1 Iena ura be inai bamona dainai, Dariuse ese lohia taudia 120 ia abia hidi, basileia ena gaukara idia gunalaia gwauraia. 2 Vadaeni ia ese Daniela bona ma tau rua ia abia hidi, inai tau toi ese unai lohia taudia do idia biagudia gwauraia. Unai dala dekena amo king ese basileia do ia naria namonamo diba.

3 King ia itaia, Daniela ena gaukara ibounai be ia namo herea momokani. Unai dainai Dariuse ese ia laloa Daniela do ia atoa, basileia ena gaukara ibounai do ia biagua karaia.

4 Unai neganai unai lohia taudia edia biaguna rua bona lohia taudia ibounai ese Daniela ena gaukara dekenai kerere idia tahua, to idia davaria lasi, badina iena gaukara ibounai be ia maoro sibona. Daniela dekenai gageva karana ta o kerere karana ta be lasi. 5 Ta ta dekenai idia herevahereva, ma idia gwau, “Daniela samania gauna ta do ita davaria diba lasi, to sedira iena guriguri karana dekenai sibona dekena amo do ita davaria diba.”

6 Unai dainai idia lao king dekenai, idia gwau, “King Dariuse e, oi noho hanaihanai be namo. 7 Ai inai, oiemu gavamani ena gaukara taudia ibounai, gavana taudia bona durua taudia, bona lohia taudia badadia bona maragidia, be laloa tamona ai abia, ai ura oi ese taravatu ta oi karaia, bona oi ha-aukaia momokani. Inai bamona: Dina 30 lalonai be tau ta ese gau ta do ia noia lasi dirava ta dekenai, o tau ta dekenai, to oi dekenai sibona do ia noia. Bema tau ta ese inai hereva ia utua, be do idia negea laiona ena guri dekenai.

8 “Unai dainai, aiemai king e, namona be inai taravatu oi atoa, bona oiemu ladana oi torea inai taravatu pepa dekenai. Vadaeni Mede bona Parasa edia taravatu hegeregerena be do idia haidaua diba lasi.” 9 Vadaeni Dariuse ese iena ladana ia torea unai taravatu pepa dekenai.

10 Unai hereva Daniela ia diba neganai, ia lao iena ruma dekenai. Ataiai daihutuna ta dekenai be uindo toi idia noho Ierusalema itaia lao ena kahana dekenai.

Nega ibounai ia karaia bamona, unai uindo dekenai ia tui diho dina ta nega toi, bona Dirava dekenai ia guriguri henia. 11 Vadaeni unai taudia ese Daniela idia itaia, Dirava ia guriguri henia noho.

12 Vadaeni Daniela samania totona idia lao king dekenai. Idia gwau, “King badana e, taravatu ta oi torea vadaeni, dina 30 lalonai bema tau ta ese idau dirava o idau tauna ta dekenai ia noinoi, to oi Dariuse dekenai be ia noia lasi neganai, be laiona ena guri dekenai do idia negea.” Dariuse ia haere, “Io, Mede bona Parasa edia taravatu hegeregerena, taravatu lau torea vadaeni, haidaua diba lasi.”

13 Idia ese king idia hamaoroa, idia gwau, “Iuda dekena amo abia mauri tauna ta ena ladana Daniela ese oiemu hereva ia matauraia lasi, bona ia badinaia lasi. Nega ibounai dina ta lalonai nega toi ia guriguri.”

14 Inai hereva be king ia kamonai neganai, iena lalona ia hisihisi bada, bona dala ia tahua, ia ura Daniela ia hamauria totona. Iena lalona ia hekwarahi ela bona dina ia diho.

15 Unai dainai unai taudia idia lao lou king dekenai, idia gwau, “King badana e, oi diba Mede bona Parasa edia taravatu hegeregerena, king ia torea taravatuna be haidaua diba lasi.”

16 Vadaeni king ese oda ia atoa, bona idia lao, Daniela idia abia, laiona idia noho gurina dekenai idia negea. Daniela dekenai king ese ia hereva, ia gwau, “Namona be oiemu Dirava, nega ibounai oi tomadiho henia Diravana ese do ia hamauria oi.”

17 Nadi ta idia mailaia, unai guri ena iduara idia koua. King ese sibona ena koua toana ia atoa, bona ia lokaia, bona iena opesa taudia edia koua toana danu ia atoa, unai dainai tau ta ese Daniela ia hamauria diba lasi. 18 Vadaeni king ia giroa lou iena ruma badana dekenai, bona unai hanuaboi lalonai ia aniani sisina lasi, bona taunimanima ese edia ivilikou idia gadaralaia lasi, bona moale kara ta idia karaia lasi. King ia mahuta sisina lasi.

19 Daba ia rere neganai, king ia lao haraga guri dekenai. 20 Guri kahirakahira ia lao neganai, mai lalohisihisi bada danu ia boiboi, ia gwau, “Daniela e, mauri Diravana ena hesiai tauna e! Oiemu Dirava, iena hesiai oi karaia namonamo Diravana ese laiona dekena amo oi ia hamauria, a?”

21 Daniela ia haere, ia gwau, “Egu king, oi mauri hanaihanai! 22 Dirava ese iena aneru ia siaia mai, laiona edia uduna ia koua, bona idia hadikaia lasi lau. Inai bamona ia karaia, badina ia diba lau be kerere lasi, bona oi danu lau hadikaia lasi, egu king e.”

23 King Dariuse ia moale bada herea, bona oda hereva ia gwauraia Daniela do idia veria daekau. Vadaeni Daniela idia veria daekau, bona idia itaia, Daniela ese dika sisina ia davaria lasi, badina Dirava ia abidadama henia dainai.

24 Vadaeni king ese oda hereva ia gwauraia, Daniela idia samania taudia mai adavadia bona mai natudia do idia mailaia, laiona ena guri lalonai do idia negea. Unai guri lalonai idia moru diho noho, bona tano idia do davaria lasi neganai, laiona ese unai taudia idia koridia, bona edia turiana ibounai idia hamakohia.

25 Unai neganai king Dariuse ese hereva ia torea, ia siaia bese ibounai, bona tanobada dekenai idia noho gado ibounai taudia dekenai, ia gwau: “Emui maino do ia bada lao. 26 Hereva lau gwauraia inai, lauegu basileia dekenai noho taudia ibounai ese Daniela ena Dirava do umui matauraia bona gari henia.