18
Babulonia do ia moru momokani
1 Inai murinai, aneru ma ta lau itaia, guba dekena amo ia diho mai. Ia be mai ena siahu bada herea, bona iena hairai ese tanobada ibounai ia hadiaria. 2 Ia boiboi badabada, ia gwau,
“Babulonia badana be ia moru vadaeni.
Io, unai hanua badana be ia dika vadaeni.
Lauma dikadia edia noho gabuna dekenai ia halaoa vadaeni.
Satani ena lauma dikadia be ia lalonai idia noho.
Manu dikadia bona manu dagedagedia,
be iena ruma lalonai idia noho.
3 Badina be bese ibounai ese iena uaina idia inua vadaeni.
Unai uaina be iena matabodaga karadia.
Tanobada ena king ese,
mai matabodaga danu ia idia sihari henia vadaeni,
bona tanobada ena hoihoi taudia ese,
Babulonia ena lebulebu karadia dekena amo kohu momo idia davaria.”
4 Vadaeni gado ta guba dekena amo lau kamonai, ia gwau,
“Lauegu orea taudia e,
ia dekena amo do umui raka siri,
ia danu do umui kara dika hebou garina,
bona ia danu panisi do umui abia hebou garina!
5 Badina Babulonia ena kara dikadia be momo herea momokani,
ororo bamona idia daekau lao, ela bona guba dekenai.
Bona Dirava ese,
Babulonia ena kara dikadia do ia laloaboio lasi.
6 Umui ese unai hahine dikana ena kara dika do umui laloa,
bona iena kara hegeregerena, davana do umui henia.
Iena kara dika ena davana do umui henia nega rua.
Ia ese uaina auka momokani haida dekenai ia henia.
Vadaeni umui ese unai uaina do umui ha-aukaia nega rua,
bona ia dekenai do umui henia, do ia inua.
7 Ia ese sibona ia habadaia,
bona lebulebu idauidau ia karaia momo.
Vadaeni umui ese hisihisi bona tai do umui henia momo,
iena lebulebu ia karaia momo hegeregerena.
Badina be sibona dekenai ia hereva, ia gwau,
‘Lau be kwini,
bona lauegu helai gabuna badana dekenai lau helai.
Lau be vabu lasi.
Lau dekenai be metau ta do ia mai lasi dainai,
lau be do lau tai lasi.’
8 Unai bamona ia laloa dainai,
dina tamona lalonai,
hisihisi idauidau ia dekenai do idia ginidae,
gorere, lalohisihisi, bona hitolo bada.
Lahi ese do ia araia ore,
badina be Lohiabada Dirava,
unai lebulebu hahine ia kota henia Diravana,
be mai ena siahu bada.”
9 Tanobada ena king taudia be Babulonia danu matabodaga bona lebulebu idia karaia hebou. Vadaeni Babulonia hanua be Dirava ese ia araia, bona unai lahi ena kwalahu idia itaia neganai, unai king taudia be do idia taitai bada. 10 Iena hisihisi do idia abia garina, daudau dekena amo do idia gini. Do idia gwau,
“Madi o, madi o, Babulonia e,
hanua bada herea, goada hanuana,
hora tamona lalonai, oiemu kerere davana oi abia vadaeni.”
11 Tanobada ena hoihoi taudia danu be ia dainai do idia taitai, bona do idia lalohisihisi. Badina be edia kohu be tau ta ese do ia hoia lou lasi. 12 Inai kohu be golo bona siliva, nadi namo hereadia, kavabukavabu, davana bada dabua, bona dabua kakakaka idauidau, siliki dabuadia, au namodia idauidau, elefante doana dekena amo idia karaia herahera gaudia, bona au dekena amo idia karaia korokoro gaudia, bona kapa, auri bona nadi kurokurona dekena amo idia karaia herahera gaudia. 13 Ma kohu haida inai bamona: Muramura namodia idauidau, kinamono, aniani mamina hanamoa muramura, kwalahu mai bonana namona ia havaraia muramurana, muramura mai ena bonana namona, bona kopina dahua muramura namona, uaina bona olive dehoro, paraoa bona uiti, boromakau bona mamoe, hosi bona kariota, bona hesiai mai guia taudia, bona taunimanima edia lauma danu.
