21
Kenanaliru baba wai buwa Isaraelali ti wayali henego ogo
Arada tanonaga kini ibu Kenana aria unugohayagi heneyago ibugua hale halu hearia Isaraele wali agali biaru Adarimi harigani ibira layago hale howa ibugua Isaraele wali agali biaru baba wai bialu maru minu yalu pene. Dag 33.40 Ani biyagola Isaraelali tigua Anduane Homogohondo ogo buleore lalu bi mbira hongoheore lowialu lalu, Anduane Homogo-o í̠na wali agali uruni inanaga giha ya hariyagua iname tibi tinaga tano timbuni ngarunibi bo gialo haealabagabu wahalu í̠hondo lomabu ngiai holeberama, lene. Isaraele wali agalime bi ogoni layago Anduane Homogohanda hale howa Kenanali biaruni tinaga giha ya hene. Ani ya hayagola tigua tanobi wali agali hearubi bo gialo haealabagabu wahai hene. Ani bialu dindi ogoni mini Homa wini.* Homa inanaga bi lalu, Bo haealabaga bini.
Nogombi ale mbira ege to̱le̱ boronosime wabinigo ogo
Tigua Idomoalinaga dindi wandialu pole Hari Ho yu wahalu iba solowara Daramabi bereagoria pialu Agabahayagi pene. Ani pialu howa wali agali biarume hariga biago hondowa keba timbuni howa gomogomo lama pene. Man 2.1 Tigua Anduane Homogohondobi Mosesehondobi keba howa lalu, Ina Iyibi dindi ngelalu dindi ko wali agali nahe iba hinabi henene nawi ogoria homoloma̱ya agibule haru ibiribibe. Tomo ko ngubi uru nabe manga kama, lene. 1 Ko 10.9
Ani layagola Anduane Homogohanda nogombi mbira wali agali haniragola homagane ale ti heagoria dewa ibilene. Ani ibilayagola nogombi biarume wali agali dewaore haniyagola homene. Wali agali hearume Mosese hearia ibuwa lalu, Iname Anduane Homogohondobi í̠hondobi keba halu bi larimago kagua larimayago í̠na Anduane Homogohondo nogombi uruni mo yu ereba ha lalu lamibe, lene. Ani layagola Mosesehanda wali agali biarunaga Anduane Homogohondo bi lahene.
Ani layagola Anduane Homogohanda Mosesehondo lamialu, Nogombi mbira ege to̱le̱ boronosime wabuwa ira mbira dibuwa howa nogombi ogoni ogoriani derela ho wibe. Ani bu ngegola nogombime haniyaru tigua nogombi boronosime wabini ogoni handaya haragola ti nahome dabi holebira, lene. Ani layadagua Mosesehanda nogombi mbira boronosime wabuwa ira dibuwa howa ogoriani derela ho wini. Wali agali nogombime haniyiyagua ogoni ibu nogombi boronosime wabini irani derelaho wiyago handaya haragola dabi helo lowa ani bini. 2 Kin 18.4, Yo 3.14
Hari Honi howa Moabalinaga dindi ulini wiagoha penego ogo
10 Isaraele wali agali dindi dindi ogoria Obodi dindini anda puwa balai anda bu hene. 11 Ogoriani halu puwa wali agali nahe anda bambaore hene wiagoria Abarimini Moabaliru dindi ni ibiragohayagi handa amu halu puwa balai anda bu hene. 12 Ani bialu puwa Seredinaga dindi ulini wiagoha anda bu hene. 13 Ogoriani howa pialu iba Anono porago domalu puwa angeni anda bu hene. Dindi ogoni wali agali nahe hangu wima puabo halu Amoroali dindiha wima puabo ka. Amoroali Moabalilanaga dindi tu Iba Anono handa nga. 14 Irane Anduane Homogonaga Wai Biagane Bite Mbugani howa lo wialu lalu, Waheba tano Subahayagibi dindi ulini wiaruhabi iba Anonohabi 15 dindi ulini wiarunaga barebare wiaruniha howa pialu Ara tanoni pia ho wini. Ani pialu Moabali baba tuhayagi pene, lalu gilibu wini.
16 Ogoriani howa pialu tigua dindi ogoni mini Iba Biragane Uli laga wiagoria pene. Ogoriani howa Anduane Homogohanda ala lalu, Iba muliya wali agali bibahende haru ngoai hadaba, lene. 17 Ogoningi Isaraele wali agalime iba gana ogodagua lene.
 
