1 Parabole ta Iesu ia hamaoroa idia dekenai, ia gwau, “Tau ta vain uma ia hadoa, ara ia karaia, vain huahua moia gabuna ia geia, uma naria ruma ia karaia. Unai murinai uma ia henia naria taudia dekenai, vadaeni ia lao hanua daudau dekenai. 2 Huahua idia mage neganai, hesiai tauna ta ia siaia uma naria taudia dekenai, vain anina abia totona. 3 To idia ese hesiai tauna idia dogoatao, idia botaia, gabeai idia siaia lou imana kavakava. 4 Hesiai tauna ta ma ia siaia, to idia haberoa kwarana dekenai, bona idia hahemaraia dikadika. 5 Ta ma ia siaia, to idia alaia mase, momo danu ia siaia, to idia ese haida idia botaia, haida idia alaia mase. 6 Gabeai tamona sibona ia noho, uma biaguna ena natuna, ia lalokau henia. Dokona neganai ia siaia lao idia dekenai, ia gwau, ‘Ia be lauegu natuna dainai be do idia kamonai henia.’ 7 To uma naria taudia idia herevahereva, idia gwau, ‘Inai be dohore uma gabuna ia abia tauna, umui mai, ita alaia mase, dohore ita sibona uma gabuna ita abia.’ 8 Idia dogoatao, idia alaia mase, uma ena murimuri dekenai idia negea.

9 “Vain uma biaguna dahaka do ia karaia? Ia be do ia mai, uma naria taudia do ia alaia ore, vain uma gabuna be idau taudia dekenai do ia henia. 10 Inai Buka Helaga hereva umui duahia lasi guna, a? Ia torea:

12 Vadaeni, dubu biagudia idia ura Iesu idia dogoatao, to idia gari taunimanima dekenai, badina be idia diba, unai uma parabole ia gwauraia idia dainai. Idia rakatania, idia raka siri.

13 Farisea taudia, bona Heroda ena kahana taudia haida idia siaia Iesu dekenai, idia ura koia, iena hereva dekenai idia samania totona. 14 Idia mai, idia hereva henia, “Hadibaia tauna e, ai diba oi hereva maoromaoro, oi gari lasi taunimanima dekenai. Oi laloa lasi daika tauna dekenai oi hereva, tau badana o tau maragina, to Dirava ena dala oi hadibaia hereva momokani dekenai. Takisi moni ai henia Kaisara dekenai, ia namo o lasi? 15 Ai henia, o ai henia lasi?”

Iesu ia diba edia koikoi, ia gwau, “Badina dahaka lau samania dala umui tahua? Siliva moni ta umui mailaia, lau itaia.”

16 Idia mailaia. Ia nanadaia, ia gwau, “Inai be daika ena laulau bona ladana?” Idia gwau, “Kaisara ena.”

17 Iesu ia hereva idia dekenai, ia gwau, “Kaisara ena gaudia umui henia Kaisara dekenai, Dirava ena gaudia umui henia Dirava dekenai.”

Iena hereva dekenai idia hoa bada.

18 Sadukea taudia idia lao Iesu dekenai, idia laloa mase taudia do idia toreisi lou lasi.

19 Idia nanadaia, “Hadibaia tauna e, Mose ese inai taravatu ia henia ai dekenai, ‘Tau ta ena kakana ia mase neganai, bema iena adavana ia mauri noho, to natuna be lasi, vadaeni mase tauna ena tadina ese vabu do ia adavaia, bona natuna do ia havaraia, idia be iena kakana ena gwauraia.’ 20 Tadikaka be 7, vara guna tauna ese hahine ta ia adavaia, gabeai ia mase, natuna be lasi. 21 Tau namba 2 ese vabu ia adavaia, ia danu mase, natuna lasi, tau namba 3 danu unai bamona. 22 Tadikaka 7 unai bamona, ibounai inai hahine tamona idia adavaia, idia mase, natudia be lasi. Gabeai hahine danu ia mase. 23 Toreisi lou neganai, ia be daika ena adavana, badina be tau 7 ese idia adavaia vadaeni?”

