2 Samuele
Mbuga ogoha gilibu ngarunaga nemandi ogo
Mbuga ogome Samuelenaga mbuga mbira biagoha howa bi te lo wiaruni leaha mani binigo damene gilibu wini nga. Abale mbuga mbira biagobi Samuele mbuga mende ogobi mbiraore hangu winigo mani howa lone mo kira hene. Ani binidagoni irane mbuga mende ogo ibugua agali mbiraore Kini Debidi hangunaga te dewa gilibu nga.
Debidi ibuni kini heangi binirunaga bi te gilibu nga. Ngode Datagaliwabe ibu Kini Debidila mandagi haabo haga hene. Debidi ibuni kini hongoheore howa Ngode Datagaliwabe gubalini halu ibunaga Isaraele wali agali bibahende gubalini hai haga hene. Ibugua Ngode Datagaliwabehondo mini bilinahe heagola ibunaga Isaraele wali agaliru bibahendeme ibu gubalini timbuni ho hene. Ani ha howa dege ibuni hangu mo turu holenenaga mana ko timbuni mbira biyagome ibuni pilene. Ani bu hearia Ngode Datagaliwabenaga bi mana latagi haga agali Nadanahanda ko biyago lamialu latagi hayagola Debidi ibuni ko biyago taga halu dara timbuni howa lapani halu lone mini beregedene.
Isaraele wali agalirunaga deni Debidi ibu agali mini lene timbuni mbira hene. Isaraele wali agali tiha genda mbira tagira ibirangi tinaga kini bayale Debidi henego mitangi bu dai biaga hene. Ani howa mani tinaga kini agali bayale Debidi ale mbira ibilo manda bu haga hene. Debidihanda yu tiga hongohe bialu bu mini beregedo henego ibunaga wali agalirume manda biaihe hene.
Bu̱lu̱ baga buwa kuni gilibu ngago (1.1–4.12)
Yudalirume Debidi ibu tinaga kini helo dabo helenego 5.1–24.5
Isaraelealirume Debidi ibu tinaga kini helo dabo helenego
5.1–10.19
Debidi ibu wai bialu wayali haga binigo
11.1–12.25
Debidi ibu Urianaga one mini Bedeseba kayu binigo
12.26–20.26
Debidi iginirume ibu mo genda henego
21.1–24.25
Debidi ibu wahe howa bialu henego
1
Kini Solo homaya layago Debidi ibu hale henego ogo
Debidibi ibunaga ami agalirubi ti Amalegealiru baba wai bialu henego dai buwa horo kiru Sigilaga tanoha pu hene. Ani pu heaha Kini Solo ibu halu nde wai halu mende Pilidialiru baba bialu hearia tigua Kini Solo waime bene homayago Debidi ibu hale nahe dege hene. Ani hale nahe hearia horo tebonengi igiri daliahe Kini Solo heba wai bialu henego aria mbira Solo dara howa ibunaga agaru budu bagabi bialu dongoma dindiru ibunaga haguaneni dugu hiralu Sigilaga tano anda ibini. Ibalu Debidi heagoria ibuwa Debidi geha bulu palialu kininaga mini yaraga halu ani bini. Ani biyagola Debidihanda igiri biagohondo lalu, Í̠ agoha howa eberebe, lene.
Ani layagola igiri daliahe biagome ladai bialu lalu, I̱ Isaraeleali ami hearu heba wai hama wiagoha henego ai pora bialu ibida ibiru, lene.
Ani layagola Debidihanda ibuhondo hale halu lalu, Wai bialu harimidagonaga te bibi maru hale holene hame ledogo langi, lene.
Ani layagola igiri daliahe biago ibugua ladai bialu lalu, Isaraele ami agali heneru ibida piai hayagola dewaore Pilidiali hearume minalu bai haya. Kini Solobi ibu igini Yonadanabi kirabali bayagola homaya, lene.
Ani layagola Debidihanda ibuhondo hale halu lalu, Libu homaya lowa agua manda bialu larebe, lene.
