1 Ai horo ogoningi mbiraga kini ibu baya hangu palibe nahe hene. Ani biyagola ai mbuga mbira dindi ibugua handaya ho kagoha binigo te gilibu wiaga wiago mo yalu ibu lene. Ani biyagola agali biabe biaga hearume te gilibu wiaru daga ladaba lene. 2 Ani layagola tigua agali kini andaga mamage haga kirali biago labome kini bo waholebiyago te wiago daga lene. Agali kira ogoni labome kini homelo bo wahowa kalego ai nde Modegai heagome handa walia howa libu manani haru pialu ko biniyago handa walia hene. 3 Ani bialu kinihanda lalu, Ai iname Modegai ibu biabe bayale biyagonaga iname ibu yolo mbira agi mirimabe, lene.

Ani layagola agali berearume lalu, Í̠na ibuhondo mbirale mbira nami henego ke, lene.

4 Kini ibugua agali biaruhondo hale halu, Ai Modegaihanda biabe bayale biyagonaga iname agi bimabe lowa wene lole lalu bereaore dege Hamana ibugua Modegai ira dibu hongowa bo manogo bia hole poro lalu kini hale hole anda ibini.

Ani anda ibiyagola kini ibugua agali biaruhondo hale halu lalu, Agali ibaruago aibe, lene.

5 Ani layagola agali biabe bia haga hearume ladai bialu lalu, Hamana ibuwa í̠ hondole manda bu ka, lene. Ani layagola kini ibugua lalu, Tamuha haru anda ibidaba, lene.

6 Ai Hamana anda ibiyagola kini ibugua Hamanahondo lalu, I̱na agali mbira kagonaga mini yaraga holene hame lo ko. Anidagua bule manda bidogo ai agua buledabe i̱ miniha manda baya hangu nabi bedogo. Ai i̱na bayale buliyago mbira í̠na manda bedebe, lalu hale hene.

Ani layagola Hamana ibu miniha manda bialu lalu, Ai kinihanda agali mini mo yaraga holene mbirali aida. Agali mende nahego. Ainde i̱hondo bule layago, lo mitangi bini.

7-8 Ani manda buwa ai Hamana ibugua kinihondo ladai bialu lalu, Agali biabe biaga karume aga bayale í̠ni karu lagane ngego agali ogoni mo mulene nga. Ani buwa í̠ninaga nogo hosi kago haru ibulene nga. 9 Ani buwa i̱naga agali haguane mbira kagome í̠naga aga biaruni agali ogoni mo karula halu agali haguane ogonime agali ogoni nogo hosini bere lowa wali agali ngoai haga tano hama ngagoria haru polene karulape. Libu ani pialu howa agali haguane timbuni ogoni ibugua lalu, Agali ogo de handadaba kinihanda ibu mini lene mbira heleda. Kinihanda ibuhondo bayale biyadagoni handadaba lalu wali agali hale helo ga̱lalu lolene nga, lene.

10 Hamanahanda bi ani layago hale howa kinihanda ibuhondo lamialu lalu, Mini ogoni baya gibioredago. Ai í̠na abale puwa Yudali Modegai i̱ andagaha biabe timbuni biaga agali haguane biagohondo anidagua bule pu. Ayu í̠nime laridagua biai habe, lene.

11 Ai Hamanahanda kininaga nogo hosibi agarubi mo yalu ibuwa aga Modegai mo karula hene. Ani mo karula halu Modegai kininaga nogo hosini bere lalu tanoha wali agali ngoaiho haga wiagoria haru halu pene. Libu pialu howa Hamanahanda bi hongo howa ladaga halu lalu, Agali ogo de handadaba. Kini ibugua agali ogonaga mini yaraga haya. Ani buwa ibugua agali ogohondo mana bayale ogoni biya, lene.

12 Ani bialu mani Modegai ibu kini andaga dai bini. Anigo Hamana dege taga timbuni howa miniha genda timbuni halu bini. Ani howa ibunaga dengui agame bu dambi halu ibuni andaga dai bini. 13 Daibuwa mbirale biyaru bibahende ibu onebi ibu damene hearubi bibahende lamiai hene. Ani layagola ibu onebi ibu damenedarubi ti manda timbunibi howa tigua ibuhondo lamialu lalu, Ayu í̠ timbuni mini lene kego mo wahalu Modegai ibu ho aribia holobada. Ibu Yudali kago ainde í̠na ibu nahelo hapai holene henge nawida. Ibu nde Ngode Datagaliwabe heba haga kagome í̠ homolene dege nga, lalu tigua Hamana lamini.

14 Ti wene bi lalu bereaore dege agali kininaga biabe biaga hearume Hamana kuini Esedahanda tomo timbuni dawayago nolenaga haru pole abale damu ibini.