14 Hoihoi taudia ese Babulonia idia hamaoroa, idia gwau,
“Kohu namodia, guna oi ura henia dikadika gaudia,
be idia ese oi idia rakatania.
Oiemu moni, ma oiemu hairai ibounai idia ore vadaeni,
bona idia do oi davaria lou lasi.”
15 Unai hoihoi taudia, idia ese moni momo unai hanua lalonai idia davaria. Idia be daudau dekenai do idia gini, Babulonia ena hisihisi idia danu do idia abia garina. Do idia lalohisihisi bada, bona do idia tai. 16 Do idia gwau,
“Madi o, madi o, hanua badana.
Guna ia ese davana bada dabuadia,
bona kakakaka kala rua dabuadia ia karaia,
golo, bona nadi namo herea,
bona kavabukavabu herahera gau namodia ia atoa.
17 To hora tamona lalonai, iena kohu ibounai idia ore vadaeni.”
Bona bouti badadia edia kapena taudia, bona bouti badadia dekenai idia guia taudia, bona bouti badadia edia kuru taudia, bona edia moni be davara dekena amo idia davaria taudia, be daudau dekenai idia gini. 18 Lahi ese Babulonia ia araia noho idia itaia neganai, idia edia lalona idia hisihisi bona idia taitai, idia gwau,
“Tanobada lalonai hanua ta ese unai hanua ia hereaia diba, a?”
19 Vadaeni tano ena kahu be edia kwarana dekenai idia negea, idia tai, idia tai mai boiboi bada danu, idia gwau,
“Hanua badana madi o, madi o!
Iena kohu momo dekena amo,
bouti badadia taudia ese edia moni bada idia davaria,
to hora tamona lalonai,
iena kohu ibounai idia boio vadaeni!
20 Guba lalonai noho taudia e,
Babulonia ena moru do umui moalelaia,
Dirava ena helaga taudia,
bona aposetolo taudia bona peroveta taudia,
do umui moale bada,
badina be umui dekenai Babulonia ese ia karaia hegeregerena,
Dirava ese Babulonia ena dika davana ia henia vadaeni.”
21 Inai hereva ia ore murinai aneru goadana ta ese nadi badana ta, iena toana be uiti ia moia nadina bamona, ia abia. Inai nadi ia abia isi, davara dekenai ia negea diho. Vadaeni aneru ia gwau,
“Babulonia hanua badana,
unai bamona, mai dagedage danu, oi do idia negea diho,
vadaeni taunimanima ese oi do idia itaia lou lasi.
22 Gita idia gadaralaia, bona ane idia abia taudia,
ivilikou idia gadaralaia, bona kibi idia hiriria taudia,
oiemu lalona dekenai edia regena do idia kamonai lou lasi.
Gaukara idauidau idia diba taudia be,
edia gaukara do idia karaia lou lasi oiemu lalona dekenai.
Uiti moia nadi ena gaukara ena regena be,
oiemu lalona dekenai do idia kamonai lou lasi.
23 Lamepa ena diari be,
oiemu lalona dekenai do idia hedinarai lou lasi.
Headava matamata tauna bona hahine,
oiemu lalona dekenai edia gadona do idia kamonai lou lasi.
Madi, oiemu hoihoi taudia,
guna idia be tanobada ena tau badadia momokani.
To oiemu meamea karadia ese bese ibounai idia koia.
24 Oibe, Babulonia be Dirava ese ia panisia,
badina be ia ese peroveta taudia ia alaia mase.
Ia ese Dirava ena helaga taudia edia rarana ia habubua,
bona tanobada dekenai idia alaia mase taudia ibounai,
edia rarana be,
ia lalonai idia davaria vadaeni.”