Iba Biragane uliru-o iba biru to̱ ladaba.
Iname de handalu turu howa iba gana loleberema.
18 Iba Biragane Uli kini iginirume wene.
Wali agali haru hagarumebi wene.
Kininaga gewame wene.
Tininaga halimburume wene,
lalu iba gana lene.
Ani lalu tigua wali agali nahe biagoria howa Madanahayagi pene. 19 Madanani howa Nahaliele pene. Nahaliele howa Bamodo pene. 20 Bamodo howa dindi ulini Moaba wiagoha pene. Ogoni Hari Pisiga andaneha winigo ogoriani howa dindi ko wali agali nahe wiago handa amu howa wini.
Kini Sihono Kini Ogala balu wayali henego ogo
21 Isaraeleali biaru tigua bi yalu piaga marume bi Amoroalinaga Kini Sihono hearia yalu pudaba lowa lalu, 22 Ina tí daluni pu bolangua holoma̱ya henge ngi. Inamebi inanaga nogo bulumaga haru kamarumebi hariga tene yu wahalu tínaga mabu ngemiruhabi gerebi gama ngemiruhabi pu a̱i̱ na̱i̱ nabuleberema. Tínaga iba naga uli ngamirubi nanoleberema. Kini hariga tene haiweni hangu piaho wialu tínaga dindiha henge ngeremidagua poloma̱ya, lene. 23 Tigua ani hale hayagola Sihonohanda, Dindi henge nangule, lene. Ibugua ibunaga ami mo mogo bialu wali agali nahe dindi Yahase wiagoria tagira puwa Isaraeleali biaru baba wai bule ibini. 24 Wai bule ibiyaruni Isaraeleali biarume dewaore balu dindi Iba Anono howa uyurahayagi Iba Yabogo Amonoali baba tubaria wiago ti karulai hene. Amonoali ti ami agali hongohe howa tinaga dindi tubaria bayuwa mamage haga hene. 25 Isaraeleali biarume Amoroali biarunaga tano timbuni wiaru bibahende karulai hene. Hesebonobi tano emene emene uruniha wiapara para biaruni bibahendebi karulai hene. 26 Amoroalirunaga Kini Sihono ibunaga tano timbuni Hesebono winiya. Kini Sihono ibugua Moabalirunaga kini ala heneyago baba wai bialu dindi wiago damene bibahende karulama pialu Iba Anono bereagoria karulairi ho wini.
27 Ani binidagonaga Moabalinaga bi bulene mbira iba gana laga hearume lalu,
 
Tí Kini Sihononaga tano Hesebononi ibidaba.
Gialabaga bu ngaru hongohe helo lone biadai birane hondole hamelo kama.
28 Bamba Hesebono tano ogoriani howa Yar 48.45-46
Sihononaga amime wai gibi irame bo daradagua bialu
Moaba dindini Ara tano bo haealabaga bini.
Iba Anono manehayagi harini palearu bo gamu haradagua bini.
29 Moaba wali agali tíha mo ko holene wulebiragonaga daraho kama.
Irane tígua dama Kemoso bi pupu wirimigome tíni mo ko harimi.
Tínaga dama biagome agaliru dindi taraha pora bialu purogo lelene.
Wali dameneru Amoroalinaga kini kagome ti minuwa ibunaga garabaya biabe ale bilo berelene.
30 Anigo áyu tinaga aguanenebi nde bo haealabaga biyada.
Hesebononi howa bama pialu Dibono bo perelatagi hayada.
Nasimu howa bama pialu Medeba hapara howa Nobani bo haeala tagi haya,
lalu iba gana lene.
31 Ani bialu Isaraele wali agali biarume Amoroalinaga dindi karulo hene. 32 Ani howa Mosesehanda agali marume tano timbuni Yasere agua puwa babehedabe hondo wule wai taya pudaba, lene. Ani buwa Isaraeleali biarume Amoroali ogoriani paleneyaru bo purogo lalu tano maru ogoriani mandagi wia pagu biniyarubi bo purogo lene.
33 Ani bialu Isaraeleali biarume hariga mende Basana dindihayagi pole peagoria pene. Ani piyagola Basananaga Kini Ogahanda ibunaga ami haru halu Isaraele baba wai bule tagira pialu Ederini pene. 34 Anigo Anduane Homogohanda Mosesehondo lamialu lalu, Í̠na Kini Oga hondowa gi nahabe. Í̠na bai habelo hongo ngialu í̠naga giha wara ya harogo ibunaga dindibi wali agali bibahendebi bai holebere Amoroalinaga kini Hesebononi hearia birigodagua dege bulebere, lamini. 35 Isaraeleali biarume Kini Oga balu ibu iginirubi ibunaga wali agalirubi bibahende bo wahai halu mbiraliore yu wanahene. Ani bialu dindi winiyarubi ti karulai hene.

21:1: Dag 33.40

*21:3: Homa inanaga bi lalu, Bo haealabaga bini.

21:4: Man 2.1

21:5: 1 Ko 10.9

21:9: 2 Kin 18.4, Yo 3.14

21:28: Yar 48.45-46