51
Lohiabada ese Babulonia ena dika davana ma do ia henia
1 Lohiabada ese ma ia gwau:
“Kamonai, lau ese lai dikana ta do lau siaia,
Babulonia bona iena taudia do lau hadikaia totona.
2 Bona idau bese taudia do lau siaia,
Babulonia do idia hagoevaia,
lai ese uiti ena momoru be,
uiti namona dekena amo ia hodaia ore bamona.
Bona unai hisihisi dinana ia ginidae neganai,
unai bese taudia ese kahana ibounai dekena amo,
Babulonia do idia tuari henia.
Unai neganai idia ese,
Babulonia ena tano ena anina do idia haorea momokani.
3 Babulonia peva taudia do umui alaia,
edia peva idia do veria lasi neganai,
bona edia tuari dabua idia do atoa lasi neganai,
do umui aladia mase.
Babulonia eregabe taudia,
be do umui bogahisihisi henia lasi.
Babulonia tuari taudia ibounai,
be do umui aladia ore momokani.
4 Idia be do idia moru diho,
Babulonia hanua lalonai,
mai edia berodia, mase gaudia,
ariara dekenai do idia hekure noho.
5 Badina be Israela bona Iuda edia Dirava,
Siahu Ibounai Lohiabada ese iena bese ia rakatania lasi,
to Babulonia taudia edia tano,
be kerere dekenai ia honu momokani,
Israela ena Helaga Dirava ena vairana dekenai.
6 “Babulonia dekena amo do umui heau mauri!
Umui ibounai emui mauri do umui tahua!
Babulonia ena dika dainai do umui mase lasi,
badina inai be Lohiabada ena davana henia negana!
Babulonia ena kara hegeregerena,
Lohiabada ese davana ia henia noho.
7 Guna Babulonia be golo kapusi,
lau Lohiabada egu imana dekenai,
inai kapusi dekena amo,
tanobada ibounai idia kekero.
Bese idauidau ese iena uaina idia inua,
unai dainai unai bese idia kavakava lao.
8 To harihari, Babulonia danu ia moru haraga,
bona ia makohia vadaeni.
Ia dainai do umui tai,
iena berona totona muramura do umui abia.
Sedira ia be do ia namo lou.”
9 Idau bese taudia,
Babulonia lalonai noho taudia idia gwau,
“Ita ese Babulonia ena hisihisi,
ita hanamoa gwauraia,
to iena bero dekena amo mauri ia davaria lasi.
Do ita rakatania haraga,
ita ta ta iseda tano ta ta dekenai do ita giroa lou,
badina be Dirava ese iena siahu dekena amo,
Babulonia ena dika davana ia henia vadaeni.
Ia ese guba dekena amo,
Babulonia ia hadikaia ore vadaeni.”
10 Lohiabada ia gwau,
“Egu bese taudia idia boiboi, idia gwau,
‘Lohiabada ese ia hedinaraia vadaeni,
ita be mai maoro danu.
Unai dainai namona be,
Ierusalema dekenai do ita lao.
Lohiabada iseda Dirava ena kara,
be Siona taudia dekenai do ita gwauraia hedinarai.’ ”
11 Lohiabada ese Media ena king taudia edia laumadia ia hatoreisia, badina be ia ura Babulonia tano do ia hadikaia ore. Inai bamona kara dekena amo Lohiabada ese Babulonia taudia edia dika davana do ia henia, idia ese iena Dubu Helaga idia hadikaia dainai.
Media tuari biagudia ese,
edia tuari taudia idia oda henia, idia gwau,
“Emui diba edia matadia do umui segea!
Emui kesi do umui abia isi!
12 Pepe ta do umui haginia,
Babulonia hanua badana ena magudia edia vairanai,
do umui tuari henia totona.
Gima taudia do umui hagoadaia,
gima taudia edia gini gabudia ta ta dekenai do umui atodia.
Hunia dekenai idia naria noho tuari taudia danu,
be do umui atodia hegaegae!”
Badina be Lohiabada ese,
guna ia gwauraia do ia karaia gauna,
be hari Babulonia taudia dekenai ia karaia noho inai.
