1 Mali handari mbira pira duriani mbira (151) layagola Selugusu igini kini Demidiriasa halu ibunaga ami agali maru haru Lomo tano wahalu tano mbira iba solowara angeni wiagoria íbu hene. Ogoriani íbu howa ibu kini ko lalu latagi hene. 2 Ani lalu ibu mamalirunaga kini andaga wiagoha anda íbu biruwa ibunaga ami agali hearume Kini Andiogusubi Lisiasabi mini garabaya bu yalu Kini Demidiriasa berearia pene. 3 Ogolabo garabaya bu yalu ibira layago Demidiriasa ibu hale howa ibu agali ogoni labo dengui nahondoleore, lene. 4 Ani layago hale howa ami agali bu hearume ogolabo homelo bo wahayagola Kini Demidiriasa ibu hene.

5 Yuda hameigini bi mana lo wini ngago hale nahaga mine haga agali maru hene. Agali uruni tinaga haguane Alagimusu henego ogoni ibu loma binigo mo miaga haguane holenaga hongo halu hene. Ani howa agali uruni aria maru Kini Demidiriasa hearia puwa tigua lalu, 6 Yudasa halu ibunaga ami agali hearume wali agali í̠ gubalini haga hearu bo wahai halu inabi inanaga dindiha howa bo taliatagi haya. 7 Ai Yudasa ibugua í̠naga dindi hobane wirigo mo ko halu inanaga mbirale wimaru mo ko hai hayadago de hendelo agali í̠naga dabene mbira kago ibugua de hondole pu labelo hamelo kema. Ani bialu Yudasa halu ibu hamenerubi wali agali ibu biamogo biaga bu karubi bibahende pani nelo mibelo hame ledema, lene.

8 Ani layago hale howa kini ibugua agali haguane mbira gabumane biabe iba Yuberedisi porago angeha dindi ngagoha bialu haga mini Bagidese henego ogoni dabene. 9 Dabalu kini ibugua Bagidese Alagimusu heba Isaraele wali agali pani nelo mule pudaba lene. Agali Alagimusu ogoni ibu Ngode Datagaliwabenaga bi mana lo wini ngago hale nahaga henegoyu kini ibugua agali ogoni Anduane Homogonaga loma binigo mo miaga agali haguane helo dabo helene. 10 Ai ti Andiogo wahalu ami agali dewaore pialu Yuda dindiha tagira pene. Ani pu howa Bagidese ibugua ohowa henene letingi halu ibugua Yudasa halu ibu hameneru baba gi tigani bule ko laya lalu agali marume lo yalu pelene. 11 Anigo ainde Yudasa halu ibu hameneru tigua handalu hearia Bagidese halu ami agali dewaore heago hondowa bi ogoni henene ndo layada lo manda bini.

12 Agali mana ngago manda biahe agali maru Alagimusula Bagidesela hearia ibuwa tigua ogolabohondo lamialu, Wali agali bu karuhondo mana ko nabi bayale bulene ngadagua bilibu, lalu lamini. 13 Agali hameigini mini Hasidi hearu tigua Yuda mani ibilo bamba halu Alagimusu Bagidesela heba gi tigani bule pene. 14 Ai tigua manda bu handalu hemiria Alagimusu ibu agali loma binigo mo miaga Arono aria hayago. Ibugua ko mbira nabulubada lo manda buwa pene. 15 Alagimusu ibugua hongo howa gi doladaga halu lalu ibugua tini tinaga damene karubi mbira mo hole ndo tigatiga gi tigani bule laro lene. 16 Ani layagola tigua mo henene hene. Ani mo henene ho hearia ibugua agali pira waragaria (60) minu yania howa horo ogoningi dege bo wahai hene. O biyadagoni bamba Anduane Homogonaga mbuga ngagoha howa daga lalu,

