1 Nega daudau ia lao vadaeni, bona Lohiabada ese Israela taudia dekenai laga-ani ia henia. Idia dekenai idia tuari gwauraia taudia, Israela idia hagegea taudia be Lohiabada ese ia koua. Unai neganai Iosua be ia buruka, iena mauri lagani be momo. 2 Vadaeni Iosua ese Israela besena ibounai ia boiria, edia tau badadia, edia hanua lohia taudia, bona edia kota biaguna taudia, bona edia gunalaia taudia dekenai ia hereva henia, ia gwau, “Lau be lau buruka vadaeni, egu mauri lagani be momo. 3 Lohiabada, emui Dirava ese inai idau bese taudia dekenai umui dainai ia karaia gaudia, be umui itaia vadaeni. Lohiabada, emui Dirava ese umui dainai ia tuari vadaeni. 4 Umui kamonai namonamo: Do noho idau bese taudia edia tano, bona lau ese lau hadikaia ore bese taudia edia tano be umui dekenai lau henia, Ioridane Sinavai dekena amo ela bona Davara Badana, dina diho kahanai. 5 Lohiabada, emui Dirava, ese unai do noho bese taudia do ia doria lao, bona emui vairana dekena amo do ia luludia ore. Unai neganai edia tano do umui abia, Lohiabada emui Dirava ese umui dekenai ia gwauhamata hegeregerena.

6 “Unai dainai Mose ena Taravatu Buka lalonai idia torea hereva ibounai do umui badinaia, idia dekena amo do umui raka siri lasi, idiba kahana dekenai, o lauri kahana dekenai. 7 Inai bese haida, emui huanai do noho, be idia danu do umui turana karaia lasi. Idia edia dirava edia ladana do umui gwauraia lasi, bona edia ladana dekenai do umui gwauhamata lasi. Edia hesiai gaukara do umui karaia lasi, bona idia dekenai do umui tomadiho lasi. 8 To Lohiabada, emui Dirava, do umui badinaia, gunaguna ia mai bona harihari umui badinaia hegeregerena.

9 “Badina be Lohiabada ese bese badadia bona goadadia be emui vairana dekena amo ia lulua ore vadaeni. Tau ta ese umui ia koua diba lasi, ia mai bona hari dina. 10 Umui ta ese taunimanima 1000 umui lulua diba, badina be Lohiabada, emui Dirava ese umui dainai ia tuari, umui dekenai ia gwauhamata hegeregerena.

11 “Unai dainai, do umui naria namonamo, Lohiabada, emui Dirava do umui lalokau henia. 12 Badina be bema Lohiabada dekena amo umui raka siri, bona inai idau bese taudia, emui huanai do noho taudia danu bema umui turana karaia, bona idia danu umui headava neganai, 13 Lohiabada, emui Dirava ese unai idau bese taudia emui vairana dekenai do ia lulua lao lasi. Lasi momokani, to idia be do idia noho, tarapu o rikiriki bamona, bona idia ese umui do idia hisihisi henia, kwadia gauna emui doruna dekenai, o ginigini emui matana dekenai bamona. Bona inai bamona kara do idia vara noho, ela bona inai tano namona, Lohiabada, emui Dirava ese umui ia henia tano, dekena amo do umui boio.

14 “Nega daudau lasi lalonai lau be taunimanima ibounai edia dalana hegeregerena do lau mase. Umui ibounai be emui lalona, bona emui laumana dekenai umui diba, Lohiabada, emui Dirava, ese iena gwauhamata namodia ibounai umui dekenai ia hamomokania vadaeni, idia ta ia reaia lasi. Ibounai idia vara momokani, ta ia moru lasi. 15 To Lohiabada, emui Dirava, ena gwauhamata namodia umui dekenai ia badinaia momokani hegeregerena, Lohiabada ese gau dikadia danu umui dekenai do ia mailaia diba, ela bona umui do ia hadikaia ore, bona inai tano namona, umui dekenai ia henia tano, dekena amo do umui boio.

16 “Bema Lohiabada, emui Dirava, ese umui dekenai ia henia gwauhamata taravatuna umui utua, bona dirava idaudia edia hesiai gaukara do umui karaia, ma idia dekenai do umui tomadiho, emui kerere davana do umui abia. Lohiabada ena badu, mai siahu bada danu umui dekenai do ia ginidae, bona umui dekenai ia henia tano namona dekena amo do umui boio haraga.”