12
Sisiba hereva eregabe taudia dekenai
Oi be eregabe neganai, ia ese oi ia karaia Dirava do oi laloa. Badina be nega dika dinadia do idia ginidae, bona unai neganai do oi gwau, “Lauegu mauri dekenai lau moale lasi.”
Unai neganai dina ena diari, hua bona hisiu edia diari danu be dibura bamona oi dekenai. Medu ena ori danu oi dekenai do idia ore lasi.
Unai neganai danu oiemu imana, guna oi idia hagoadaia gaudia, be manoka dainai do idia heudeheude. Bona oiemu aena, harihari idia goada gaudia, be unai neganai do idia manoka. Oiemu isena be tamona tamona sibona dainai, oi be aniani do oi ania namonamo diba lasi, bona oiemu matana be gau idauidau do idia itaia namonamo diba lasi.
Oiemu taiana be do idia kudima, ariara ena regena do oi kamonai namonamo diba lasi. Uiti moia ena regena, bona miusiki regena danu do oi kamonai lasi. To manu ena ane ese mahuta dekena amo oi do ia hanogaia.
Unai neganai danu oi be ataiai gabudia dekenai do oi gari, bona dala dekenai oi raka neganai, moru garina do oi gari. Oiemu huina be do idia kurokuro, bona mai hekwarahi danu do oi raka lao. Ma oi manoka dainai, oiemu hahine do oi sihari henia diba lasi.
Badina ita be iseda laga-ani gabuna, dokona dekenai ita lao noho, bona mase dainai idia taitai taudia be ariara dekenai idia tai noho.
Io, oi be eregabe neganai, Dirava do oi laloa, badina be siliva seini do ia makohia, bona golo lamepa be do ia moru, do ia makohia momokani. Ranu guri ena varona be do ia dika, bona hodu danu be do ia makohia.
Iseda tauanina be tanobada ena kahu dekenai do idia giroa lou, bona iseda lauma be ita dekenai ia henia Dirava dekenai do idia giroa lou.
Hadibaia Tauna ia gwau, “Anina lasi, anina lasi, gau ibounai be anina lasi.”
Inai buka ena hadibaia hereva
Hadibaia Tauna be mai ena aonega, bona ia ese danu taunimanima dekenai diba ia henia. Ia ese aonega herevadia ia laloa, bona ia tahua, bona edia momokani ia tohoa. 10 Hadibaia Tauna ese danu taunimanima hagoadaia herevadia ia tahua, bona ia torea herevadia be momokani, bona maoromaoro.
11 Aonega taudia edia hereva be au ta mai matana, mamoe naria taudia ese idia iusilaia, mamoe hakaua totona gauna bamona. Bona aonega herevadia, idia haboua namonamo gaudia, be mai edia goada, idia kokoa auka ikokodia bamona. Mamoe Naria Tauna tamona, Dirava ese, inai aonega hereva ita dekenai ia henia.
12 Egu natuna e, inai aonega hereva dekenai, tau haida sedira edia hereva ma do idia atoa kau. To inai kara do oi naria namonamo. Buka momo idia torea noho, doko lasi, bona edia anina do oi tahua neganai, oi dekenai hesiku do ia havaraia.
13 Egu hereva ibounai oi kamonai vadaeni, to egu hadibaia hereva dokona, sisiba badana be inai: Dirava do oi gari henia, bona iena oda do oi badinaia, badina be taunimanima edia gaukara korikori be unai sibona. 14 Dirava ese iseda kara ibounai do ia kota henia, kara namodia bona kara dikadia, hunia dekenai ita karaia gaudia danu.