1 Lagani namba 30 lalonai, hua namba 4, bona dina namba 5 dekenai lau Esekiela be Iuda hesiai mai guia danu taudia edia huanai lau noho, sinavai ena ladana Kebara ena badinai. Unai neganai guba be sibona ia kehoa, bona mata hanai dekena amo Dirava lau itaia.

2 Unai negana be king Iehoiakini idia guia, bona Babulonia dekenai ia noho, ena lagani namba 5 lalonai. 3 Unuseni, Babulonia dekenai, Kebara Sinavai ena badinai, lau Esekiela, hahelagaia tauna, Busi ena natuna, ese Lohiabada ena hereva lau kamonai. Bona Lohiabada ena siahu danu be egu latanai ia mai, unai gabu dekenai.

4 Lauegu matana lau negea, bona lau itaia, lai ena guba ta be mirigini kahana dekena amo ia mai. Kevaru danu lau itaia, ori badana momokani dekena amo ia diaridiari noho. Diari badana, lahi bamona, ese unai ori ia hagegea noho. Kevaru ia diaridiari noho gabuna dekenai, gau ta, iena toana be auri laboralabora bamona ia noho.

5 Bona unai lai guba ena huanai lau ese mauri gaudia 4 lau itaia, edia toana be taunimanima bamona. 6 To idia ibounai ta ta be mai edia vairana 4, bona mai edia hanina 4 danu. 7 Edia aena be maoromaoro, bona edia aena palapala be boromakau edia aena palapala bamona, bona idia diaridiari, auri laboralabora bamona. 8 Edia hanina 4 henunai be imana 4 idia noho, taunimanima edia imana hegeregerena. Inai mauri gaudia 4 be mai edia vairana 4, bona hanina 4 danu. 9 Bona idia ibounai ta ta edia hanina ruaosi idia kehoa, vadaeni idia ta ta edia hanina ruaosi dokodia be idia ta ta edia hanina dokodia idia kamokau. Bona idia haboua ena toana be maua ta mai ena kahana 4 bamona. Bona idia 4 be vaira dekenai sibona idia raka, edia tauanina idia giroa lasi.

10 Inai mauri gaudia edia vairadia edia toana be idauidau, vaira kahanai edia vairana be taunimanima edia vairana bamona, idiba kahana dekenai edia vairana be laiona ena vairana bamona, lauri kahanai edia vairana be boromakau tau ena vairana, bona edia murina kahana edia vairana be ugava manu ena vairana ena toana bamona. Mauri gaudia edia vairana 4 be unai bamona. 11 Inai mauri gaudia edia ataiai hanina ruaosi idia kehoa, idia duduia isi, vadaeni edia dokona ese mauri gauna ta ena hanina dokona ia kamokau. Bona edia henuna hanina ruaosi ese edia tauanina idia koua. 12 Idia ta ta ibounai edia vairana be ibounai 4, bona idia edia matana be kahana 4 dekenai idia itaia diba. Unai dainai bema kahana ta idia lao noho neganai, idia edia vairadia idia giroa lasi, to idia lao sibona.

13 Inai mauri gaudia edia huanai be gau ta, iena toana be lahi ena gida bamona, o kede bamona. Inai lahi bamona gauna be mauri gaudia edia huanai ia marere lao. Inai lahi be ia hururuhururu, bona iena lalona dekena amo kevaru be ia kevarua lao. 14 Bona mauri gaudia danu be karaharaga idia marere lao bona marere mai, kevaru bamona.

15 Unai mauri gaudia lau itaia noho, vadaeni uili 4 lau itaia, idia ta ta be mauri gaudia ta ta badibadinai idia noho. 16 Unai uili ibounai edia toana be hegeregere, idia diaridiari, davana bada nadi bamona, bona uili ta ta be mai ena uili ta danu ia lalonai. 17 Unai dainai uili idia heau lao, heau mai diba, kahana 4 ibounai dekenai.

18 Lau ese inai uili lau itaia be bada herea dainai lau gari. Bona uili edia isedia auridia kuborodia be mai edia matana momo, idia hagegea noho. 19 Vadaeni mauri gaudia idia marere lao neganai, uili be idia danu idia marere lao. Bona bema mauri gaudia ese tano idia rakatania, idia roho ataiai, vadaeni uili danu be idia roho ataiai.

20 Mauri gaudia ese idia ura lao gabudia dekenai idia lao, bona uili danu be idia danu idia lao, badina be mauri gaudia edia lauma ese uili idia biagua bona hakaua noho. 21 Mauri gaudia idia lao neganai, uili danu idia lao. Mauri gaudia idia gini neganai, uili danu idia gini. Bona mauri gaudia ese tano dekena amo idia daekau neganai uili danu idia daekau, badina be mauri gaudia edia lauma be uili edia lalona dekenai idia noho.

22 Mauri gaudia edia kwarana edia ataiai be gau ta, iena toana be uro badana ta bamona, to idia habubua, vadaeni iena kununa be ataiai. Bona inai uro bamona gauna be ia diaridiari momokani, galasi namona bamona, bona ia be unai mauri gaudia edia ataiai ia noho.

23 Inai mauri gaudia be unai uro kuboruna ena henunai idia noho, bona idia ta ta ese edia ataiai hanina ruaosi idia kehoa. Bona idia ta ta edia hanina edia dokona ese ta ta edia hanina dokona dekenai idia kamokau. Ma edia hanina ruaosi, henunai gaudia ese ta ta edia tauanina idia koua.

24 Idia roho lao neganai, lau ese edia hanina edia regena lau kamonai, sinavai momo edia regena bamona, o Siahu Ibounai Dirava ena gadona bamona, o tuari orea bada herea ena regena bamona. Idia gini noho neganai, edia hanina idia hakapua. 25 Vadaeni edia kwarana edia ataiai ia noho uro badana bamona gauna dekena amo gado ta ena regena ia mai.

26 Unai edia kwarana edia ataiai habubua uro badana bamona gauna ena ataiai be gau ta, helai gauna ta bamona. Iena toana be nadi namo herea ena ladana sapairo bamona. Bona unai helai gauna latanai be gau ta lau itaia, iena toana be taunimanima ta, ia helai diho. 27 Unai Tau lau itaia, iena tauanina ena ataiai kahana be lahi ese ia hadiaria noho auri laboralabora bamona. Bona iena tauanina ena henunai kahana be hegeregere lahi ena diaridiari bamona. Bona lau itaia, diari badana ta ese ia hagegea noho.

28 Inai diari badana be mai ena kala momo, guba ena kevau bamona. Inai diari lau itaia, ia be Lohiabada dekena amo ia mai diari badana, Dirava ena hairaina ia hedinaraia gauna.

Vadaeni lau itaia neganai, lau moru diho, bona gado ta lau kamonai.