24 Iesu ia hereva idia dekenai, ia gwau, “Umui emui kerere be inai, Buka Helaga umui diba lasi, bona Dirava ena siahu umui diba lasi. 25 Badina mase dekena amo toreisi lou taudia idia headava lasi, idia be guba dekenai noho aneru bamona.

26 “To mase taudia toreisi lou hereva Mose ena Buka lalonai umui duahia lasi, a? Au ginigini sivaraina lalonai, Dirava ese Mose dekenai ia hamaoroa, ia gwau, ‘Lau be Aberahamo ena Dirava, Isako ena Dirava, Iakobo ena Dirava.’ 27 Ia be mase taudia edia Dirava lasi, ia be mauri taudia edia. Unai dainai, umui be kerere bada.”

28 Taravatu hadibaia tauna ta ia mai, idia edia herevahereva ia kamonai, ia diba Iesu ia hereva maoromaoro idia dekenai, ia nanadaia, ia gwau, “Taravatu ibounai dekenai, edena be taravatu badana?”

29 Iesu ia haere henia, ia gwau, “Ginigunana be inai, ‘Israela taudia e, umui kamonai, Lohiabada iseda Dirava be Lohiabada tamona. 30 Lohiabada oiemu Dirava oi ura henia, mai oiemu kudouna ibounai, mai oiemu lauma ibounai, mai oiemu lalona ibounai, bona mai oiemu goada ibounai.’ 31 Namba 2 be inai, ‘Oiemu dekena tauna do oi ura henia, oi sibona oi ura henia bamona.’ Taravatu haida ese inai rua idia hereaia diba lasi.”

32 Taravatu hadibaia tauna ia hereva henia, ia gwau, “Hadibaia tauna e, oi hereva momokani, oiemu hereva be maoromaoro. Dirava ia tamona, ta lasi, ia sibona. 33 Tau ta ese Dirava dekenai do ia ura henia mai ena kudouna ibounai, mai ena lalona ibounai, mai ena goada ibounai, iena badibadinai tauna danu do ia ura henia, ia sibona ia ura henia bamona, unai kara ese boubou karadia ibounai ia hereaia.”

34 Iesu ia diba ia hereva mai aonega danu, vadaeni ia hamaoroa, ia gwau, “Oi bona Dirava ena Basileia be daudau lasi.” Unai murinai idia be hegeregere lasi hereva ta idia nanadaia lou.

35 Dubu Helaga lalonai Iesu ia hadibaia neganai, ia gwau, “Taravatu hadibaia taudia be edena bamona idia gwauraia, Keriso be Davida ena natuna? 36 Lauma Helaga ena aonega dekenai Davida ia gwau:

37 “Bema Davida ese Keriso ia gwauraia, ‘Lohiabada,’ edena bamona Keriso be Davida ena natuna sibona?”

Taunimanima momo ese Iesu ena hereva idia kamonai mai moale danu.

38 Iena hadibaia hereva lalonai Iesu ia gwau, “Taravatu hadibaia taudia umui naria namonamo, idia ura bada dabua lata, bona idia ura hoihoi gabudia dekenai taunimanima ese idia hanamoa bona saluti idia dekenai, 39 bona dubu lalonai idia ura helai gaudia namodia dekenai idia helai, aria neganai danu inai bamona. 40 Idia ese vabu edia rumadia idia henaoa, bona guriguri lata herea idia gwauraia koikoi. Inai taudia edia dika davana bada herea do idia davaria.”

41 Iesu ia helai moni udaia maua badinai, ia itaia taunimanima ese moni idia udaia, moni bada taudia momo idia mai, moni bada idia udaia. 42 Vabu ogogamina ta ia mai, moni maragimaragi rua ia udaia, hegeregere toea rua bamona. 43 Iesu ese iena diba tahua taudia ia boiria, ia hamaoroa, “Momokani lau hamaoroa umui, unai vabu ogogamina ese ia udaia moni be bada, idia ibounai udaia moni be maragi. 44 Badina be idia edia moni bada dekena amo sisina sibona idia udaia. To inai vabu ese iena moni ibounai ia henia vadaeni, iena aniani hoia moni danu.”