13 Umui, sinavai momo edia badibadinai umui noho taudia e!
Kohu momo taudia e,
emui dokona be ia ginidae vadaeni inai,
emui mauri edia varona be idia utua vadaeni.
14 Siahu Ibounai Lohiabada be,
sibona ena ladana dekenai ia gwauhamata, ia gwau,
“Taunimanima momo herea,
kwadi idia momo hegeregerena,
be Babulonia do idia tuari henia,
bona idia ese do idia kwalimu momokani,
mai boiboi danu,
Babulonia dekena amo.”
Dirava hanamoa ane ta
15 Lohiabada ese iena siahu dekena amo,
tanobada ia karaia,
bona iena aonega dekena amo,
tanobada ena kahana ibounai ia haginia,
bona guba ibounai ia karaia.
16 Lohiabada ia hereva neganai,
guba ena ataiai idia noho ranu be idia boiboi noho.
Ia ese tanobada ena dokona gabudia dekena amo,
ori ia mailaia noho.
Ia ese medu lalonai,
kevaru ena diari ia hedinaraia noho,
bona lai be iena haboua gabuna,
dekena amo ia siaia mai noho.
17 Taunimanima ibounai be kavakava bona aonega lasi,
bona golo idia gaukaralaia taudia ibounai,
be edia kaivakuku ese idia hahemaraia noho,
badina edia kaivakuku be koikoi gaudia,
bona idia mauri noho lasi.
18 Idia be anina lasi,
laloa kerere ese ia havaraia gaudia sibona.
Davana abia dinana dekenai,
Lohiabada ese do ia hadikadia ore.
19 Dirava, ia ese Iakobo ia havaraia Diravana,
be unai kaivakuku bamona lasi,
badina ia ese gau ibounai ia karaia.
Ia ese Israela ia abia hidi vadaeni,
iena bese korikori do idia lao totona.
Iena ladana be Siahu Ibounai Lohiabada.
Lohiabada ena hama
20 Lohiabada ia gwau:
“Babulonia e, oi be egu hama,
bona egu tuari gauna.
Oi lau gaukaralaia dainai,
bese idauidau bona basileia momo danu lau hadikaia ore.
21 Oi dekena amo hosi,
bona edia guia taudia lau alaia mase.
Kariota lau hadikaia ore,
bona kariota idia haheaua taudia lau alaia mase.
22 Oi dekena amo tau bona hahine lau alaia mase,
tau buruka bona eregabe tauna danu.
Oi dekena amo uhau bona kekeni danu lau aladia mase.
23 Oi dekena amo mamoe naria taudia,
mai edia mamoe orea danu lau alaia mase.
Oi dekena amo danu lau ese tano hamakohia taudia,
mai edia hosi danu lau aladia mase,
bona oi dekena amo lau ese bese gunalaia taudia,
bona tuari lohia taudia lau alaia mase.”
Lohiabada ese Babulonia ena dika davana ia henia
24 Lohiabada ia gwau, “Umui emui vairana dekenai lau ese Babulonia bona Babulonia dekenai noho taudia ibounai edia dika davana idia dekenai do lau henia, Ierusalema idia hadikaia karadia ibounai dainai.”
25 Lohiabada ia gwau:
“Babulonia e, oi be ororo badana ta bamona,
bona tanobada ena kahana ibounai,
be oi ese oi hadikaia noho.
To lau ese oi do lau hadikaia gwauraia.
Lau ese egu imana dekena amo,
oi do lau doria lao,
bona oiemu ataiai nadi badadia,
do lau doria diho lao,
bona lahi dekena amo,
oi do lau gabua ore momokani.
26 Ruma edia kona nadi ta o ruma badina nadi ta,
be oi dekena amo do idia abia lou lasi,
to oi be anina lasi gabuna do oi lao hanaihanai.
Lau inai Lohiabada, lau hereva vadaeni.
27 “Pepe ta do umui abia isi,
Babulonia do umui tuari henia ena toa gauna.