17 Waitigime wali agali í̠hondo mini mbiraorewi hearunaga tingini dindini bame bo ba a̱i̱na̱i̱ bialu piya.✡Iba 79.2-3

18 Ani biyagola wali agali bibahende bu hearume Alagimusu Bagideselahondo gi timbuni hai hene. Wali agali tigua lalu, Libugua bi henene lolenenaga iranebi bi tigatiga lolenenaga iranebi manda nabi libuore heneda. Libugua henene laro lalu gi dolalu bi lowa mana lo wiyago puguaya, lene. 19 Ani bialu Bagidese ibugua Yarusaleme wahalu puwa ibu balai anda Bedesaida wiagoria bini. Ibunaga ami agali hearu lamialu, Yuda agali bayale bu karu garabaya biai halu Yuda agali ko ibu aria heagoha hatago hole turuho hearu heba garabaya hai helalimu, lalu lamini. Ani lowa lalu, Bialu bibahende homelo bai halu tinaga tingini gundu uli ngagoha bape hai halimu, lene. 20 Ani bialu Bagidese ibugua Alagimusu Yuda dindi handaya ho helo dabo helalu ami agali marubi talebu mialu ibuni kini hearia Andiogo dai bini.

21 Ani helayagola loma binigo mo miaga agali haguane Alagimusu ibugua Yuda wali agalinaga ibu timbuni mini leneore hene. 22 Ani bialu heagola agali ko bu hearume ibuha halaga hene. Ani howa Yudia dindiha ti hongo gibihe tagira pialu tigua Isaraele wali agali genda dewa mo mialu hene. 23 Ai Alagimusu halu ibu aria bu hearume Isaraele wali agali bu hearuhondo mana ko ala ibu damene Anduane Homogo mitangi nahaga henerume bialu hagadagua dege bialu hearia Yudasa ibu hondo hene. 24 Ani handalu ibu Yudia dindi bibahendeha ibaga biai hene. Ani bialu Yuda wali agali maru waitigiha hatago hayaru pani migi bialu tanoha nahe tagira piai halimu lalu lamiai hene. 25 Ai Alagimusu ibugua handalu hearia Yudasa halu ibu aria hearu hongoheore tagira piyaria hendene. Ani hondowa ibugua Yudasa bope habe naheda lo manda bini. Ani handalu Alagimusu ibu kini hearia dai buwa ibugua kinihondo lalu, Yudasahanda mana ko dewa biya, lalu ke̱ howa bi maru lene.

26 Ani layago hale howa kini ibugua ami agali hongoheore howa Yuda wali agalinaga waitigi mini Nigano henegohondo lamialu, Yuda wali Yudia dindiha kago damene bibahende bo hilo wahai hole pu, lalu lamini. 27 Ani laya handala Nigano ibugua ami agali dewaore haru halu Yarusaleme anda ibini. Ani anda íbu howa ibugua ohowa Yudasa halu ibu hameneru baba gi tigani loleberogo ibalimu la bi lo pelene. Ibugua Yudasahondo lalu, 28 Ainde iya keba nahabiya. I̱na í̠ keria ibalu howa í̠ nenege karia poro lalu ibulebero, lene. 29 Ani lalu ibu Yudasa hearia ibuwa libu gi tigani bialu libu mini mo mbiraore howa nenegeore haradagua bini. Anigo Yudasanaga waitigi bu hearume Yudasa minu yania hole manda manda bu hene. 30 Ani howa Yudasa ibu mani handalu hearia Niganohanda ibu mo hondo heneyane handa walia halu ibugua Niganohondo turu nahe howa ibuhondo gi timbuni halu ibu Nigano lone ngola nale manda bu hene. 31 Ai Nigano ibu ohayago wali agalime manda biai hayago hondowa ibugua Yarusaleme wahalu tagira puwa Yudasala wai dindi mini Kabasalama wiagoria wai bialu hene. 32 Wai ogoniha Niganonaga ami agali handari duria (500) bibahende homai haya handala maru ibida pora bialu Yarusaleme Debidinaga tano wiagoha piai hene.

33 Wai bialu mani Nigano ibu Saiono nene wiagoha pene. Agali loma binigo mo miaga maru hearubi wali agali bu hearubi tigua, Nigano ibiridago bayuwa birida, lalu ibu ngola hole tagira ibini. Ani bialu Anduane Homogohanda kini biamogo bilonaga loma irame dai helo delole yu hearu ibuhondo walia hene. 34 Anigoyu ibugua tihondo mege bialu hondo oba halu ti hamiaga toloba halu loma yu heago Anduane Homogo deni mo dodohe helene. Ibugua mine howa 35 tihondo lai laede halu lalu, Yudasa ibu i̱naga giha ibunime ibalu mo ya holene nga. Anidagua nabiyagua nde i̱na ibu karia pialu wai buwa ibu pobe halu dai buwa Anduane Homogonaga anda o kago bo heda holebero, lene. Nigano keba timbuni howa ti ani helalu ibu pene.

