1 Gogiasa ibugua ami agali daosini dege duria (5,000) geni pialu wai biaga halu daosini mbira (1,000) nogo hosini biruwa wai biaga henego ai tigua tinaga balai anda bu hayagoria howa mbira tagira pene. 2 Agali maru Yarusalemeni anda hongohe biagoha mamage haga hearume ti hariga walia hene. Gogiasa ibugua Yuda ami kagoria mbiraga anda puwa wai mbiraga bu manda bini. 3 Ani bira layago Yudasa ibu abale hale ho bolangua halu ibugua ami agali haru halu Emaiasa tano wiagoria puwa kininaga ami biaru baba wai bialu hene. 4 Ogoningi Gogiasa halu ibunaga ami agali biaru kaundiaha heagola bialu hene. 5 Ai Gogiasa halu ibunaga ami agali biaru Yuda ami anda bu henedagoria anda pialu hemiria mbirali mbira naheoreyane hendene. Ai Yudasa halu ibunaga ami agaliru ibida piyabe toba howa ai hari bare wiaruha taya bima pene.

6 Egerebagi gaolalu biyagola Yudasa halu ibunaga ami agali daosini tebira biaru hama tigabi wiagoria pu hene. Ani bialu ti dewali wai pialu karulagane agabi wai biagane ayu tibubi nawi hene. 7 Ai waitiginaga balai anda buwa ti haga wiago hongoheore mbira wiaria hendene. Agali ami nogo hosini biruwa wai biaga hearume ti daluha mamage ho hearia hendene. 8 Ani hondowa Yudasahanda ibunaga ami agali biaruhondo lamialu lalu, Tinaga ami agali timbuni dewaore bu karia handa hendedemigonigo ai tígua mogo nale halimu. Tigua porabupe halu wai birangi tí gi naheore elaho halimu. 9 Baya hangu mitangi bidaba. Bamba Iyibi kini heagome ibunaga ami agali haru halu ina mamaliru talima iba solowara mini Daramabi laga wiagoria ibiyagola Ngode Datagaliwabehanda ti mo wialu biamogo bini. 10 Ayu nde Ngode Datagaliwabehanda ina dara halu biamogo bilonaga ibu olama. Bamba ina mamaliru baba habo nalolene bi lo wiyago lone mitangi bu dai bialu iname wai hamani porabupe halu wai beremangi ibugua waitigi bame hengedopaya bilo iname ibuhondo bi lama. 11 Anidagua birago wali agali tara tara bu karu ti de hondowa Isaraele wali agalinaga Ngode Datagaliwabe mbiraore ogoni ibu hangu heneore howa ibunaga wali agaliru mo wialu baya hangu handaya ho haga ka lolebira, lene.

12 Waitigi agali biarume Yudasa halu ibunaga ami agali biaru ibiyago de hondowa 13-14 tiguabi nde wai bule tinaga anda bu heagoria howa tagira ibini. Ai Yudasa halu ibunaga ami agali biarume wai bulenaga pilipe ale mini biguli pu layagola tigua pora bialu wai bini. Ani biyagola waitigi biarume ti ho giligalalo howa ibida dindi tigabi bayale wiagoria piai hene. 15 Ani pialu heaore dege maru gerai nale ha layaru Isaraele tigua minalu bogai hene. Ani bialu Isaraele tigua bama talima piaho wialu Gese tano pialu Idumia dindihayagi dindi tigabi wiagoha piaho wialu Asadodo tanobi Yabane tanobi wahalu talima pu dege bialu waitigi bo wahai henego daosini tebira (3,000) bibahende bo wahai hene.