Bese idauidau edia huanai,
kibi do umui hiriria,
bona inai basileia be do umui boiria,
Babulonia do idia hadikaia:
Ararata, bona Mini, bona Asakena e,
tuari ena lohia tauna ta do umui abia hidi,
Babulonia tuari henia taudia do ia gunalaia totona.
Hosi momo herea momokani do umui abia hegaegae,
kwadi idia momo herea bamona.
28 Bese idauidau do umui haboua hegaegae,
Babulonia do idia tuari henia totona:
Media taudia edia king taudia,
bona edia gavana, bona lohia taudia ibounai danu,
bona Media taudia ese idia biagua noho basileia,
edia taudia ibounai danu.
29 Tano be ia heudeheude noho,
bona hisihisi dainai ia mareremarere noho,
badina be Lohiabada ena palani ia gini noho.
Babulonia tano do ia hadikaia,
bona unuseni tau ta do ia noho lasi momokani.
30 Babulonia ena tuari taudia ese,
tuari idia hadokoa vadaeni.
Idia edia gabu aukadia lalonai idia hunia noho.
Idia edia laloa goada be ia ore vadaeni.
Idia be hahine taudia bamona,
gari ese idia ia halaoa vadaeni.
Babulonia hanua ena ruma,
be lahi ese ia gabudia noho,
bona hanua magu ena iduara edia auri,
loka gaudia, idia makohia vadaeni.
31 Hereva mailaia tauna be do ia heau,
ma iena murinai hereva mailaia tauna ma ta do ia heau mai.
Idia ese Babulonia ena king do idia hamaoroa,
iena hanua ena kahana ibounai idia abia vadaeni.
32 Sinavai ena raka hanaia gabudia idia abia vadaeni.
Gabu aukadia idia gabua ore vadaeni,
bona Babulonia tuari taudia be idia gari bada noho.”
33 Badina Siahu Ibounai Lohiabada,
Israela ena Dirava be inai bamona ia gwau:
“Babulonia be uiti, kwadia gabuna ta dekenai bamona,
idia moia diho gaudia,
bona nega sisina lalonai,
inai kwadia gaukara do idia hamatamaia.
Unai neganai unai idau bese tuari taudia ese,
Babulonia do idia utua diho, bona moia diho momokani.”
34 Babulonia ena king ese,
Ierusalema ia utua, bona ia ania.
Ia ese Ierusalema ia abia,
bona uro mai anina lasi hegeregerena ia halaoa.
Bona huala badana ena kara bamona,
ia ese Ierusalema taudia ia hadonoa.
Ia ese ai, Ierusalema taudia,
be iena aniani gaudia namodia ia halaoa.
Ai dekena amo iena bogana ia hahonua,
bona inai murinai ai ia mumuta lao murimurina dekenai.
35 Siona dekenai idia noho taudia do idia gwau,
“Dagedage karadia ai dekenai,
bona aiemai varavara taudia dekenai be Babulonia ena kerere.”
Ierusalema dekenai noho taudia do idia gwau,
“Babulonia taudia ese ai idia hisihisi henia,
bona hari aiemai rarana ena davana do idia abia be namo.”
Lohiabada ese Israela do ia durua
36 Unai dainai, Lohiabada ese,
Ierusalema noho taudia ia hamaoroa, ia gwau:
“Lau ese umui dainai do lau heatu,
bona umui idia hadikaia taudia edia davana do lau henia.
Lau ese Babulonia ena sinavai do lau hakaukaua,
bona iena ranu lohilohi gabudia edia heau,
be do lau hadokoa.
37 Babulonia be momoru dika momokani haboua gabuna do lau halaoa,
uda sisia idia loaloa noho gabuna.
Taunimanima ese Babulonia do idia itaia noho,
mai gari bona mai hereva dika danu.
Tau ta be unuseni do ia noho lasi momokani.
38 Babulonia taudia ibounai ese,
laiona natudia bamona idia boiboi noho.
Laiona maragidia bamona idia maumau noho,
39 badina edia aria lalonai,
uaina muramura idia inua momo.
