28
Peroveta hereva Turo ena king ena latanai
1 Lohiabada ese lau dekenai ia hereva, ia gwau, 2 “Tanobada tauna e, Turo ena king do oi hamaoroa, lau Dirava, Lohiabada ese ia dekenai lau hereva noho, lau gwau: Oi be hekokoroku dekena amo oi sibona oi abia isi, bona oi gwau oi be dirava ta. Oi gwau dirava ta ena kara bamona, oi be terona ta dekenai oi helai, bona davara ese oi ia hagegea noho. Io, oi gwau oiemu aonega be dirava ta ena aonega hegeregerena, to oi be taunimanima sibona, dirava lasi. 3 Oi laloa danu oiemu aonega ese Daniela ena aonega ia hereaia noho, bona oi laloa hunia gauna ta be oi dekena amo ia hunia diba lasi.
4 “Momokani oiemu aonega bona oiemu diba dainai oi ese kohu momo oi davaria vadaeni, bona golo bona siliva momo emu haboua ruma lalonai oi haboua vadaeni. 5 Hoihoi karadia dekenai oiemu aonega be bada dainai, oi ese oiemu kohu oi habadaia. Bona inai emu kohu bada dainai oiemu hekokoroku be ia bada momokani!
6 “Unai dainai lau, Lohiabada Dirava ese inai bamona lau hereva noho: Oi ese oi laloa oiemu aonega be dirava ta ena aonega hegeregerena dainai, 7 lau ese idau bese taudia, dagedage taudia momokani, do lau mailaia, idia ese oi do idia tuari henia. Idia ese oiemu aonega dekena amo oi abia hairai gaudia ibounai do idia hadikaia ore. 8 Idia ese oi do idia alaia mase, bona davara ena lalonai oi do idia doria, do oi diho ore momokani. 9 Oi alaia totona taudia oi dekenai idia mai neganai, oi be do oi gwau oi be dirava ta, a? Lasi, unai ala-ala taudia edia vairanai oi be taunimanima sibona, dirava ta lasi. 10 Oi be sisia sibona bamona do oi mase, idau bese taudia edia imadia dekena amo. Lau, Lohiabada Dirava, lau hereva vadaeni inai.”
Lalohisihisi ane Turo ena king totona
11 Lohiabada ese lau dekenai ma ia hereva, ia gwau, 12 “Tanobada tauna e, Turo ena king dainai lalohisihisi ane ta do oi abia, bona ia do oi hamaoroa, do oi gwau, ‘Lohiabada Dirava ese inai bamona ia hereva, ia gwau:
“ ‘Turo ena king e,
guna oi be namo herea bona goeva momokani,
aonega dekenai oi honu,
bona oiemu hairaina be ta ese ia hereaia lasi.
13 Oi be Eden dekenai oi noho,
Dirava ena uma gabuna be unai.
Herahera nadidia idauidau ibounai oiemu dabua dekenai oi atoa,
sadio, topasio, iasipa,
krusolito, berulio, onuku,
sapairo, barekete, bona samarago.
Oiemu herahera haida danu be golo dekena amo idia karaia,
oiemu vara dinana dekenai inai gau namodia,
be oi totona idia karaia hegaegae.
14 Kerubi aneru latana,
gimaia aneru unai,
be lau ese oi lau halaoa.
Unai dagi totona oi lau abia hidi.
Oi be Dirava ena ororo helagana dekenai oi noho,
bona oi be herahera nadi edia diaridiari ena huanai oi raka.
15 Oiemu vara dinana dekena amo,
oi be mai emu kerere lasi,
oiemu dala ibounai lalonai,
ia lao bona oiemu kara dika,
be oiemu lalona dekenai ia vara hedinarai.
16 Oiemu hoihoi karadia momo herea dainai,
oiemu lalona dekenai dagedage ia vara,
bona oi kara dika.