16 Ai Yudasa halu ibunaga ami agali biarume waitigi agali biaru talima pugupugu buwa talu wahalu lone dai bini. 17 Ani buwa Yudasahanda ibunaga ami agali biaru lamialu lalu, Iname wai bulene wia dege bidago tígua waitiginaga mbirale ngaru abale mo yule duru nale hadaba. 18 Gogiasa halu ibunaga ami agali weneore hari bare ngagoha kago ai tí hongo ho howa wai biai howa mbirale waitiginaga ngago tíni hame ledemigobi mo yuleberemi, lene. 19 Yudasahanda bi lai hayagola ami agali waitigi aria tidi mbira hari bare wiagoha howa tagira ibalu ibini. 20 Ibuwa handalu hemiria ira hagua timbuni dadaga hayago hondowa tinaga ami bu hearu bo wahai halu tinaga balai anda dai hayada lo manda bini. 21 Anidagua biniyago hondowa ti mogo lalu gi timbuni ho hene. Ani bialu Yudasanaga ami agali biarume hama bayale dindi tigabi wiagoria wai bule manda manda bu heago hondowa 22 ti ibida pora bialu Pilidia dindi wiagoha yagi piai hene. 23 Ani piya handala Yudasa ibu waitiginaga dabudabu wiaru mo pene. Ibugua muni silibabi ngolobi labolabo daramabi baya tara tarabi maru tara muni dewame yolo biaga wiarubi mo yai hene. 24 Yuda ami biaru tininaga balai anda heagoria dai bialu howa tigua Ngode Datagaliwabenaga mini yaraga halu iba gana lama dai bini. Anidaagua binidago irane Anduane Homogo ibu bayale howa ibunaga dara holene wiaabo haga ngagonaga iba gana lalu ibunaga mini yaraga hene. 25 Horo ogoningi Isaraele wali agali tigua wai bialu hongoheore halu mbiralime bope habe nahe hene.

26 Ami agali tara ibida piyarume Lisiasa hearia puwa mbirale biyaruni bibahende te lamiai hene. 27 Ai te uruni hale hai howa ai ibunaga ami agali biarume kinihanda bilimu lalu lamiyadagua Isaraele wali agali mbira hangubi wanahe bo hilo wahai halu dindi anda bo labu halimu layadagua nabiyagola Lisiasa ibu mogo lalu miniha genda timbuni hene.

28 Maha mali mendeni howa Lisiasa ibugua ami agali wai baya hangu bulenenaga tuguli bini bayaleore daosini dege pira waragaria (60,000) dabo helalu nogo hosini biruwa wai bulene daosini dege duria (5,000) helalu buwa ai ibugua Yuda wali agali bo hilo wahaiore holoboda lo manda bini. 29 Ai ami agali uruni tigua heyalu puwa dindi mbira mini Idumia wiagoha Bedesu tano wiagoria balai anda bu hene. Ani heagola Yudasahanda nde ibunaga ami agali daosini pira (10,000) haru halu wai bule ngola ho ibini. 30 Ani ibuwa waitigi ami hearunaga hongo gibiore heago hondowa ibugua Anduane Homogohondo bi lalu, Ngode Datagaliwabe-o iname í̠naga mini yaraga holene hame ledema. Í̠na Isaraele wali agali mo wialu haru dai biagaore ke. Í̠na agali timbuni hongohe mbira heagonaga hongo agali í̠naga biabe bia haga Debidinaga giha howa bope hariya. Í̠na Solo igini Yonadanala ibunaga agali danda timu ayagu yu ha haga heagola biamogo birigola libugua Pilidia ami hearu bai halu wayali haya.✡1 Sml 14.1-23, 17.41-54 31 Ayu anidagua dege í̠naga wali agalime waitigi ibirago balu wayali holoma̱ya í̠nime ina biamogo bibe. Ami agali dewabi tinaga hongo kagobi nogo hosi kagobi uruniha mini hana ho howa mine halu karuni mo taga habe. 32 Ti mo gi halu ibida piai helabe. Tinaga hongo mo gedaore helabe. Iname ti bai halu bo hengedo wahai helabe. 33 Wali agali í̠naga mini mandabi karume í̠naga mini yaraga halu iba gana lelo wali agali í̠ gubalini ho haga bu karu ti giha howa waitigi uruni bo wahaiore habe, lalu Anduane Homogohondo bi lene.

34 Ani lalu puwa wai bialu Lisiasanaga ami agali daosini duria (5,000) bibahende bai hene. 35 Ai Lisiasa ibugua handalu hearia ibunaga ami agali biaru hongo ibira hai halu Yudasa halu ibunaga ami agali biaru ti gi naheore waiha homai holeore lalu agali gibiore heago hendene. Ani hea handalu Lisiasa ibugua Andiogo dai buwa ami agali gahenge dewaore ibu biamogo bilonaga munime yolo bu helene. Ibugua ami agali dewaore haru halu Yudia dindiha wai daibule lo manda bini.

