9
Abimelege ibu agali haguane henego ogo
Gidiono igini Abimelege ibu Segeme tano ibu ai̱ya damene heagoria pene. Puwa ibugua ibu ai̱ya damene hearuhondo lalu, Tígua Gidiono igini pira karia (70) bibahendeme haru helo hamelo kamibe be agali homane mbiraore hangume haru helo hame ledamibe lalu Segeme agali tihondo hale halimu, lene. Ani lowa Abimelege ibugua lalu, Tíninaga darama gai bini tí hono wini mbira hayagoni i̱da manda bilimu, lene. Ani layagola ibu ai̱ya damene biarume ibugua layadagua Segeme agaliruhondo lamule pu hene. Ogonidagua lamiyagola Segeme agali biarume Abimelege tini aria biagome layadago lowa ibugua laradagua bule manda bini. Ani manda buwa tigua siliba muni pira karia (70) Balaberidinaga anda wiyagoha howa ilumogo buwa Abimelege mo mini. Ani biyagola muni ogonime ibugua agali ko anda anda biaga page bibi hearu yolo bialu ibu heba maibidaba lalu pene. Abimelege ibugua ibu abanaga andaga Obarani pu howa Gidiono igini pira karia (70) ibuni hamene biaru to̱le̱ hombene mbirani mo mogo bu helowa bo home lai helene. Ani biyagola dege Gidiono igini emene heyogone Yodama ibu hangu bira do heneyagome nabe yu wahayiya. Ani buwa agali Segemela Bedemilolani hearu bibahendeore mo mogo bialu ira mbira bai ale hada bia heneyago Segemeni heagoria ogoriani Abimelege kini helo lalu helayiya.
Yodamahanda ogoni biya layago hale howa ibu Hari Gerisimini iragaho howa tihondo ga̱la amu halu lalu, Segeme agaliru-o i̱na bi mbira larogo hale hadaba. Hale haramiyagua Ngode Datagaliwabehanda tígua laramigo nde hale holene wulebira, lene. Ani lowa lalu, Horo mbirungiore hayagola ira damenego bibahendeoreme tininaga kini mbira dabole lowa mo ngoai hene. Ani howa tigua ira olibe heagohondo lalu, Í̠ inanaga kini ha, lene. Ani layagola ira olibeme ladai bialu lalu, I̱na tí haru hole biruyagua i̱naga ibaneme damarubi agalirubinaga mini yaraga helo ibilaruligo naibiloloboda, lene. 10 Ani layagola ira biarume poge irahondo lalu, Í̠na inanaga kini hole íbu, lene. 11 Ani layagola poge irame ladai bialu lalu, I̱na tí haru hole biruyagua i̱naga ibiri baya dendebi biaru nadoloboda, lene. 12 Ani dege laya handala ira biarume pu mbira lini daga mini gerebi heagohondo lalu, Í̠na inanaga kini hole íbu, lene. 13 Ani layagola pu mbira biagome ladai bialu lalu, I̱na tí haru hole biruyagua waini iba damarubi agalirubi mo turu helo daga biruligo nadoloboda, lene. 14 Ani laya handala ira biaru bibahendeme irabu ani degehe wiagohondo lalu, Í̠na inanaga kini hole íbu, lene. 15 Ani layagola irabu ani degehe biagome ladai bialu lalu, Tígua i̱ tínaga kiniore holiya hamelo kamiyagua nde i̱naga andane gumbaha ubanda howa hole ibidaba, lene. Ani nabirimiyagua ira magane anihe karuha howa hungu kiaulo tagi halu ira tamia Lebanono dindini karuni dowaore holebira, lene.
16 Yodama ibugua laho wialu lalu, Áyu ogoninaga tígua Abimelege kini helo helarimigoni heneneore tiga tiga birimibe. Tígua Gidiono ibugua bima piyaru mitangiore buwa ibu one waneiginiruhondo baya hangu bialu harimibe, lene. 17 I̱ abahanda tínaga wai bia halu ibuni homolene gi nahe Midianalime tí balu hearia ibugua tí mo wialu haru ibiyagoni, lene. 18 Ibugua ani bini wiagoria tígua áyu heyalu i̱ aba one waneiginiru bole harimida, lene. Tígua ibu igini agali pira karia (70) biaru to̱le̱ hombene biagoria bo homelarimigoni. Ani birimigoni irane tígua Abimelege ibu i̱ abanaga biabe bia haga wali tíninaga damene biago iginiyane tíni dabalu Segemenaga kini ibu helama lalu helarimigoni. 19 Ani birimigonigo áyu tígua Gidionobi ibu one waneiginirubi tihondo birimigo bayale tigabiore birimiyagua nde Abimelegehondo turu halimu. Ibugua nde tíhondo turu helo. 20 Ani tigabi nabirimiyagua ira hungu Abimelegeha howa kiaulo tagi halu Segeme Bedemilola agaliru do wahelo, lene. Ani bialu Segeme Bedemilo agaliruha howabi ira hungu kiaulo tagi halu Abimelege do wahelo, lene. 21 Ani lowa Yodama ibugua ibu hamene Abimelegehondo gi howa ibuni ibida puwa Bea dindini pu hene.
