1 Dina haida murinai Iesu ia lou lao Kaperanauma hanua dekenai, bona haida idia gwau ia noho ruma dekenai. 2 Taunimanima momo ese idia vareai hebou, ela bona ruma ia honu momokani, bona iduara vairanai danu be gabu lasi. Iesu ese ia haroro, idia kamonai. 3 Tau 4 ese marere diba lasi gorere tauna ta geda latanai idia huaia lao, Iesu ese do ia hanamoa totona. 4 Idia ura vareai, to dala lasi, taunimanima momo dainai. Idia daekau guhi dekenai, guhi kahana idia kokia. Guhi matu ia noho gabuna dekena amo, marere diba lasi gorere tauna mai geda danu, idia atoa diho lao, Iesu ia gini gabuna dekenai. 5 Iesu ese edia abidadama kara ia itaia. Vadaeni gorere tauna ia hamaoroa, ia gwau, “Natugu, oiemu kara dika be lau gwauatao vadaeni.”

6 Taravatu hadibaia taudia haida idia helai unuseni, bona sibodia dekenai idia laloa momo. 7 Idia gwau, “Badina dahaka inai tau ia hereva unai bamona? Inai be Dirava ena ladana ia hadikaia. Daika ese Dirava hegeregere kara dika ia gwauatao diba? Dirava sibona mo.”

8 Nega tamona Iesu sibona ena lalona ia diba idia laloa unai bamona. Ia gwau, “Badina dahaka umui emui lalona dekenai lauegu kara umui gwau henia? 9 Edena hereva be ia haraga, gorere tauna lau hamaoroa, ‘Oiemu kara dika be lau gwauatao vadaeni,’ o, ‘Toreisi, oiemu geda oi abia isi, oi raka lao ruma dekenai’? 10 Lau ura umui diba namonamo Taunimanima ena Natuna ena siahu be ia hegeregere tanobada dekenai kara dika ia gwauatao.” Unai dainai ia ese marere diba lasi gorere tauna ia hamaoroa, ia gwau, 11 “Lau hamaoroa oi, oi toreisi, oiemu geda oi abia isi, bona oi lao ruma dekenai.”

12 Nega tamona ia toreisi, iena geda ia abia isi, bona murimuri dekenai ia raka. Ibounai idia itaia, idia hoa bada herea. Dirava dekenai idia hanamoa henia. Idia gwau, “Guna inai bamona ita itaia lasi!”

13 Iesu ia giroa lou kone dekenai, vadaeni taunimanima ibounai ia dekenai idia haboua, bona ia ese idia ia hadibaia. 14 Iena dala ma ia raka lao neganai, Iesu ese Alepeo ena natuna ladana Levi ia itaia, ia helai takisi moni abia gabuna dekenai. Iesu ia gwau, “Oi mai lauegu murinai.” Ia toreisi, Iesu ena murinai ia raka.

15 Iesu mai ena diba tahua taudia be idia aniani ruma lalonai. Vadaeni takisi abia taudia momo, bona kara dika taudia momo idia mai, idia helai unuseni, Iesu mai ena diba tahua taudia danu. Badina be idia momo Iesu ena murinai idia raka noho. 16 Farisea orea edia taravatu hadibaia taudia ese Iesu idia itaia, ia aniani takisi abia taudia, bona kara dika taudia danu, vadaeni idia ese iena diba tahua taudia idia nanadaia, idia gwau, “Badina dahaka ia be takisi abia taudia bona kara dika taudia nega tamona idia aniani?”

17 Edia hereva Iesu ia kamonai, ia gwau, “Dogeta ia mai lasi goada taudia dainai, to gorere taudia dainai ia mai. Lau mai lasi kara maoromaoro taudia boiria totona, to lau mai be kara dika taudia boiria totona.”

18 Nega ta Ioane Bapatiso ena diba tahua taudia bona Farisea taudia ese aniani lasi taravatu idia karaia neganai, taunimanima haida idia mai, Iesu dekenai idia nanadaia, idia gwau, “Badina dahaka Ioane Bapatiso bona Farisea orea edia diba tahua taudia ese aniani ania lasi taravatu nega idia badinaia noho, to oiemu diba tahua taudia ese idia badinaia lasi?”

19 Iesu ia hereva, ia gwau, “Umui laloa, headava matamata tauna ena turadia danu ia noho neganai, idia aniani lasi, a? Ia noho idia danu neganai, aniani lasi taravatu idia laloa diba lasi. 20 To dina ta dika taudia ese headava matamata tauna do idia abia lao. Unai dina dekenai, be iena turadia ese aniani lasi ena taravatu do idia karaia.

21 “Daika tauna be, dabua gunana dekenai, dabua matamata sisina maragina ia turia, hanamoa totona? Bema unai bamona, matamata gauna do ia veria, ia darea, bona matu dikana ia vara. 22 Daika tauna be, kopina gunana lalonai uaina matamata do ia bubua? Bema unai bamona, uaina ese kopina do ia darea, uaina ia bubua kava, bona kopina do ia dika vadaeni. To namo be uaina matamata, kopina matamata lalonai do idia atoa.”

23 Sabati Dina ta, koni ia tubu gabuna dekenai Iesu ia raka neganai, iena diba tahua taudia ese koni huahua haida idia kokia. 24 Farisea taudia ese ia dekenai idia nanadaia, idia gwau, “Badina dahaka idia ese mai taravatu kara idia karaia, Sabati Dina neganai?”

25 Iesu ia haere henia, “Umui duahia lasi Davida ena kara, ia bona iena taudia idia hitolo mase, aniani be lasi neganai? 26 Abiatara ia Hahelagaia Tauna Badana neganai, Davida ese Dirava ena dubu ia raka vareai, idia atoa Dirava ena vairanai paraoa ia ania, iena taudia dekenai ia henia danu. Unai paraoa be helaga momokani, hahelagaia taudia sibona idia ania diba.”

27 Idia dekenai Iesu ia hamaoroa, ia gwau “Dirava ese Sabati ia karaia taunimanima totona, Dirava ese taunimanima ia karaia lasi Sabati totona. 28 Unai dainai Taunimanima ena Natuna be Sabati ena biaguna.”