36 Ai Yudasa halu ibu hamene biarume lalu, Ai waitigi biaru bo talu pelai harimago ainde iname Yarusaleme dai buwa Ngode Datagaliwabenaga anda kago ibuninaga deni lone mo bayale halu ibunaga biabe bulene ngago bilo loma bu miadai bimi̱ya ma, lene.*Agali Anduane Homogo mitangi nabiaga hearume ibunaga anda tamuha anda pialu mbirale maname tamuha yu anda napiaga lo wiago mo yu anda pialu bini. Ani bialu mana ko tara tara anda biago tamuha bialu hene. Anidagua bini wiagome Ngode Datagaliwabenaga deni anda dodohe hene. 37 Ani lalu wali agali íbu ngoai halu hari Saiono nene irigi hene. 38 Puwa handalu hemiria Anduane Homogonaga anda biago bameore hearia hendene. Lomabu delaga dabu mo ko hene ko wiaria hendene. Panga heneru dai halu datani bolaga ko hearu timbuni anda hai halu anda hai biago yuladambi hai halu tano biago embera tegi ko mbira wiaria hendene. Anda biagoha hobane loma binigo mo miaga agalinaga tamu hobane henego bo gialo wahai hene wiaria hendene. 39 Mbirale uruni hondowa wali agalime dara timbuni halu tinaga aga minu lerelai hene. Tigua dugu hongo howa biai halu be abalu tinaga emboneni dugu wigi bini. 40 Ani buwa ti dindini bulupalu wuwa pilipe biguli layuago hale howa ti bibahendeme Ngode Datagaliwabe olai halu hene.

41 Ai Yudasa ibugua Anduane Homogonaga anda lone mo bayale hole howa ibunaga ami agali marume Siria ami agali maru anda hongohe tini bu helayagoha hearu baba wai bule pudaba, lene. 42 Ani bialu agali loma binigo mo miaga maru mana ko nabiaga howa Anduane Homoganaga bi mana baya hangu talialu haga hearu dabalu 43 anda biago Ngode Datagaliwabenaga deni dodo nahe helo mo bayale helo dabo helene. Ani bialu lomabu delaga dabu bini ege to̱le̱ Anduane Homogo deni dodohe wiaru mo tagira puwa dindi ko Anduane Homogo deni bayale ndo wiagoha bape haga bini. 44-45 Anigo loma bu delaya dabu kago ibuni agali Anduane Homogo mitangi nabiaga bu hearume mebia halu mo ko hayadago agua bimabe lowa tini bi lala bialu hene. Ani lowa tigua bi lo mbira halu, Ani ngelo kemaria inane taga pani nolene dege ngago mo wahami̱ya lalu bi lo mbira hene. Ani lo mbira howa tigua Anduane Homogonaga lomabu delaga dabu ogoni gialalu 46 ege to̱le̱ dabu ogoni bini ngago mo mogobu yalu puwa hari bare Anduane Homogonaga anda ogoni kago erembira handabe nahe ngagoha mo do hami̱ya. Ege to̱le̱ uruni ogoniha ngelo haabo howa agali Anduane Homogonaga bi mana latagi haga mbira ibalu ege to̱le̱ uruni ogoale bidaba laradagua bimi̱ya ngelama, lowa ani wini. 47 Ani bialu tigua ege to̱le̱ gahengeru agalime biabe maru bulenaga podala nahe ngago podalu bibe lowa Mosesenaga mana lo ngagome ledadagua tigua gahenge heago podo yuwa Anduane Homogonaga lomabu delaga dabu gahenge ala hayagobi dege bu aribia ho helene.✡Har 20.25, Man 27.5-6 48 Ani buwa tigua Anduane Homogonaga anda tagiraha tamuhabi mo tiga biai howa dindi anda biago kawareni wiago bibahende Anduane Homogonagaore ngelo mo loma bia hai hene. 49 Lotunaga wiagane ale bibahende gahenge wabu aribia hai hene. Lamu hale delo ngelaga dabubi ira hagua nga bilo inisenesi lomabu delaga dabubi mberedi Ngode Datagaliwabe lomabu minigo mo wiaga dabubi gahenge wabiai howa Ngode Datagaliwabenaga andaha mo yu anda ibai hene. 50 Ani yu anda ibu wiai howa inisenesi lomabu delaga dabu wiagoria ogoni lomabu delalu lamu hale hedo wiaga wiagoria lamu hale hedo wialu biyagola Anduane Homogonaga anda tamuha wá holene hadai bini. 51 Mberedi wiaga tebolo dagia wiagoria mberedi mo wialu labolabo timbuni wiaga wiagoria labolabo ogoni ale dege wia aribia hene. Tigua mbirale urunidagua bialu biabe bulene wiago biai hene.