22 Ani biagola Abimelege ibugua mali tebirani Isaraele wali agali haru hene.
23 Mani howa Ngode Datagaliwabehanda Abimelege ibu Segeme tanoali hearu baba keba haga haga bilo mo keba ha halu hene. Ani biyagola Segemeali bu hearume Abimelegehondo mine gibiore haga bialu hene. 24 Anidagua biyadagoni irane Abimelege halu Segemeali uruni tigua Abimelege hamene pira karia (70) Gidiono mini mende Yarubala igini hearu bameore bo wahai helo mo hongo hayagonaga anidagua bini. 25 Ani bialu Segemeali maru hari nene wiagoria Abimelege bo wahole mamage hole pene. Ani pu howa agali uruni tigua wali agali hariga ogonidagua pu íbu biyaru minu balu tinaga dabudabu yalu piyaru mo page bini. Ani bialu ka layago hale howa agali maru hearume Abimelege lamini.
26 Anigo Ebede igini Gala halu ibu hameneru ti Segeme dindi anda ibini. Ani ibiyagola Segemeali bu hearume agali uruni hondowa ti bia layadagua bialu hene. 27 Tigua tinaga pu mbira lini daga mini gerebi mabu winigoha pialu gerebi lini bogabi dearu dowa pingidalu mo waini iba howa tomo timbuni dawa nalu hene. Ani bialu tinaga mbirale bi pupu wulenaga gime wabinigo anda heagoha anda pu biruwa Abimelege mege bialu berene. 28 Ani bialu bereagola Gala ibugua lalu, Abimelege ibugua agi biagagonaga ina Segemeali ibu andaneha kamabe. Ibu ai iginibe. Ibu Gidiono igini howa ibunaga bi larago bamba howa bialu haga Sebulu hayagoni ndobe. Anigo ina Segeme aba Hamo hameigini bu karu andaneha holene nga. Ani bulene ngago wahowa Abimelege andaneha haabo kamago aginagadabe. 29 Agali o kamaruni bibahende i̱ andaneha hai hayagua nde i̱na Abimelege he̱latagi holebero. Ani buwa i̱na ibuhondo, Í̠naga ami agali bu karu haru halu ina baba wai bule tagira ibabe lolebero, lene.
30 Ani leagola tano ogoninaga agali haguane mini Sebulu ibugua Ebede igini Galahanda bi layago hale howa keba timbuni hene. 31 Ibugua keba howa Abimelege hearia agali maru ohalu bi lo yalu pudaba lowa lalu, Bi o larogo baya hanguore hale habe. Ebede igini Galahanda ibu hameneru haru halu Segeme dindiha íbu howa ibugua agali bu hearunaga mini mo heya halu í̠la wai bule manda bialu ka. 32 Ani bidago ai í̠naga agali hayadaru haru halu mbiraga ohalu puwa Segeme dindiha dangi timbuni kagoha ha do halimu. 33 Ani bialu gao laragola abale heyalu tanoha anda puwa wai bilimu. Gala halu ibunaga agalirume wai bule ibalu karia tígua abale minalu tihondo bua biradagua bilimu, lalu lawia hene.
34 Ani layiyago hale howa Abimelegehanda ibunaga agali biaru haru halu puwa agali ma halu tale buwa Segeme tano pabe heagoha pu haga haga bini. 35 Gao layagola Gala ibunaga agali biaru heba tagira pialu tanonaga pabe heagoha pu hearia Abimelege halu ibunaga agali biaru ha do hayagoha howa tagira ibini. 36 Ani tagira ibalu hearia hondowa Gala ibugua Sebuluhondo lalu, Agali hari neneni dalipe halu amu ibirago de handa, lene. Ani layagola Sebuluhanda ladai bialu lalu, Ogoni agali ndo hari nenenaga munini hayago hondowa agali handarube toba harida, lene.
37 Ani layagola Galahanda lone lalu, Ani ndo agaliore hari nene ngadagua daliape halu ibiragoni. Tidi mende agali halaga biagarunaga ira bai ale kagohayagi howa harigani ibiragoni, lene.
