1 Farisea taudia bona taravatu hadibaia taudia haida Ierusalema dekena amo idia mai, Iesu dekenai idia haboua. 2 Idia ese iena diba tahua taudia haida idia itaia, imadia mai miro danu aniani idia ania, edia imadia idia huria lasi. 3 Badina be Farisea bona Iuda taudia aniani idia ania neganai, imadia idia huria namonamo guna. Inai be edia sene taudia edia taravatu. 4 Hoihoi gabuna dekena amo idia mai, bema idia digu lasi guna, idia aniani lasi. Taravatu momo inai bamona idia naria, kapusi, sosipani, aniani udaia gaudia huria taravatu.

5 Farisea taudia bona taravatu hadibaia taudia ese Iesu idia nanadaia, idia gwau, “Badina dahaka oiemu diba tahua taudia ese sene taudia edia taravatu idia naria lasi, aniani idia ania imadia mai miro danu?” 6 Ia hereva idia dekenai, ia gwau, “Umui be koikoi taudia, Isaia ese emui kara ia hedinaraia vadaeni. Ia torea inai bamona, ia gwau:

8 “Umui ese Dirava ena taravatu umui rakatania vadaeni, bona taunimanima edia taravatu sibona umui dogoatao noho.”

9 Ia gwau henia, ia gwau, “Momokani umui ese Dirava ena taravatu umui negea, emui sene taravatu umui dogoatao totona. 10 Mose ia gwau, ‘Oiemu tamana bona sinana oi hanamoa,’ inai danu, ‘Tamana o sinana ia hadikaia tauna, umui alaia mase.’ 11 To umui gwau tau ta ese iena tamana o sinana dekenai ia hamaoroa, ‘Lauegu hanamoa gauna umui dekenai lau henia lasi, badina ia be Kobana.’ (Kobana ena anina be, Dirava dekenai ia atoa vadaeni.) 12 Inai dala dekenai umui gwau iena tamana bona sinana ia durua lasi be namo. 13 Inai bamona dala umui emui taravatu dekenai Dirava ena hereva umui hadikaia, taunimanima danu umui hadibaia inai bamona. Kara momo unai bamona umui karaia danu.”

14 Iesu ese taunimanima momo ia boiria, idia mai lou ia dekenai, ia hereva henidia, ia gwau, “Umui ibounai lauegu hereva kamonai namonamo, bona diba. 15 Murimuri dekenai noho gauna ia vareai tau lalonai ese unai tau ia hadikaia lasi, to lalona dekena amo mai gauna ese ia hadikaia. 16 Mai taiana tauna, namo ia kamonai.”

17 Iesu ese taunimanima ia rakatania, bona ruma dekenai ia raka vareai neganai, iena diba tahua taudia ese iena parabole ena anina idia nanadaia. 18 Ia hereva idia dekenai, ia gwau, “Umui danu inai hereva anina umui diba lasi, a? Murimuri dekenai noho gauna ia vareai tau lalonai ese unai tau ia hadikaia lasi. Inai umui diba lasi, a? 19 Badina be unai tau ena lalona ia vareai lasi, to ia lao bogana lalonai sibona, bona inai murinai ia lao negea gabuna, ani?” Unai hereva dekenai aniani gaudia ibounai ia gwauraia idia goeva.

20 Ia hereva lou, ia gwau, “Taunimanima edia lalona dekena amo daekau gaudia ese taunimanima idia hadikaia. 21 Badina be taunimanima edia lalona dekena amo daekau gaudia be, laloa dikadia, sihari kava karadia, henaoa kara, taunimanima alaia kara, heudahanai kara, 22 tanobada gaudia ura dikadika kara, kerere idauidau, koikoi kara, lebulebu mai matabodaga kara, mata dika kara, tau ta ena ladana hadikaia kava kara, hekokoroku kara, bona Dirava ura lasi kara. 23 Inai gau dikadia ibounai lalona dekena amo idia mai neganai, taunimanima idia hamiroa bona hadikaia.”

24 Unai gabu Iesu ia rakatania, ia lao Turo bona Sidono kahanai. Ia vareai ruma ta dekenai, ia ura taunimanima ta ia diba lasi, to ena hunia dala be lasi. 25 Hahine ta ena natuna kekeni maragina be mai lauma dikana danu. Iesu ena kara sivarai ia kamonai, maoromaoro ia mai, ia tui diho Iesu ena aena badinai. 26 Inai hahine be Iuda lasi hahinena, iena bese be Suro Penise. Ia noinoi Iesu dekenai, natuna lalonai noho lauma dikana ia lulua oho.

27 Iesu ia gwau, “Maragidia idia boga kunu guna be namo, edia aniani henia sisia dekenai be dika.”

28 Hahine ia haere henia, ia gwau, “Lohiabada e, momokani, to sisia be pata henunai maragidia edia aniani momoru idia ania.”

29 Hahine dekenai Iesu ia hereva henia, ia gwau, “Inai hereva dainai oi lao, lauma dikana ese oiemu natuna ia rakatania vadaeni.”

30 Ia giroa lou iena ruma dekenai, kekeni ia davaria, mahuta patana dekenai ia hekure, lauma dikana ia rakatania vadaeni.

31 Turo tanona Iesu ia rakatania, Sidono tanona bona Hanua 10 tanona ia raka hanaia, Galilea Gohu dekenai ia ginidae. 32 Idia ese taia kudima bona hereva diba lasi tauna idia hakaua lao ia dekenai. Idia noia iena imana ia atoa ia latanai. 33 Taunimanima dekena amo Iesu ese ia hakaua siri idau gabu dekenai, vadaeni iena ima kwakikwakina unai tau ena taiana lalonai ia atoa. Unai murinai Iesu ia kanudi, bona tau ena malana dekenai iena ima kwakikwakina mai kanudi danu ia atoa. 34 Iesu ese iena matana ia negea gubai, ia noinoi, gabeai ia gwau, “Epata,” hereva anina be, “Oi kehoa.”

35 Vadaeni unai tau ena taiana ia kehoa vadaeni, ena malana ia ruhaia, bona ia hereva namonamo. 36 Iesu ese idia ia hamaoroa, tau ta idia hamaoroa lasi, to idia kamonai lasi, idia lao, sivarai idia kiki loaloa momo. 37 Idia hoa bada, idia gwau, “Gau ibounai ia karaia namo herea, taia kudima tauna ena taiana ia kehoa, hereva diba lasi tauna ena malana ia hanamoa.”