52 Ai mali handari mbira pira mariani haliria (148) layagola ege dini mini Kisilebenaga horo pira kirani duria (25) layagola†Mali 148 layagola horo ayu ogoningiore Kini Andiogusu ibugua dabu ogoriani bi pupu wule gime wabini wiagonaga loma Anduane Homogonaga anda ogoniha howa bu delene. Te 1 Magabi 1.49 ngago hondolene nga.✡1 Mag 1.54 53 tigua egerebahagiore gao layagola abale heyuwa maname ledadagua lomabu delaga dabu gahenge biagoria lomabu delene. 54 Horo abale waitigi Anduane Homogo mitangi nahaga hearume lomabu delaga dabu heago mo dodohe helayago horo ogoni dege tagira ibiyagola Isaraele tigua lomabu delaga dabu ogoni mo loma bia halu iba ganaru lalu ngida balu tabagaru balu iba gana lalu bini. 55 Ainde Anduane Homogohanda ti biamogo biyagola tigua wai buwa tigua waitigi bope halu wayali hayagonaga turu howa wali agali bibahende dindini bulupalu ibira howa Anduane Homogonaga mini yaraga halu ibuhondo lotu lene. 56 Horo halira bibahendeni tigua lotu lalu lomabu delaga dabu ogoni Anduane Homogonaga ngelo mo loma bia halu hene. Tigua turuore halu loma irani dai helolene lomaru yalu ibalu Ngode Datagaliwabela hogimbu bulenaga lomaru yu ibalu Ngode Datagaliwabehondo ka̱i̱ lolene lomaru yu ibalu bini. 57 Tigua ngolomo pu payuwa mo yaribia haga buwa wai biaga humbi wiaru mo yáribia howa Anduane Homogonaga anda haneni wini. Ani bialu tigua wai pabe panga hearu baya hangu arema bialu agali loma binigo mo miaga hearunaga anda hobane bo gialahole bini wiaru lone mo arema buwa biadai bialu pangaru baya hangu wabu helaga biai hene. 58 Wali agali tigua mbirale ti mo taga holenaga agali Anduane Homogo mitangi nahaga hearume mo yu íbu wini biaru mo wahai howa ti turu timbuni ho hene. 59 Ani howa ai Yudasa halu ibu hamene biarubi Isaraele wali agali bibahendebi tigua bi lo mbira halu mali bibahendeni horo Anduane Homogonaga lomabu delaga dabu mo loma bia haramago mitangi biaabo hamalo. Lotu lolene horo timbuni ogo ege mini Kisilebe laragola horo pira kirani duria (25) haragola ngoai howa horo halira bibahende lotu lalu hami̱ya lalu bi lo wini.‡Yuda wali agali tinaga lotu lagane horo timbuni ogoni mali bibahendengi tagira ibiragola ti mo ngoai howa lotu timbuni laga winigo ayu wiaabo ka. Tigua Horo timbuni ogoni mini Hanuka laga.

60 Ai tigua Saiono neneni Anduane Homogonaga anda kagoha ege pabe hongohe daligaore bu mabu buwa pabe neneni mamageali anda hongohe bu helaga bini. Waitigi agali Anduane Homogo mitangi nahaga bu hearume abale ibalu mbirale Anduane Homogonaga mo loma bia hene wiaru hengeda hai halu mebia halu penedagua bulino pabe hongohe bini. 61 Ani buwa Yudasa ibugua ami agali maru dabalu Anduane Homogonaga anda mamage helo helene. Ani bialu Idumia dindi ngagohayagi handa daibu holenenaga tano hongohe Isaraele wali agalinaga tano Bedesu mo hongo howa ngelene.