Ani hale hayagola igiri daliahe biago ibugua ladai bialu lalu, I̱ Hari Giliboa heagoria howa handalu hewaria Solo ibugua ibunaga wai biaga yandare yiago dindini hanga howa ogoriani maliaho hearia handaru. Ani handalu hewaria ibunaga waitigi agalirume nogo hosini biralubi hosime gili laga mini karisini heyu halubi abale hapara hayane handaru. 1 Sml 31.1-6, 1 Bit 10.1-6 Hapara hayagola Solo ibugua beregedowa handa dai bialu hearia i̱ erembirahayagi mama ibalu hewaria hondowa i̱ olaya. Olayagola i̱na lalu, Ya agali haguane-o ladai biru. Ani ladai birugola ibugua lalu, Í̠ agohayagi howabe, layagola i̱na ladai bialu lalu, I̱ Amalegeali ko, laru. Ani larugola ibugua i̱hondo lalu, I̱naga waitigi biarume i̱ bayago ai áyu dege homo tongolo mule ngogonigo abale ibalu í̠na i̱ homoliya ba, laya. 10 Ani layagola i̱na abale ibu heagoria puwa homelo bo tongolo milaru. Ani birudagoni irane i̱na manda bialu hewaria ibu yandare biagoria maliaho hayadago yu wahalu dindini ibira hayagua ibu homabehe heago hondowa ani biru. Ibu homayagola kini ibunaga tangi karuleagobi gi pagida karuleagobi uruni bibahende agali haguane í̠naga golo yahalu ibirugo ao í̠ni ngero, lene.
11 Bi ogoni layago hale howa Debidihanda ibunaga bu miniha genda timbuniore howa ibuninaga aga bu heago minu lerelene. Ani biyadagua Debidinaga ami hearu tiguabi nde ani dege bini. 12 Solobi Yonadanabi Isaraele ami biarubi Anduane Homogonaga wali agali biaru bibahendeorebi waime bai hayagola tigua dara howa dugu bia dara ha bialu tomoru nane wahowa horo mbiru halu alendo hene. Waime dewaore bai hayagola tigua anidagua bini.
13 Ani buwa Debidihanda igiri daliahe bi yalu ibini biagohondo lalu, Í̠ dindi aniali kebe, layagola igiri daliahe biagome ladai bialu lalu, I̱ Amalegealigo ai bamba i̱ aba ibu inane dindi wahalu ibuwa Isaraele dindiha ho tene heneyago kogoni, lene.
14 Ani layagola Debidihanda lone hale halu lalu, Anidago í̠na agali Anduane Homogo ibunime dabalu helene biagoni bolene gi nahe baridago agua biribe, lene. 15 Ani lowa Debidi ibunaga ami agali mbira heago íbu lowa lalu, Igiri ogo homelo ba, lene. Ani layagola ami biagome igiri daliahe biago ayu tibu wai biaga yu heagome dibayagola homene. 16 Igiri biagonaga tingini wiago hondowa Debidihanda lalu, Í̠nime bia ko haridagonaga pani naregoni. Í̠nime latagi halu agali Anduane Homogohanda dabalu helene biago baru larigome í̠ni homedegoni, lene.
Debidihanda Solo Yonadanalanaga dara howa dugu bialu iba gana lenego ogo
17 Debidihanda dara howa dugu bialu iba gana ogo Solo ibunibi ibu igini Yonadanabi mitangi bialu lene. 18 Ani lowa Debidihanda Yuda wali agali bibahendeme iba gana ogoni lo manda bilo, Lo manda biaiore halimu, lalu hongo howa lamini. Iba gana ogoni mini Waime Benegonaga Dugubi laganego mbuga mbira mini Agali Tigabirunaga Mbuga laga ngagoha gilibu nga.* Agali mini bogabi manda timbuniwi hearume manda bu handalu hearia, Agali Tigabirunaga Mbuga ogoni bamba Isaraele wali agaliru tinaga wini bada laya. Áyu mbuga ogoni nawi. Mbuga ogoniha bi agi dege lo winibe tobene. Bi te mbira bamba Yosua ibugua Anduane Homogohondo bi layagola ni abale anda nape hayagoria luore haho wini mbira lo ngagobi bi ogoni mbuga ogoniha dege wini. Yosua 10.12-13 handabe.
Debidihanda iba gana ogoni ogodagua lene.
 