To uaina dainai,
edia lalodia idia do siahu momokani neganai,
aria ma ta do lau abia hegaegae idia edia,
idia do lau hakekeroa,
ia lao bona do idia mahuta mase.
Bona do idia mahuta noho ia lao hanaihanai,
do idia noga lasi.
Lau inai Lohiabada, lau hereva noho.
40 Lau ese idia do lau hakaudia diho,
ala-ala taudia ese idia do idia alaia ore totona,
mamoe edia natudia idia alaia mase bamona,
bona mamoe tau bona nanigosi tau idia alaia mase bamona.”
Babulonia ese ena dika davana do ia davaria
41 Lohiabada ese Babulonia ia herevalaia inai bamona:
“Babulonia hanua be idia abia vadaeni.
Tanobada ibounai ese idia hanamoa bada hanua,
be tuari orea ta ese ia dogoatao vadaeni.
Babulonia madi,
be gari bona hoa gauna lau halaoa vadaeni,
bese idauidau edia vairana dekenai.
42 Tuari be davara bada bamona,
ia daekau mai,
iena hurehure ese,
Babulonia idia koua momokani vadaeni.
43 Babulonia ena hanua badadia,
be gari bona hoa gaudia idia lao vadaeni.
Idia be tano kaukau,
ranu noho lasi gabudia,
tau ta unuseni do ia noho lasi gabudia.
Taunimanima ta ese,
unai gabudia do ia raka hanaia lasi momokani.
44 Lau ese Bel dirava ena dika davana,
do lau henia Babulonia dekenai.
Ia ese ia henaoa gaudia,
be do lau abia lou,
bona bese idauidau ese,
ia do idia tomadiho henia lou lasi.
Babulonia hanua ena magu,
be do idia moru diho.
45 “Egu bese taudia e,
Babulonia dekena amo do umui raka siri!
Umui ibounai be ta ta ena mauri,
ena mauri dalana do umui tahua.
Lau Lohiabada egu badu mai siahu danu,
dekena amo do umui heau mauri.
46 Badina be lagani ta sivarai ta ia mai,
bona lagani ma ta sivarai ma ta ia mai noho,
bona dagedage karadia,
be tano lalonai idia karaia noho,
bona lohia ta ese,
lohia ma ta ia tuari henia noho.
Unai karadia umui kamonai neganai, do umui gari lasi,
to emui laloa goada do umui dogoatao noho.
47 Badina nega be kahirakahira do ia ginidae,
lau ese Babulonia ena dirava koikoidia dekenai,
edia dika davana do lau henia.
Babulonia tano ibounai ese hemarai do ia abia,
bona iena huana dekenai noho taunimanima ibounai,
be do idia alaia mase.
48 “Unai neganai guba bona tanobada,
bona edia lalonai noho gaudia ibounai ese,
tuari kwalimu ane mai moale danu do idia abia,
Babulonia be tuari ia lusi dainai,
badina be mirigini kahana dekena amo,
tuari orea taudia do idia mai,
Babulonia do idia hadikaia ore totona.
Lau inai Lohiabada,
lau hereva noho.
49 Babulonia ese tanobada taudia momo ia aladia mase.
Hari Babulonia be do ia moru,
badina be ia ese Israela taudia ia alaia mase dainai.”
Babulonia dekenai idia noho Israela taudia dekenai Lohiabada ia hereva
50 Lohiabada ese iena bese taudia Babulonia dekenai ia hereva noho,
ia gwau,
“Umui ese tuari dekena amo,
umui heau mauri vadaeni,
do umui heau lao,
do umui gini kava lasi.
Momokani emui gabu korikori dekena amo umui noho daudau,
to umui ese lau Lohiabada do umui laloatao.
Bona Ierusalema do umui laloa danu, do umui gwau,
51 ‘Ai be ai hemarai bada noho,
badina be hereva dikadia,
be ai dekenai idia hamaoroa.
Hemarai dainai aiemai vairadia ai koua noho.
