena amo, hahine taudia ese mauri do idia davaria. Oibe, bema Keriso idia abidadama henia, Keriso lalonai idia noho helaga, bona mai lalokau danu kara namodia idia karaia neganai, hamauria do idia davaria.