19 Ina Isaraele wali agalirunaga agali haguane hayaru hari nene wiaruha homayada.
Inanaga ami agali hongohe biaru homai hayada.
20 Gede tanohabi Asagelono tanoha hariga pedarunaga howabi bi te ogoni lalu mbira latagi nahalimu.
Pilidia wali bedarume bi ogoni hale howa ti turu holigo nalalimu.
Ngode Datagaliwabe mitangi nabiaga karunaga wane bedarume bi ogoni hale howa
tinaga bu miniha dungulo holigo nalalimu.
 
21 Ami agali hongohe biarunaga tinginibi tinaga wai biaga humbibi
Hari Giliboa nene wiaruha bame wiaabo ka.
Solonaga wai humbi biagobi welime baya hangu ha̱i̱ nahe ogoniha wiaabo ka.
Ani bidagonaga iba dalubi mbiraga pibirabi hari nene ogoniha lone naibilo hameledo.
Dindi ogoniha tomorubi bayale anda nahelo hameledo.
22 Yonadananaga dandame mbirale ko ba nabiaga gibiore wini.
Solonaga wai biaga ayu tibu bame nawiaga.
Wai bialu ami agali waitigi dewaore balu homelaga.
Agalinaga darama dewaore ayu tibu ogoriani bu ka.
 
23 Solo Yonadanala libu agali bayaleore haga hene.
Libuni haru mandagi haabo haga henego
libuni haru mandagi dege homaribida.
Ega bodo hariaweme ibunaga tomo naga ale ngagola minule abale yagalalu piagago emene nira dege lowa
libugua gerai hongo howa laga hene.
Libunaga hongo laiono gabua ale ndo hongo timbuniore bolanguahe hene.
 
24 Isaraele wali bedamiru-o
Solohanda aga daramabi bayale tara wiago tí mo ngialu
ngolome wabini yári tara tara wiarubi tí yári bilimulo mo ngiyagonaga
ibu mitangi bialu dugu timbuniore bialu biralimu.
 
25 Ami agali wai biaga hongohe biaru homai hayada.
Ti wai hamani homai hayadagoni.
Yonadanabi homa dege bialu ibunaga tingini uyu hari nene ogoniha wiarua.
26 I̱naga hamene Yonadana-o í̠naga dugu bia harogoni.
Ina í̠ gubalini haabo ho kogoni.
Í̠nabi nde i̱ gubalini hagaore harigoni.
Wandarime i̱hondo gubalini hagago dindiha lowa
í̠naore i̱ gubalini timbuni ho harigoni.
 
27 Ami agali wai biaga hongohe biaru homai hayada.
Tinaga wai biaga danda timu yandare yayarubi goba hai harua,
lalu Debidihanda dugu bialu iba gana bi ogonidagua lene.

1:6: 1 Sml 31.1-6, 1 Bit 10.1-6

*1:18: Agali mini bogabi manda timbuniwi hearume manda bu handalu hearia, Agali Tigabirunaga Mbuga ogoni bamba Isaraele wali agaliru tinaga wini bada laya. Áyu mbuga ogoni nawi. Mbuga ogoniha bi agi dege lo winibe tobene. Bi te mbira bamba Yosua ibugua Anduane Homogohondo bi layagola ni abale anda nape hayagoria luore haho wini mbira lo ngagobi bi ogoni mbuga ogoniha dege wini. Yosua 10.12-13 handabe.