1 Ai Yudidihanda wali agalihondo lamialu lalu, Hagibuni mbaliniru-o i̱na bi larogo ala hale hadaba. Tígua agali haguane ogo mo yalu puwa wai pabe neneni mo paga hadaba. 2 Egabi lalu gao laragola tígua agali haguane mbira dabo helalimu. Agali hongohe kemigo damene bibahende danda timu yandareru yai halu tano wahalu tagira piai halimu. Asiriali mamage haga karu baba wai bule tagira peneale tingi halimu. Tigua henene wai bule daliape halu napilimu. 3 Ani beremigo hondowa Asiriali tigua wai biagane ale mo yai halu gerai lalu balai anda kagoha aminaga agali haguane barila hole polebira. Ani biragola agali haguane uruni tigua gerai lalu Holoberenese andaga balai andaha pialu karia tigua Holoberenese nahondolebira. 4 Ani biragola gi timbunioreme ami agali uruni bope haragola tí bibahendeme talima pugupugu bialu harigani bai halimu. 5 Ani bule dege tígua Amonoali Agio dege i̱ kogoria haru ibule damu pudaba. Ibugua ibalu haguane ogo Holoberenese haguanedabe taradabe hendelo damu pudaba. Agali ogonimeore Isaraele wali agali mo taga halu Agio ibubi nde ina Isaraele wali agali baba mandagi homelo ibilenego agali ogonioredabe be tara mendedabe hendelo, lene.

6 Tigua Yudidihanda layago hale halu Agio ibu Usia andaga berearia hondo pene. Ai Agio ibu ibuwa handalu hearia wali agali dewa ho mabu bu hearu aria agali mbirame Holoberenesenaga haguane pugu yu heago hondowa ibu mogo timbuni lalu de mborere biyagola dindini odope hene. 7 Tigua ibu lone mo heya haya handala puwa Yudidi geha ge duli hanga howa mo bulu paluwa lalu, Wali agali Yudia dindiha bu karume í̠naga mini yaraga hai holebira. Ani bialu wali agali dindi bibahendeha bu karume í̠naga mini hale halu ti gi timbuniore holebira. 8 Ainde í̠na biridaru bibahende i̱ hale holiya te langi, lene.

Ani layagola Yudidi ibugua wali agali bu hearunaga deni heyu howa ibu tagira piyangi howa bialu henedago lama ibalu dai biyagoria te lamaro bini. 9 Yudidihanda te lai hayagola wali agali tigua hale hai halu tanoha howa turu timbuni howa bi ladaga daga bialu hene. 10 Ainde Agio ibugua Isaraelenaga Ngode Datagaliwabehanda bibahende biyago damene bibahende de hondowa ibugua Ngode Datagaliwabehondo mini mbiraore wialu hongo howa yutiga bu hene. Ani bialu ibu Isaraeleali dege hatago hayagola tigua ibunaga tingini dongone boda mabu bialu Isaraeleali helo helenego ai ibu waneigini tibi Isaraele wali agali dege hatago halu hama ibini áyu ogoniha haabo kagoni.*Mana te ngagoha 23.3-4 howa lalu Amono wali agaliore Isaraele wali agali baba hatago halu mandagi nahole lenego gilibu winigo nga. Agio ibu Amonoali mbira henegoyu ainde ibugua mini mbiraore hongohe wiyagola tigua ibu Isaraele wali agali dege halu hatago helo haru anda ibini. Hobane 5 li ngago de handabe.

11 Egerebagi hayagola Isaraele tigua Holoberenesenaga haguane biago tanonaga pabe nene heagoria mo paga halu tini wai biaga danda timuru yaga bialu tanoha howa hariga pugu biadagua harigani hama pene. 12 Asiria ami biarume Isaraeleali biaru tagira ibiyago de hondowa tinaga agali haguaneru abale lama pene. Ani lama piyagola agali haguane biaru tigua ami agali haru bamba haga hearubi haru howa handaya ho haga hearubi lamini. 13 Ani lamiyagola tigua agali bibahendenaga haguane Holoberenese andaga balai anda heagoria puwa Bagoasahondo lamialu lalu, Isaraele agali ko galone nabulene hearume inanaga hongo tinaga hongola manda bulenaga tinaga tanoha howa tagira ibalu ede bareni dalidali bialu ibira. Ai iname ti abale bo biba holoma̱yanaga ibaruago ai inanaga agali haguane barila hole pu, lene.

14 Ani laya handala Bagoasa ibugua abale puwa Holoberenese ibu wene dege Yudidila mandagi padabe toba howa ibunaga tamu hobane panga nge̱lo nge̱lo bene. 15 Ani bayagola Holoberenese ibugua bi ladai nabiyagola Bagoasahanda panga dugua anda halu tamuha anda puwa handalu hearia Holoberenesenaga tingini dindini ibiraho wialu ibunaga haguane nawiyane hendene. 16 Ani wiago hondowa Bagoasahanda ga̱ lowa dugu bialu ibunaga aga lerelene. 17 Ani bialu Yudidi andaga balai anda heagoha puwa handalu hearia Yudidi nabereyane hendene. Ani bialu ibu abale gerai lalu ami agali biaru hearia tagira ibuwa lalu, 18 Agali hameigini ko ngubi hearume ina mohondo hayada. Hiburu wali mbirame Nebugadenesanaga dindini wali agali bu hearu bibahende mo taga timbuni hayada. Ai uru-o handadaba. Holoberenesenaga tingini dindini ngago ibunaga haguane agoha ngabe tobaheda, lene. 19 Asiria ami agali haru haga hearubi haguane hearubi tigua ogoni layago hale howa ti mogo timbuni lene. Tigua ani hale howa balai anda bu haga haga biadagua dugu bigibigi bialu tinaga aga budu lerelai halu bini.