Unai dainai Dirava ena ororo helagana dekena amo,
lau ese oi lau negea diho,
mai emu hemarai bada danu.
Gimaia aneruna e,
nadi mai diaridiari edia huanai,
dekena amo oi lau lulua lao.
17 Oiemu kudouna be ia hekokoroku lao,
oiemu hairai bada dainai.
Oi ese oiemu aonega oi hamiroa,
oiemu hairaina dainai.
Unai dainai lau ese tanobada dekenai oi lau negea diho.
King taudia edia vairanai lau ese oi lau hahemaraia,
idia ese oi do idia itaia noho,
bona do idia gari totona.
18 Oiemu kara dika momo herea,
bona oiemu hoihoi kara koikoidia dekena amo,
oi ese oiemu gabu helagadia oi hamiroa vadaeni.
Unai dainai oiemu hanua, Turo,
dekenai lahi lau havaraia,
bona ia ese Turo ia gabua ore.
Oi idia itaia noho taudia ibounai edia vairana dekenai,
lau ese kahu dekenai oi lau halaoa, tano ena latanai.
19 Bese idauidau edia huanai,
oi idia diba taudia ibounai,
be oi dainai idia gari mai hoa danu,
unai kara be idia danu dekenai do ia vara garina.
Mai gari bada danu oiemu dokona ia vara.
Oi be oi boio vadaeni,
ia lao bona hanaihanai.’ ”
Peroveta hereva Sidono ena latanai
20 Lohiabada ese lau dekenai ia hereva, ia gwau, 21 “Tanobada tauna e, Sidono hanua dekenai oiemu matana do oi negea, bona Sidono taudia edia latanai do oi peroveta. 22 Sidono taudia do oi hamaoroa, do oi gwau: Lohiabada Dirava ena hereva do umui kamonai, ia ese umui ia herevalaia noho inai bamona, ia gwau:
“ ‘Sidono e, lau ese oi lau dagedage henia inai,
bona oi dekenai do lau karaia karadia dainai,
taunimanima ese egu ladana do idia hanamoa.
Badina lau ese oiemu taudia edia dika davana,
be do lau henia momokani,
bona egu helaga do lau hedinaraia neganai,
idia be do idia diba lau be Lohiabada.
23 Badina hanaia gorere dikana,
be Sidono lalonai do lau siaia,
bona rara danu oiemu hanua edia lalonai do lau bubua,
tuari dainai.
Kahana kahana ibounai dekena amo tuari taudia ese,
Sidono do idia tuari henia,
vadaeni Sidono taudia be tuari taudia ese do idia alaia mase.
Unai neganai Sidono taudia do idia diba lau be Lohiabada.’ ”
Dirava ese Israela do ia hanamoa
24 Lohiabada ia gwau, “Israela tano idia hegegea noho bese taudia ese ava ginigini o au ginigini bamona Israela taudia do idia hisihisi henidia lou lasi, bona idia ese Israela taudia do idia hereva dika henia o negea lou lasi, guna idia karaia bamona. Unai neganai do idia diba lau be Lohiabada Dirava.”
25 Lohiabada Dirava ese inai bamona ia hereva noho, ia gwau, “Israela besena taudia be edia huanai gabu idauidau dekenai idia noho besedia dekena amo do lau haboudia lou neganai, lau ese egu helaga be Israela taudia dekenai do lau hedinaraia, bese idauidau edia vairanai. Unai neganai Israela taudia be edia tano korikori dekenai do idia noho. Unai tano be egu hesiai tauna Iakobo dekenai lau henia. 26 Idia be unai tano dekenai do idia noho namonamo. Ruma do idia haginia, bona vain umadia do idia hadoa. Israela tano kahirakahira idia noho bese taudia, idia ese Israela taudia idia negea taudia, ibounai edia dika davana do lau henia murinai, Israela taudia be do idia noho namonamo. Unai neganai do idia diba lau be Lohiabada, edia Dirava.”