Yosua
Mbuga ogoha gilibu ngarunaga nemandi ogo
Yosuanaga mbugani lo ngagoni Isaraele wali agalime Kenana dindi ti karulalu wali agali ogoriani hene hearu bo pelenegonaga gilibu nga. Uruni binidaruni Mosese homayagola ha aribia hene Yosua ibugua haru halu heangi ani bini. Galone maru manda bayuwa bibehe lowigi bidaru uru –
Iba Yodana domeneru Yarigo dindi karuleneru Ai dindini wai biniru Habo Nalolene Bi Ngode Datagaliwabe ibu wali agali heba lowiniru loyane bialu mo hongo henegonaga lo nga.
Bi irane dunini mbira Yosuahanda lowinigo galone nga lo manda bibehego ogoria lo nga. Be 24.15 ... horo áyu ogoriani howa tíni dabolene nga. I̱bi i̱naga andagani karu hebabi iname Anduane Homogonaga mini mo dunini halu ibunaga biabe biahalu holeberema, Yosuahanda lene.
Bu̱lu̱ baga buwa kuni gilibu ngago
1.1–12.24
Wai bialu Kenana dindi karulenego 13.1–21.45
Dindi tu howa taheneru ogodagua tu winigo
13.1-33
Iba Yodanani howa dindi ni ibiragohayagi winigo
14.1–19.51
Iba Yodanani howa dindi ni paliragohayagi winigo
20.1-9
Pora bialu puwa ha do holene tano winiru ogo
21.1-45
Libai hameiginirunaga tano winiru ogo 22.1-34
Hameigini ni ibiragohayagi hole hayaru tini daluha dai binigo 23.1-16
Yosua ibu homole howa paluni bi lenego 24.1-33
Habo Nalolene Bi lowinigo dindi Segemeni loyane bialu mo gahenge hadai bialu mo hongo henego
1
Ngode Datagaliwabehanda Yosuahondo lamialu, Kenana dindi karulabe, lenego ogo
1 Anduane Homogo ibunaga biabe biahaga Mosese homeagola ibugua Nunu igini Yosuahondo lalu, 2 I̱naga biabe bia haga agali Mosese homayago. Ala i̱na dindi Isaraele wali agali tíhondo ngulebero larugoria áyu í̠bi wali agali urunibi tígua Iba Yodana domalu anda pole manda manda bilimu. 3 I̱na abale Mosesehondo lo winigodagua dindi tígua ge hai holeberemigo i̱na tí ngido.✡Man 11.24-25 4 Dindi tu au ngeledo. Dalu emene hangu ibagane wiagoha howa Hari Lebanononaga tu wulebira. Ni tagira ibiragoha iba timbuni mini Yuberedisi poragoria howa Hidialinaga dindibi ni paliragoria iba solowara Medidereniana tu wulebira. 5 Yosua-o í̠ keangi agali bibahendeme í̠ bope halu ti wayali nahabehe holebira. I̱na Mosesela harudagua í̠labi obiagonidagua dege holebero. I̱na í̠ yu wa naholebero.✡Man 31.6-8, Hi 13.5 6 Wali agali o karu ti mamaliruhondo dindi o ngago tí ngulebero lo wirugo í̠ha howa mo mulebero. Wali agali dindi ogoniha karu bu helo í̠na haru halu í̠ mini bilinahe howa miniha dungulo habe.✡Man 31.6-7, 31.23 7 I̱na mana lo wirugo i̱naga biabe biahaga Mosesehanda langiyagome lo wiadagua bibahende bialu maru pugulani hondowa habe. Ogoni hondowa nahende tingi howa gi tigahayagibi gi lehayagibi handa a̱i̱ na̱i̱ buleni. Ani bialu kegola í̠ kegohayagi bayale hangu hama polebere. Anigo í̠na mini bilinaheore howa miniha dungulo habe. 8 Mana lo wirugonaga mbuga ogoria lo ngagoniore mitangitangi bialu mbiragabi horombebi lo manda biaabo habe. Ani buwa bibahende lo ngadagua biaiore hole bayuwa manda bibe. Anidagua biriyagua í̠na bule lowa mandabu keru biai halu bayaleore bima polebere.✡Iba 1.2-3 9 Nalangiruyabe. Í̠ mini bilinahe howa miniha dungulo habe langirugo ndobe. Anduane Homogo í̠naga Ngode Datagaliwabe i̱ kogo í̠ poregoria í̠ heba holeberogo gi nahe bu miniha au buledabe lo mandabi buleni, lalu lamini.
Yosua ibugua au bimi̱ya lalu wali agalibihondo te laminigo ogo
10-11 Yosua ibugua wali agali haru haga haguane hearuhondo lamialu lalu, Wali agali kagoria purogo lowa lalu, Horo tebiru howa Anduane Homogo tínaga Ngode Datagaliwabe ibugua dindi ngule layago ngulebirago tígua Iba Yodana domole tomo manda manda buwa mali̱ya, lamilimu, lene.
12 Ani lowa hameigini Lubenebi Gadabi hameigini Manase maru talebu howa tihondo Yosuahanda ogodagua lalu,✡Dag 32.28-32, Man 3.18-20, Yos 22.1-6 13 Ngode Datagaliwabenaga biabe biahaga agali Mosesehanda bi langiyago ogo, Dindi ogoni tí biralimulo Anduane Homogo tíninaga Ngode Datagaliwabe ibugua ngiyadagoni, lenego bayuwa mitangi bilimu. 14 Tí onebi waneiginirubi bulumagarubi iba ange ni ibirahayagi ogoria heloleberemi. Tínaga wai biagane agali biarume ti hamene Isaraele hameigini o poraru biamogo bule tigua Iba Yodana ala domalu bamba holebira. 15 Tínaga Anduane Homogo Ngode Datagaliwabe ibugua ti dindi ni paliragohayagi biago mule layago milo. Mialu bayuwa ka handala tíbi tíni dindi Anduane Homogonaga biabe biahaga Mosese ibugua Iba Yodana ni tagira ibiragohayagi ngiyagoria hole dai bule, lalu Yosuahanda lene.
16 Ani layagola tigua Yosuahondo ladai bialu lalu, Iname í̠na bia larego bibahendeore biai holeberema. Í̠na pu laregohabi piai holeberema. 17 Mosesenaga bi hale harimadagua í̠naga bi laregobi hale holeberema. Anduane Homogo í̠naga Ngode Datagaliwabe ibugua Mosesela hayadagua í̠labi ogonidagua helo. 18 Mbiralime í̠ kalo manda nabiyaguabi í̠naga bi larego hale nahayaguabi bia larego nabiyaguabi ogonibigo ibu homelo bolebira. Í̠ mini bilinahe howa miniha dungulo habe, lalu lamini.