Badina be idau bese taudia,
be Lohiabada ena Dubu Helaga lalonai,
iena gabu helagadia lalonai,
idia raka vareai vadaeni.’ ”
52 Lohiabada ia gwau,
“Unai dainai, lau gwau,
nega be kahirakahira do ia ginidae,
lau ese Babulonia ena dirava koikoidia,
edia dika davana do lau henia,
bona Babulonia ena tano kahana ibounai lalonai,
mai edia bero taudia be do idia tai noho.
53 Bema Babulonia ena goada be bada dainai,
ia ese guba dekenai bema ia daekau lao,
bona unuseni guba dekenai,
bema gabu aukana ia haginia danu,
to lau ese bese ta do lau siaia lao,
Babulonia do lau hadikaia ore totona.
Lau inai Lohiabada, lau hereva vadaeni.”
Lohiabada ese Babulonia ma do ia hadikaia
54 Lohiabada ma ia gwau,
“Kamonai! Taitai ena regena,
be Babulonia dekenai ia vara noho,
55 badina be lau Lohiabada ese,
Babulonia lau hadikaia noho.
Lau ese hanua badana ena regena lau hadokoa noho.
Tuari taudia be idia heau mai,
davara hurehure mai regena bada bamona.
Mai boiboi bada danu idia ese,
Babulonia idia tuari henia noho.
56 Inai tuari taudia ese,
Babulonia hadikaia ore totona idia mai vadaeni.
Babulonia tuari taudia,
be unai idau bese tuari taudia ese idia abia mauri.
Babulonia taudia edia peva be idia makohia vadaeni,
badina lau Lohiabada be davana henia Diravana,
bona lau ese Babulonia ena kara hegeregerena,
davana do lau henia.
57 Babulonia ena lohia taudia bona ena aonega taudia,
bona ena tuari taudia dekenai,
uaina do lau henia,
vadaeni do idia kekero.
Idia be do idia mahuta hanaihanai,
do idia noga lasi.
Lau King badana, Siahu Ibounai Lohiabada,
be lau hereva noho.
58 “Babulonia hanua badana ena magu,
lababa bada gauna,
be tano dekenai do idia negea diho,
bona ena magu iduaradia,
ataiai herea gaudia,
be lahi dekenai do idia gabua ore.
Bese idauidau taudia edia hekwarahi be anina lasi.
Basileia idauidau taudia,
madi idia gaukara kava vadaeni,
idia karaia gaudia be lahi ese ia gabua ore.
Lau inai Siahu Ibounai Lohiabada lau hereva vadaeni.”
Ieremia ena hereva be Babulonia dekenai ia siaia
59 King Sedekaia ena hesiai tauna, ia naria tauna, be Seraia, Neraia Maseaia ena natuna tau. King Sedekaia ese Iuda ia naria ena lagani namba 4 neganai, Seraia be king Sedekaia danu Babulonia dekenai idia lao. Unai neganai lau Ieremia ese Seraia dekenai hereva haida lau hamaoroa. 60 Lau Ieremia ese dika ibounai Babulonia dekenai do idia vara gaudia be buka ta lalonai lau torea. 61 Vadaeni lau ese Seraia lau hamaoroa, lau gwau, “Babulonia dekenai oi ginidae neganai, inai buka ena hereva ibounai do oi duahia. 62 Unai neganai do oi guriguri, do oi gwau, ‘Lohiabada e, oi ese oi hereva vadaeni, inai gabu do oi hadikaia ore, bona tau ta, o ubua gauna ta be iniseni do ia noho lasi. Ia be anina lasi gabuna do ia lao ela bona hanaihanai.’ ”
63 Ma Ieremia ia gwau, “Seraia e, buka ena hereva taunimanima dekenai oi duahia haorea neganai, buka dekenai nadi ta do oi kwatua kau, vadaeni Euperate Sinavai lalonai do oi negea diho. 64 Unai neganai do oi gwau, ‘Babulonia danu be unai bamona do ia diho. Do ia diho bona do ia daekau lou lasi, badina be Lohiabada ese Babulonia do ia hadikaia ore momokani.’ ”
Ieremia ena hereva be iniseni idia doko.