38 Ani layagola Sebuluhanda Galahondo lamialu lalu, Abimelege ogoni ibu aidane ina ibu andaneha kamabe larigo ai áyu í̠ni hongohe harigoni o kegonibe. Agali í̠na mege bialu harigoni amu ibiraruni ndobe. Ai uruni baba wai bule pu nabere, lene. 39 Ani layagola Galahanda Segemeali hearu haru halu ibuni bamba halu puwa Abimelegenaga agali biaru baba wai bule pene. 40 Ani pialu hearia Abimelege halu ibunaga agali biarume bama talima piyagola Gala halu ibunaga agali biaru ibida piai hene. Abimelege halu ibunaga agali biarume Gala aria biaru bo wahai hayagola tinaga tingini dewaore tanoha howa wima pialu tano pabe tagirayagi wima tagira pene. 41 Ani bialu Abimelege ibu dai buwa dindi Aruma tanoha hene. Ani heagola Sebuluhanda Gala halu ibu hameneru ti Segeme tanoha nahelo bo taliatagi hene.
42 Horo mendengi Segeme wali agali hearume tano wahalu tini mabuha pugu pugu bini. Ani puwa agali marume Abimelegehondo bi lamini. 43 Ani lamiya handala Abimelegehanda ibunaga agali biaru halu tebo tale bialu dangi timbuni heagoha bira do howa agali ibilo yu berene. Ani biruwa Abimelege ibugua wali agali tanoha howa mabu pole tagira ibiyagola ibunaga agali biarume abale tagira puwa homelo bai hene. 44 Ani bialu Abimelege halu ibunaga agali biaru abale pialu tanoha ubaanda tagi biaga wiagoria mamage hole pu hene. Ani pu heagola ibunaga agali tidi ki biaru tigua wali agali mabuha tagira pu hayaru baba wai bialu bibahende bo wahai hene. 45 Abimelege halu agali maru tanoha anda puwa wai bialu heane dege alendo hene. Ibugua wali agali tanoha hearu bo wahai halu tano ogoni karulene. Ani bialu ibunaga agali biaruhondo bidaba layadagua tigua tanoha andabi wai pabebi bo gialahole bialu tano ogoni madane bialu ibi ale taulopaya bini.
46 Wali agali maru Segeme tanoha ami agalinaga wai pabe hongohe heagoha ha do hene. Tigua wai bira layago hale halu ibida puwa dama mitangi bialu bi pupu wiaga gime wabini mini Balaberidi laga wiagonaga anda hongohe heagoha anda puwa bira do hai hene. 47 Ani heagola wali agali anda ogoniha ngoaiho ka layago Abimelege ibu hale hene. 48 Ani hale howa Abimelege halu ibunaga agali biaru haru halu Hari Salamono heagoha iraga halu pene. Puwa ayume ira magane gabuni hearu dandowa payani yini. Ani yu howa ibugua ibunaga agali biaruhondo lamialu lalu, I̱na o berogo de hendedemibe. Tíguabi nde abale ani dege bidaba, lene. 49 Ani layagola tigua Abimelegehanda biyadagua ira magane bo yaga yaga bialu puwa anda biago tagirani wu mabu bini. Ani buwa tigua anda biago heda hayagola wali agali daosini mbira (1,000) ale Segeme tanoha anda hongohe ogoni heba dai helayagola homai hene.
50 Ani bialu mani Abimelege halu ibunaga agali biaru tigua wai bule Tebese tano ho hagira bialu anda puwa karulene. 51 Anigo mamageali ti wa handa amu nana bu haga anda bu gimbu bima iraga hene hongohe mbira tano ogoniha hanuni hene. Ogoni heagoha wali agali bibahende ubaanda anda bialu bira do hai hene. Ti anda ogoniha ibida anda piai howa panga payai halu tini daliga biagoha iragaho birai hene. 52 Ani biyagola Abimelege ibuwa tanonaga anda hongohe ogoni karulole wai bialu hene. Ibugua anda biago heda hole lowa hapara hene. 53 Ani bialu hearia wali mbirame anda daliga biagoha howa ege to̱le̱ mbalape mbira balawa wabule widi dambiaga timbuni wiago bape halu Abimelegenaga embone taulene. 2 Sml 11.21 54 Ani bayagola Abimelegehanda igiri mbira ibuninaga wai biagane ya haga heago olalu abale ibiyagola ibuhondo lalu, Í̠naga wai biaga ayu tibu yidegonime i̱ homoliya gubaliniha nogoba ha. Marume lalu, Wali mbirame i̱ baya lelo hame naledogo abale ba, lene. Ani laya handala igiri biagome Abimelege nogoba hayagola ibu tongolo mini. 55 Isaraeleali biarume Abimelege homayago handalu tini dindiha dai bigibigi bini.
56 Ani binidaruni Anduane Homogo ibunime Abimelege ibu abahondo ko bialu ibuni hamene pira karia (70) irane nawini bo wahayagonaga pani nelo mialu ibuni homelo bo wahene. 57 Anduane Homogo ibugua Segeme agalime ko dewa biyagonagabi pani mialu ani bini. Bamba Gidiono igini Yodamahanda Segeme tano ha halu mo ko holebira layadagua ogoni heneneore lola hene.

9:53: 2 Sml 11.21