Pas ke Pol tife
Filimon
Peteng fate famu ine pas ke Pol tife Filimon
Filimon e ta taltalu e Pol. I e melmel ina Kolosi ma sios uwa, ri tiimtiim ulo ke fel. I e mel e kaltu na faim fofoes kia, asow gii Onesimus. Onesimus e sau finngeni e Filimon ma biing i e ta tura Pol ulo felun rerek, i e ikse sinangu ka puek ka ta kaltu na titinge. Filimon ming e buk su fespuek ka ta kaltu na titinge singe Pol. Pol e tuleni e Onesimus ka la mil use Filimon ma ka gatmo e Filimon una uun famila e Onesimus are tualik ilo bala titinge.
1
1 Yau Pol, kaltu ri reke nafow e Kristus ma tualikrer Timoti, kama siisiit tifo Filimon, konona fenngomem ma kaltu e faim tiim tura kama, 2 ma ming tife Apia fefnelikmem, ma tife Arkipus kaltu fafapaket tiim tura kemem lo sunwar, ma tife sios gii ri ka tiimtiim ilo bala keu fel.
3 Warfakausi ma balamaris tif gam singe Deo Tamrer ma Taufi Yesus Kristus.
Aro ma nining
4 Filimon, ilo fan nining kiang, ya sangsagif o ma katfarsi e kek Deo lo o, 5 anwarow ya ong lo titinge kiam ilo bala Taufi Yesus ma fabur kiam use re tongge nano ilo bala titinge. 6 Ya nining usi o, usi ou tibi main una peteng ine titinge kiam, usi eu mel e konona sangsang kiam lo fan mara mok kerer mel lo ilo Kristus. 7 Fabur kiam e pete gasgas i yau ma e pete raw i yau, anwarow o, tuaklik, o sagif su pete balamas ine balbalre tongge na titinge.
Pol e war rawas use Onesimus
8 Lo sangsang gii ilo bala Kristus, ya fasi una peteng rawas ma tungen o una gow e sa o samusu gow. 9 Safle anwarow lo sinang na fabur, ya su gatom o. Yau Pol, ya sam waraner ma ming kaltu ilo rerek nafow e Kristus, 10 ya su gatom o ini ou gow e konona sinang lo sikuang Onesimus, se e ta sikuang lo biing yau ulo rerek. 11 Famu, i e tibi ules o, safle gii, e sam la ta kaltu una ules o ma yau.
12 Onesimus e ta anmatkong sekit, igii ya ka tuleni mil usi o. 13 Ya bura tikin ini i eu melmel tura yau, usi eu kepe tafum una ules yau, biing yau ilo rerek nafow e konona sunwar. 14 Safle yau tibi tungen o una ules yau. Ya bura ini ou su usi e sinangum tibom. Gii yau tibi gow e ti mok ku muut ou a-uu. 15 Ya sang ini anwarow gii i ka tii kosing o lo borom pansumbiing, e ta usi ini o ku uun famila sekit mil. 16 Eu tibi ta are kaltu na faim fofoes, safle eu kausi iyat ine kaltu na faim fofoes, are fatualik ilo Kristus. I e ta tuaklik tikin, safle i eu ta tuamlik bala anmatkom. Eu ta are kaltu na faim, ma eu ta are fatualik ilo bala Taufi.
17 Le o ka par yau are ya na taltalum, on uun famila e Onesimus aregii o ku uun yau. 18 Le i ku gow e ti tubiil lo o, tam ka mel e sa kiam i singi, siufu e asow kosngi e tubiil a, ma o ku towfu e asang. 19 Yau Pol, ya siisiit ine limang tibom, ya mu kepe mafet lo. Ma yau tibi fasi una famtete sinangum ini ninliu kiam e kausi anwarow lo yau. 20 Tuaklik, ya bura tikin ini yau mel e fan mok sing o ilo Taufi. Pete balamas i yau ilo bala Kristus. 21 Ya titinge lo niongne kiam, gii ya ka siisiit tifo, ma ya parfat ini sa ou gow eu ta iyat ine sa ya peteng ini tifo.
22 Ma tikii mok ming, fagati e ti rum tif yau gii tongge ri ka melmel ilo, anwarow ya titinge ini, lo fang kokos lo fan nining kemi, Deo eu touf famil yau tif gam.
23 Epafras taltalu yau ilo rerek nafow e Yesus Kristus e tow e aro tifo. 24 Ma Mak ming, Aristakus, Demas, ma Luk tongge ri faim tiim tura yau.
25 Warfakausi ke Taufi Yesus Kristus eu ta tura tangtangwami.