3
Dindi tara wali agalime Holoberenese ladebodebo binigo ogo
Tano maru Holoberenese ibugua wai bule mandabi howa agali haguane bu hearume agali maru dabalu Holoberenesenaga bu mini mo gede halo pudaba laga bini. Tigua lalu, Ina bibahende kini timbuni Nebugadenesanaga biabe biaga kema. Ina í̠naga geha handadagaho bedama. Í̠nime mbirale inahondo bule manda bu kego bibahende biai habe. Ai inanaga anda karu bibahendebi dindi widi mabu ngemarubi nogo sibi karubi meme karubi bulumaga karubi nogo bibahende pabeha karubi í̠nagaore hai ka. Uruni bibahende í̠nime bua birago ale bibe. Inanaga tano ngaru bibahendebi wali agali tano uruniha karubi bibahende í̠nagaore hai ka. Inaga uruni bibahende í̠nime mo ibabe lalu bi lo yalu pudaba, lene.
Tigua bi uruni lo yalu piyagola Holoberenese ibugua ami agali biaru haru halu iba solowara bereago angeha daliape halu puwa ami agali maru tano page hongohe bu mabubi hearu handaya ho helo dabo helalu agali hongohe maru tano uruniha hearu ibunaga ami agali heagoha hela tagohalu wai bule pelo minu helaga bini. Wali agali tano uruniha hearume yári karulowa ngidaru balu iba gana lalu ibu ibiyagola mo turu halu mali lima ibini. Ani biyagola darabiore bialu hayadaruni bame bu hole bini. Holoberenesehanda tinaga damahondo bi pupu wiaga anda bu helearu bo gialo wahai halu ira mbirale nadibaga hada bini hearu bibahende dibu wahai hene. Ibugua mbirale o biyadagoni Kini Nebugadenesa ibunime bibe lalu layadagua bini. Nebugadenesa ibugua bi lalu, Dama mitangi bialu bi pupu wiaga gime wabini wali agalime bi pupu wiaga wiaru bibahende bo gialalu dambu gingirulo haealabagabu wahai habe. Ani beregola wali agali dindi tara tarani bi tara tara laga bu karu bibahendeme Nebugadenesa ibunihondo hangu bi pupu wialu helo ani bibe, lene. Har 34.13, 2 Bit 17.6
Ai Holoberenese ibugua Dodana tanonaga gibuni mbiraha dindi tigabi Yaserili wiagoria anda pene. Tano ogoriani howa wá handa amu halu Yudia dindihayagi dindi bare hombene wiagoha handa amu haga wini. 10 Ibugua balai anda tano kira Geba Bedesanala hengene wiagoria bu hene. Ani buwa ibugua dindi ogoriani ibunaga ami agalinaga tomoru mo manda manda buwa ege mbira agima hondo hene.

3:8: Har 34.13, 2 Bit 17.6