2
Dubu Helaga matamatana ena hairaina
Unai lagani ena hua namba 7 ena dina namba 21 dekenai, Lohiabada ese peroveta tauna Hagai dekenai hereva ia gwauraia, ia gwau, “Serubabele Sealetiele, Iuda ena gavana, Iosua Iehosadaka, Hahelagaia Tauna Badana, bona Babulonia ena hesiai mai guia danu dekena amo idia giroa mai taudia ibounai do oi hereva henia. Idia do oi nanadaia, do oi gwau, ‘Umui emui huanai dekena amo daika ese inai Dubu Helaga be iena hairai gunana dekenai ia itaia? Harihari iena toana umui itaia, be edena bamona umui laloa? Emui vairana dekenai inai be gau ta lasi, a?’ ”
Ma Lohiabada ia hereva inai, ia gwau, “Serubabele e, do oi goada! Hahelagaia Tauna Badana, Iosua Iehosadaka e, do oi goada! Umui tano taudia ibounai e, do umui goada, bona gaukara do umui karaia, badina lau, Siahu Ibounai Lohiabada be umui dekenai lau noho. Umui ese Aigupito umui rakatania neganai, unai bamona lau gwauhamata, bona egu Lauma be umui emui huanai ia do noho, unai dainai do umui gari lasi.”
Ma Siahu Ibounai Lohiabada ia gwau, “Lau ese inai kara ta ma do lau karaia: Lau ese guba bona tanobada bona davara bona tano kaukau gabudia do lau hamarerea, do idia heudeheude. Io, lau ese bese ibounai do lau hamarerea, vadaeni bese ibounai edia kohu namodia be iniseni do idia mailaia, bona inai dainai Dubu Helaga be hairai dekenai do ia honu. Lau Siahu Ibounai Lohiabada lau hereva inai. Tanobada ena siliva bona golo ibounai be lauegu. Inai Dubu Helaga matamatana ena hairai ese Dubu Helaga gunana ena hairai do ia hereaia. Bona inai gabu dekenai, egu bese taudia dekenai noho namo bona maino do lau henia. Lau, Siahu Ibounai Lohiabada inai, lau hereva vadaeni.”
Hagai ese hahelagaia taudia ia sisiba henidia
10 King Dariuse ena king lagani iharuana lalonai, hua namba 9 ena dina namba 24 dekenai, Siahu Ibounai Lohiabada ese peroveta tauna Hagai dekenai ia hereva henia lou. 11 Lohiabada ia gwau, “Hahelagaia taudia dekenai inai henanadai do oi nanadaia, idia ese taravatu ena anina do idia gwauraia maoromaoro totona: 12 Bema tau ta ese vamu helagana, boubou gauna dekena amo ia abia, bona iena dabua ena lalonai do ia abia lao, vadaeni bema unai dabua be paraoa, o vasiahu, o uaina, o olive dehoro, o aniani gauna ta dekenai ia kamokau neganai, unai gaudia be do idia helaga, a?”
Hagai ese idia ia nanadaia neganai, hahelagaia taudia idia gwau, “Lasi.”
13 Vadaeni Hagai ese idia ia nanadaia, ia gwau, “Bema tau ta ese mase tauna ena tauanina ia dogoatao dainai ia miro, bona ia ese unai aniani gaudia ta ia dogoatao neganai, idia be idia miro danu, a?”
Hahelagaia taudia idia gwau, “Io.”
14 Vadaeni Hagai ia gwau, “Lohiabada ia gwau: Inai bese bona inai basileia be unai bamona egu vairana dekenai, bona edia gaukara ibounai danu be unai bamona. Bona unai dainai boubou patana dekenai lau dekenai idia henia gaudia ibounai be mai miro danu.”
Lohiabada ia gwauhamata iena taunimanima do ia hanamoa
15 Lohiabada ese inai bamona ia hereva, ia gwau, “Umui dekenai inai bamona ia vara vadaeni ena badina be umui diba lasi, a? Umui ese Dubu Helaga umui do haginia hamatamaia lasi neganai, 16 umui be uiti ena haboua gabuna ta dekenai umui lao, 200 kilogaram do umui abia gwauraia, to 100 kilogaram sibona umui abia. Bona unai neganai danu umui be uaina ia noho gabuna dekenai umui lao, 100 lita do umui abia totona, to 40 lita sibona umui abia.
17 “Lau ese umui havaraia gwauraia aniani ibounai lau hadikaia, raraka dekenai, aniani ava gorere dekenai, bona medu dikana, aisi nadi bamona dekenai danu. To umui ese emui lalodia umui giroa lasi. 18 To hari dina be hua namba 9 ena dina namba 24, bona inai dina dekenai Dubu Helaga ena badina nadidia be edia gabu dekenai umui atoa vadaeni. Hari dina dekena amo ia lao, egu kara umui dekenai do ia vara gauna do umui itaia. 19 Momokani emui uiti be ia ore, bona vain audia, fig audia, apolo audia bona olive audia ese edia huahuadia idia do atoa lasi. To harihari ia lao, lau ese umui do lau hanamoa.”
Lohiabada ena gwauhamata Serubabele dekenai
20 Unai dina tamona dekenai hua namba 9 ena dina namba 24, Lohiabada ese hereva iharuana Hagai dekenai ia henia, ia gwau, 21 “Serubabele, Iuda ena gavana do oi hereva henia, do oi gwau: Lau Lohiabada ese guba bona tanobada be do lau hamarerea bada. 22 Bese idauidau edia basileia bona edia siahu be do lau hadikaia ore. Kariota mai edia guia taudia be do lau habubua, hosi bona hosi guia taudia be do idia mase, idia ta ta ese edia bamona, edia bamona, be edia tuari kaia dekena amo do idia alaia mase.”
23 Siahu Ibounai Lohiabada ia gwau, “Serubabele e, egu hesiai tauna, Sealetiele ena natuna e, unai dina dekenai lau ese oi do lau abia hidi, egu ladana dekenai bese do oi biagua totona, badina oi be egu ima kwakikwakina ena rini bamona.”