15
Habo Nalolene Bi lo winigonaga Mbogoyi Yarusaleme yalu ibule mo penego ogo
Debidihanda ibunaga anda dewa Yarusalemeni binigo ai Yarusaleme Debidinaga tano laga wini. Ani bialu ibugua Ngode Datagaliwabenaga Habo Nalolene Bi lo winigonaga Mbogoyi biago wulene dindi henge mo manda manda buwa ogoriani balai anda bu helene. Ani buwa Debidi ibugua lalu, Anduane Homogohanda Libai hameigini dabowa ti hangume Habo Nalolene Bi lo winigonaga Mbogoyi ogoni mo yulenebi tigua ibunaga biabe bialu haabo holenebi nga laya, lene. Man 10.8 Ani lowa Debidihanda Isaraele wali agali bibahende olo mogo buwa Habo Nalolene Bi lo winigonaga Mbogoyi ogoni ibugua henge mo manda manda bu wiyagoria ngelo mo yu pudaba lole olene. Ani bialu ibugua loma binigo mo miaga Arono aria bu hearubi Libaiali hearubi mo ngoai hene. Libaiali uruni tinaga mini uru. Kohada hameigini Uriele henego ibu haguane howa ibugua agali ibuni aria handari mbirani pira kira (120) haru haga hene. Ani bialu Merari hameigini Asaia henego ibu haguane howa ibugua agali ibuni aria handari kirani pira kira (220) haru haga hene. Gesono hameigini Yoele henego ibu haguane howa ibugua agali ibuni aria handari mbirani pira tebira (130) haru haga hene. Elisabana hameigini Semaia henego ibu haguane howa agali ibuni aria handari kira (200) haru haga hene. Heberono hameigini Eliele henego ibu haguane howa ibugua agali ibuni aria pira halira (80) haru haga hene. 10 Usiele hameigini Aminadaba henego ibu haguane howa ibugua agali ibuni aria handari mbirani hombearia (112) haru haga hene.
11 Ani bialu Debidihanda loma binigo mo miaga Sadogobi Abaiadabi heba Libai hameigininaga agali haguane waragaria Uriele Asaia Yoele Semaia Eliele Aminadaba biaru bibahende ibilo olene. 12 Ibiyagola ibugua tihondo lamialu lalu, Libai hameigini agali haguane kamiru tíni heba tí aria bu karuni bibahende Anduane Homogonaga deni tíni dodo nahe hole biaga mana ngadagua bilimu. Anidagua biai howa Anduane Homogo Isaraelenaga Ngode Datagaliwabe kagonaga Habo Nalolene Bi lo winigonaga Mbogoyi biago Yarusalemeni dindi i̱na mo manda manda bidogoria ngelo mo yalu ibalimu. 13 Ai iname pigane mo pirimangi tí baba mandagi mo pu nabirimagoni ndobe. Iname mo yu ibalu howa Anduane Homogo inanaga Ngode Datagaliwabehondo agua yalu ibuleberemabe lalu hale nahe howa mana tigabi bulene wiadagua nabi bame yu ibalu hemaria ibugua inahondo keba halu minu baya, lene.
14 Ani layagola Libai hameigini hearumebi loma binigo mo miaga hearumebi Anduane Homogo Isaraele wali agalinaga Ngode Datagaliwabe ibunaga Habo Nalolene Bi lo winigo Mbogoyi biago mo yule howa tini Anduane Homogo deni dodo nahe holenaga mana biaga winigo bini. 15 Ani buwa Libai hameiginidarume Mbogoyi ogoni mo yalu ibule howa tigua bamba Anduane Homogohanda Mosesehondo lalu, Habo Nalolene Bi lo winigonaga Mbogoyi ogoni mo yule howa mana ogodagua bilimu, lalu lowinigo bialu mo yule pene. Tigua Mbogoyi ogoni iraho yulenaga ira helagago payani yalu pene. Har 25.14
