33
Mose ese Israela ena iduhu ta ta ia hanamoa
Vadaeni Dirava ena hesiai tauna Mose ese Israela taudia ia hanamoa, ia do mase lasi neganai. Iena hanamoa hereva be inai:
Lohiabada be Sinai dekena amo ia mai.
Edoma ena ataiai dekena amo, dina bamona ia toreisi.
Parana Ororo dekena amo ia diaridiari.
Mai ena aneru momo momo herea danu ia mai.
Taravatu be lahi bamona,
iena imana idibana dekenai.
Momokani, Lohiabada ese iena bese ia lalokau henia noho.
Iena helaga taudia ia hanamodia noho.
Unai dainai ita ese Lohiabada ena aena dekenai,
ita tomadiho henia noho,
iena Taravatu ita kamonai henia.
Inai Taravatu, Mose ese ita dekenai ia henia gauna,
ita badinaia noho,
iseda bese ena gau namo hereana momokani be unai.
Israela bese gunalaia taudia idia helai neganai,
bona Israela iduhu ibounai idia hebou neganai.
Lohiabada be Israela besena ena King momokani ia lao.
 
Mose ese Rubena ena iduhu ia herevalaia, ia gwau,
“Rubena do ia mauri, do ia mase lasi,
to iena orea taudia be momo herea lasi.”
 
Iuda ena iduhu dekenai inai bamona ia herevalaia, ia gwau,
“Lohiabada e, Iuda taudia edia taitai durua totona do oi kamonai,
Israela taudia danu do oi haboua lou.
Lohiabada e, idia totona do oi tuari.
Idia dekenai idia dagedage taudia,
dekena amo idia do oi hamauria.”
 
Mose ese Levi iduhu ia herevalaia, ia gwau,
“Lohiabada e, oiemu ura gauna be,
Tumima bona Urima dekena amo do oi hedinaraia noho,
oiemu helaga taudia, Levi ena iduhu taudia,
edia gaukara dekena amo.
Masa dekenai edia goada oi tohoa,
bona Meriba ranu gabudia dekenai edia goada oi hamomokania.
Levi taudia ese oi Lohiabada idia laloa bada,
to edia tamadia bona sinadia idia laloa sisina.
Edia tadikakadia idia negea,
bona edia natudia idia atoa siri.
Badina be oiemu hereva idia kamonai,
bona oiemu Taravatu idia badinaia.
10 Idia ese oiemu natuna taudia dekenai,
oiemu Taravatu kamonai henia dalana do idia hadibaia.
Idia ese boubou helagadia,
be oiemu boubou patana dekenai do idia gabua.
11 Lohiabada e, Levi ena iduhu do oi durua,
do ia goada lao noho.
Edia imana gaukara do oi abia dae.
Idia dekenai idia tuari taudia do oi gwadaia mase,
vadaeni do idia toreisi lou lasi.”
 
12 Beniamina iduhu be Mose ese ia herevalaia, ia gwau,
“Inai iduhu be Lohiabada ese ia lalokau henia noho,
ia naria noho,
dina ibounai ia ese ia gimaia noho,
bona edia huana dekenai ia noho.”
 
13 Iosepa ena iduhu be Mose ese ia herevalaia, ia gwau,
“Lohiabada ese edia tano,
be medu dekenai do ia hanamoa,
bona tano ena henunai dekena amo,
ia daekau mai ranuna dekena amo danu.
14 Lohiabada ese dina ena siahu dekenai idia mage huahua,
dekena amo edia tano do ia hanamoa.
Inai huahua be namodia momokani gaudia,
edia nega korikori dekenai do idia vara namonamo.
15 Edia ororo gunadia danu ese,
huahua namodia momokani momo herea do idia havaraia.
16 Lohiabada ese edia tano,
be gau namodia dekenai do ia hahonua.
Lohiabada ena kara namodia ese,
edia tano do idia hanamoa,
badina ia ese au ginigini ia araia noho,
dekena amo ia hereva.
Inai hanamoa be Iosepa ena iduhu dekenai do ia ginidae,
badina ia be iena tadikakana taudia edia lohia tauna.
17 Iosepa ena goada be boromakau ena goada hegeregerena.
Iena doana be uda boromakau ena doana bamona.
Iena doana be Manase ena taunimanima momo,
bona Eparaima ena taunimanima momo herea.
Inai orea ruaosi dekena amo,
Iosepa ese tanobada besedia ia hadikadia noho.
Ia doridia ela bona tanobada ena dokona gabudia.”
 
