1 Asiria aminaga agali haguane Holoberenese ibu tigua te layago hale halu hearia Isaraeleme wai bule manda manda biai ho howa tigua hari neneha hariga wiarubi dindi tigabi wiagoha hariga wiarubi hangai hai halu biya layago hale hene. 2 Ani hale howa ibugua tandaga timbuni halu howa Moaba dindiha haru bamba haga agali haguane hearubi Amono dindiha agali haguane hearubi iba solowara ange ange wali agali hearunaga agali dabo helene hearubi bibahende olalu ibidaba lene. Ti íbu ngoaiho heagola ibugua tihondo lalu, 3 Kenanali kemiru tígua i̱ áyu ogoni langidaba. Hari neneha wali agali palima pedago ti abigo padabe. Ti tano agoria dege hagabe. Tinaga ami agali dewa kabe nde emene dege kabe. Ti hongohe kabe nahe ka. Kini aiwa ami agali uruni haru hagabe. 4 Irane aginaga wali agali hameigini dindi ogohayagi ni paliragoha karu aria mbira ogonime i̱hondo ti dara habe lalu i̱ hewaria íbu nabi howa mine hayago irane agibe, lene.✡Esd 3.8

5 Ani layagola Amono wali agalinaga haguane Agiohanda ladai bialu lalu, Aiore agali haguane-o í̠naga biabe bia haga i̱na bi larogo baya hanguore hale habe. Wali agali haru nene uruniha bare bare padaruninaga te i̱na langulebero. I̱na ke naholebero. 6 Wali agali uruni ti Kaladea dindiha howa tagira ibinigo ka. 7-8 Ai tinaga mamali Kaladea dindiha heangi tigua bi pupu wiaga dindi ogoniha wiago wahai halu ti dahuliya andaganaga Ngode Datagaliwabehondo bi lalu hene. Ai ti damene hearume bo taliatagi haya handala puwa Mesobodemia dindiha puwa ogoniha luore hene.

9 Lone mani howa tinaga Ngode Datagaliwabehanda lamialu, Dindi Mesobodemia wahalu puwa Kenana dindi ogoria hole pobe, lene. Ani laya handala ti ibuwa bayaleore hene. Ani howa ti hongoheore halu tigua ngolobi silibabi dewaore wialu nogo bulumaga dewaore hinu hene.✡Pig 11.31–12.5 10 Emene howa mani Kenana dindiha tomo gari timbuniore tagira ibiyagola ti togolo yalu Iyibi dindiha pialu tigua luore dindi ogoniha henego irane Iyibi dindiha tomo dewaore wiagola ani hene. Ani heagola ti hono dame bialu dewaore daga labe naheore hene.✡Pig 42.1-5, Har 1.7 11 Ani heagola Iyibi kini heagome ti baba waitigi howa ti bo hengeda halu ibunaga garabaya biabe bialu helowa biabe erekuibiore mbirigi wabialu helo helene.✡Har 1.8-14 12 Tigua biabe ogoni bialu howa tinaga Ngode Datagaliwabehondo dugu bialu heagola Ngode Datagaliwabe ibugua Iyibi dindi bibahendeha genda timbuni tara tara ibilene. Ani ibilayagola Iyibiali tigua, Isaraele wali agali Iyibi wahalu tagira pudaba, lene.✡Har 7.1–12.46 13-14 Tinaga Ngode Datagaliwabehanda iba solowara Iba Daramabi laga bereago hanuni hariga mo wia halu iba ange mendehayagi haru bolangua halu puwa Hari Sainai pu halu dindi mini Kadese Banea dindini pu hene.

Isaraele tigua wali agali dindi ko ogoniha ala hene hearu bo taliatagi howa ti ho aribia halu✡Har 14.21-22 15 ani puwa Amoro dindi wiagoria pu berene. Tigua Hesebono tanoha hearu bibahende bo wahai halu Iba Yodana domalu ibalu dindi hari bare bare uruni ti karulai hene. 16 Tigua hameigini Kenanabi Peresebi Yabusubi Segemebi Gigasabi bibahende bo taliatagi hai hene. Ai tigua ogonidagua bialu bambaore íbu henego ka.

17 Tinaga Ngode Datagaliwabe ibugua ti mana ko birago turu nahaga howa wali agalime mana ko nabi baya tigabi kangi ti bayaleore haga ka.✡Man 28.1-68 18 Anigo ainde ogo bialu halimu lalu tinaga Ngode Datagaliwabehanda lamiyago nabi hayagua nde tinaga waitigi ibalu wai timbuni bialu wali agali uruni bo wahai halu maru dindi tara tara ngaruha garabaya bu yalu piaga hene. Waitigime Isaraele wali agali tinaga Ngode Datagaliwabenaga anda kago bo gialo wahai halu tano wiago karulo hene. 19 Anigo mani Isaraele tigua mini beregedalu tinaga Ngode Datagaliwabe karia dai biaga hene. Ani biragola tigua dindi kaundiaha haga haga bu henedaru wahalu dai biaga hene. Ani dai bialu ti Yarusaleme lone karulo howa tigua Ngode Datagaliwabenaga anda heagoria hene. Ani bialu hari bare bare tini hagane wiyadagoria daibu hai haga bini.

20 Ani binigo ainde agali haguane-o iname dabo handalu kamaria wali agali uruni tigua mana ko mbira bialu Ngode Datagaliwabenaga bi mana lo winigo mo habolo heagua nde iname puwa wai bialu ina wayali holeberemago mali̱ya. 21 Anigo iname handalu kamaria tigua ko bini mbira nawiyagua nde ti helo waholene karulapego irane Ngode Datagaliwabe tinaga Anduane Homogo kagome ti baya hanguore handaya ho kagola ina wali agali dindi bibahendeha bu karunaga deni taga tene handa walia holene dege wulebirago helo wahami̱ya, lene.

22 Agiohanda bi lai hayagola agali maru Holoberenesenaga balai anda tamuha heyu homabu bu hearume bi lagalaga bialu keba hai hene. Ani lalu howa Holoberenesenaga ami agali haru haga hearumebi agali iba solowara angeha haga hearumebi Moabali bu hearumebi bi hongo howa lalu, Agio ibu homolene karulape, lai hene.

23 Ani lowa lalu, Irane agome Isaraele wali agali gi haramabe. Tinaga hongo nawiore howa tigua ina baba wai nabulebira. 24 Agali haguane-o í̠naga ami agalime abaleore bope holebirago ai ina abaleore áyu ogoni ma, lene.