16 Ani bialu Debidihanda agali Libai aria biaruhondo lamialu, Agali marume Habo Nalolene Bi lo winigonaga Mbogoyi mo yalu ibalu howa ngida aleru balu iba ganaru lama mo yalu ibalimu, lalu lamini. Tígua ngida aleru hongo howa balu pilipe hongo howa pulalu ngi̱li̱nge̱le̱ lagane beledi boronosime wabini ngaru hongo howa balu tí turu timbuni kamigo walia halu lama ibalimu, lene. 17-21 Ai agali haguane biaru tigua agali mbira mini Yoele igini Hemana dabalu ibu damene Beregaia igini Asababi Kusaia igini Edanabi ti dabene. Agali uruni tigua iba ganaru lalu beledi boronosime wabiniru ngi̱li̱nge̱le̱ lagane belo dabene. Ani biyagola Libaiali marume agali tebirali uruni biamogo bialu tigua ngida ale tara bi daliga ladaga haga wiaru belo dabene. Agali ngida uruni ale baga biaru ti mini Segaraiabi Yasielebi Semiramodobi Yahielebi Unibi Eliababi Maseabi Benaiabi dabo helene. Ani bialu agali marume ngida ale tara bi dindihaore ladali haga wiago belo dabene. Agali uruni ti mini Madidaiabi Elibelehubi Miginaiabi Asasaiabi dabalu Obededomo Yaelela libu agali Anduane Homogonaga anda haraba wiago mamage haga biagobi dabene.
22 Agali mbira mini Kenanaia heago ibu iba gana lolenebi ngida ale tara tara bolenebi manda biaihe henego ibugua Libaiali uruni bibahende biabe ogoni bayuwa bilo handayaho haabo helo dabo helene. 23-24 Ani dabalu agali mariali Beregaiabi Eleganabi Obededomobi Yahaiabi tigua Habo Nalolene Bi lo winigonaga Mbogoyi handaya howa mamage helo dabo helene. Loma binigo mo miaga marume Mbogoyi yalu poragola ti bamba halu biguli pu lama pelo dabo heleneru ti mini uru. Sebanaia Yosabada Nedanele Amasai Segaraia Benaia Eliesa laga biyaru hene.
Anduane Homogonaga Habo Nalolene Bi lo winigonaga Mbogoyi Yarusaleme yalu ibinigo ogo
(2 Samuele 6.12-22)
25 Mani howa Kini Debidi ibubi Isaraele agali haguanerubi ami haru hagarubi ti bibahende Obededomo andaga puwa Anduane Homogonaga Mbogoyi biago Yarusalemeni mo yu dai bule pene. Anidagua yalu ibiyagola wali agalime turu timbuniore hene. 26 Ngode Datagaliwabehanda Libaiali Mbogoyi biago mo yalu piyaru biamogo biyagonaga tigua nogo bulumaga wangabe kariabi sibi dalua haba tigi kariabi ibuhondo loma bialu bo delene. 27 Debidi ibunibi Libaiali Mbogoyi biago yu hayarubi iba gana lalu hagarubi tinaga haru haga agali mini Kenanaia ibubi aga pele taraore mbira mbira karulaga bini. Debidi ibu aga mende loma binigo mo miaga agalinaga aga mini ebodi karulowa turu halu Anduane Homogonaga mini yaraga halu turu hama pene.* Aga mini ebodi Har 25.7 garea lo ngago handabe. 28 Ti ogonidagua bialu Anduane Homogonaga Habo Nalolene Bi lo winigonaga Mbogoyi biago Debidibi Isaraele wali agalibi tigua Yarusaleme mo yalu pene. Tigua turu timbuni howa ga̱ lalu ngida ale tara tara balu pilipe ale pulalu bigulibi pu lama pene.
29 Tigua Mbogoyi biago Debidinaga tano biagoria yu anda ibiyagola Solo wane Migala ibu andaga windoha handatagi halu hearia ibu agalini Kini Debidi ibu turu howa mali lima pogoladaga haga bima ibalu hearia hendene. Anidagua biyago hondowa Migala ibugua turu nahe howa Debidihondo keba howa yo hondo berene.

15:2: Man 10.8

15:15: Har 25.14

*15:27: Aga mini ebodi Har 25.7 garea lo ngago handabe.