18 Sebuluno bona Isakara edia iduhu be Mose ese ia herevalaia, ia gwau,
“Lohiabada ese Sebuluno edia hoihoi gaukara,
davara hanaia gabudia dekenai, do ia durua bada,
bona Lohiabada ese Isakara edia kohu do ia habadaia,
edia ruma noho gaukara dekena amo.
19 Inai bese ruaosi ese idau bese taudia do idia boiria,
edia ororo dekenai do idia lao.
Unuseni kara maoromaoro bouboudia do idia hahelagaia.
Badina be davara dekena amo edia kohu idia abia,
bona kone ena miri lalonai gaudia dekena amo danu.”
 
20 Gado ena iduhu be Mose ese ia herevalaia, ia gwau,
“Dirava do umui hanamoa,
ia ese emui tano ia habadaia noho.
Gado taudia be laiona bamona idia hekure noho,
imana o kwarana do idia darea totona.
21 Tano namo herea be Gado iduhu ese idia abia hidi.
Idia ese lohia ena tano kahana idia abia.
Badina be Lohiabada ena taravatu bona oda,
be idia ese idia kamonai henia,
Israela gunalaia taudia idia hebou neganai.”
 
22 Dano ena iduhu be Mose ese ia herevalaia, ia gwau,
“Dano be laiona natuna,
Basana dekena amo ia roho daekau mai.”
 
23 Napatali ena iduhu be Mose ese ia herevalaia, ia gwau,
“Napatali taudia e, Lohiabada ese umui ia ura henia,
Lohiabada ena hanamoa umui abia vadaeni.
Emui tano be Galilea gohuna,
dekena amo diho kahana dekenai ia lao.”
 
24 Asere ena iduhu be Mose ese ia herevalaia, ia gwau,
“Asere taudia be Lohiabada ese do ia hanamodia bada,
haida bamona lasi.
Edia tadikakadia ese do idia hanamoa henidia.
Edia tano be do mai ena olive audia momo.
25 Edia hanua be auri ikoukoudia ese do idia gimaia,
bona hanua taudia do idia noho namonamo, gari lasi.”
 
26 Ma Mose ia hereva, ia gwau,
“Israela taudia e,
dirava ta be emui Dirava hegeregerena lasi.
Ia be guba ori dekenai ia guia,
mai iena hairaina bada.
Ia be guba dekena amo ia mai noho,
umui do ia durua totona.
27 Dirava ese nega ibounai umui ia gimaia noho.
Iena noho hanaihanai imadia ese umui idia hagoadaia noho.
Umui idia tuari henia taudia,
be ia ese umui emui vairana dekenai ia luludia,
bona umui ia hamaoroa,
ia gwau, ‘Do umui aladia ore.’
28 Unai dainai Israela ena tubuna taudia,
be maino dekenai do idia noho namonamo,
Iakobo iduhu taudia be sibodia do idia noho, tuari ta lasi.
Iakobo ena tano be koni bona uaina matamata dekenai ia honu,
bona unai tano dekenai hanuaboi ena paripari,
be guba dekena amo medu bamona ia diho.
29 Israela taudia e, umui emui noho be namo.
Edena taudia ese umui idia hereaia?
Lohiabada ese umui emui bese ia hamauria vadaeni.
Lohiabada be emui kesi, bona emui durua Tauna,
bona ia be emui kwalimu tuari kaia.
Umui dekenai idia tuari henia taudia,
be umui emui vairana dekenai do idia tui diho.
Edia ataiai gabudia helagadia do umui moia diho.”