36 Ani puwa handala agali loma binigo mo miaga biaru ti puwa lomabu delaga dabu heagobi Anduane Homogonaga anda heagobi handa amu howa hondo hene. Ani howa tigua dugu bialu Anduane Homogohondo bi hongo howa ladaga halu lalu, 37 Ai Anduane Homogo-o anda ogo í̠ninagaore helo loma biaho helowa wali agali í̠ni keria kaware ibalu í̠hondo lotu lalu bi lelonaga anda ogoni helarigoni ndobe. 38 Ai agali ko o kagohondo pani nelo mialu ibunaga ami agali karubi heba pani nelo mibe. Wai hamaha bo wahabe. Í̠hondo mege bialu bi ko layago manda bialu pani mibe, lalu bi lene.

39 Ai Nigano ibu Yarusaleme wahalu tagira pialu Bedehorono tano wiagoria balai anda bini. Ani bialu Siria ami agali maru ogoriani ibalu hatago hene. 40 Ani heagola Yudasa halu ibunaga ami agali daosini tebira haru howa tinaga balai anda nde Adasa tano wiagoria bini. Ani bialu howa Yudasahanda Anduane Homogohondo bi lalu, 41 Anduane Homogo-o í̠naga mbuga ngagoha howa dagalalu, Kini mbirame agali maru í̠hondo mege bule pu lene ibiyaria í̠naga dahuliyalime ibalu ami agali uruni aria daosini dege handari mbira pira halirani duria (185,000) bibahende bo wahai haya lo nga.*Te ogoni 2 Kini 18.7–19.37 ngago hondolene nga.✡2 Kin 19.35 42 Anidagua dege wali agali bu karu bibahendeme í̠na Nigano ibugua í̠naga anda kago mege biyagonaga pani nelo mirida lo manda biai helo í̠nime ami agali ayu inanaga deni karuni balu bo hengeda hai habe. Ibugua mana ko timbuniore biyagonaga pani nelo mialu minu bai habe, lalu Anduane Homogohondo bi lene.

43 Ani lalu ege mini Adanaga horo halene (13) layagola tigua wai bini.†Isaraelenaga ege Ada ogoni inanaga ege mende tebonela (Pebuari Masila) hengeneha ibaga wini Ani lalu wai biyagola Nigano ibuni waiha homalu ibunaga ami agali hearume wai ibira hene. 44 Ai ibunaga ami agali hearume Nigano homaya handa danda timu giha yu hearu wahai halu ibida piai hene. 45 Piyagola Yuda tigua Adasa tano howa bama talima piaho wialu Gese tano tagira pene. Harigani talima pialu howa ami agalime hongo howa wai bilonaga pilipe biguli pu lama dege pene. 46 Ani biyagola Yuda wali agali haga haga bu hearu tagira ibai hene. Ani ibalu tigua wai gi leha howa gi tigaha howabi tagira ibugu bialu wai biai hene. Ani biyago hondowa waitigi ami agali biarume emene hadai bialu hearia ami agali ti bama talima ibiyarume tali minalu minu bogaiore hene.

47 Ani bialu Yuda wali agali tigua waitiginaga mbirale wahearu mo yai hene. Ani bialu Nigano ibugua ibu timbuni daligaore Ngode Datagaliwabe daligaore bolanguahe hene tingi howa ibunaga gi hongoru walia hayagonaga tigua ibunaga gi tiga pugu yalu haguane pugu yalu bialu dai bini. Yu dai buwa wali agali Yarusalemeni bu hearu bibahende hendelo walia hai hene. 48 Ani bialu Yuda wali agali turu timbuni hene. Ani bialu horo ogoni tinaga lotu lolene timbuni mbira wiabagiho ngelene. 49 Ani mo ngelowa mali bibahendenaga ege Adanaga horo halene (13) tagira ibiragola tinaga lotu laga wini. 50 Ani bialu tigi mbira hanguni Yudiaha wai nabi emene bayale wini.